Psalme
Koša ya Dafida. Maskile.*
32 Go thaba motho yoo a lebaletšwego molato wa gagwe le sebe sa gagwe.
2 Go thaba motho yoo Jehofa a sa mmonego molato,
Le yoo a se nago bofora.
3 Ge ke be ke homotše, ke be ke fela matla ka gobane ke be ke ekwa bohloko letšatši ka moka.
4 Ka gobane seatla sa gago se be se nkimela bošego le mosegare tše e kego ke imelwa ke morwalo o boima.
Matla a ka a fedile go swana le meetse ao a gopišitšwego ke phišo ya selemo. (Selah)
5 Mafelelong ke ile ka ipobola sebe sa ka go wena.
Ga se ka uta sebe sa ka.
Ka ipotša gore: “Ke tla ipobola dibe tša ka go Jehofa.”
Ke moka wena wa ntebalela dibe tša ka. (Selah)
6 Ka baka leo, yo mongwe le yo mongwe yo a tshepegago o tla go rapela
Ge o sa hwetšagala.
A ka se be le mathata ao a swanago le meetse a mantšhi.
7 O lefelo leo ke ikutago go lona.
O tla ntšhireletša gore ke se ke ka welwa ke mathata.
O tla nkemiša gare ga batho bao ba thabišitšwego ke gore o mphološitše. (Selah)
8 “Ke tla dira gore o be le temogo gomme ka go ruta tsela yeo o swanetšego go sepela ka yona.
Ke tla go eletša ka ba ka go thuša.
9 Le se ke la swana le pere goba meila yeo e sa tsebego selo,
Tšeo o swanetšego go di laola ka tomo goba ka thapo
Gore di kgone go tla kgauswi le wena.”
10 Motho yo mobe o na le mahloko a mantšhi,
Eupša yo a tshepago Jehofa o šireletšwa ke lerato la gagwe le le botegago.
11 Lena baloki, thabang ka baka la dilo tšeo Jehofa a di dirilego,
Goeletšang ka lethabo, lena ka moka ba dipelo tša go loka.