Psalme
Ditaelo tšeo di yago go mohlahli: Diriša modumo wa koša yeo e rego: “Dilili.” Koša ya barwa ba Kora. Maskile.* Koša ya lerato.
45 Pelo ya ka e thabišitšwe kudu ke selo se sengwe se sebotse.
Ke re: “Koša ya ka e bolela ka kgoši.”
Leleme la ka le swana le pene* ya mongwalolodi yo a nago le bokgoni.
2 O yo mobotse kudu go feta batho ka moka.
Molomong wa gago go tšwa mantšu a mabose.
Ke ka baka leo Modimo a tlago go go šegofatša go ya go ile.
3 Bofelela tšhoša ya gago lethekeng, wena yoo a nago le matla.
O na le seriti e bile o a hlomphega.
4 Ka ge o hlomphega, eya o yo fenya manaba a gago,
Namela pere ya gago gomme o lwele baikokobetši le therešo le toko,
Gomme letsogo la gago le letona le tla go thuša go dira dilo tšeo di boifišago.
5 Wena kgoši, mesebe ya gago e bogale, e dira gore batho ba we pele ga gago,
E hlaba dipelo tša manaba a gago.
6 Modimo o go file sedulo sa bogoši go ya go ile.
Molamo wa bogoši bja gago ke molamo wa go loka.
7 O rata dilo tša go loka eupša o hloile dilo tše mpe.
Ke ka baka leo Modimo a go tloditšego ka makhura e bile o go dirile gore o thabe kudu go feta dikgoši gotee le wena.
8 Diaparo tša gago ka moka di tšhetšwe senkgišabose seo se dirilwego ka mira, sekgopha le kasia,
O thabišitšwe ke diletšo tša mmino tšeo di llago ntlong e kgolo ya mošate yeo e kgabišitšwego ka manaka a tlou.
9 Barwedi ba dikgoši ba gare ga basadi bao o ba hlomphago.
Mmakgoši o dutše ka letsogong la gago le letona gomme o ikgabišitše ka gauta yeo e tšwago Ofira.
10 Wena morwedi wa ka, hlwaya tsebe gomme o theetše gabotse.
Lebala batho ba geno le ba gabo tatago.
12 Morwedi wa Tiro le yena o tla tla le mpho ya gagwe.
Batho bao ba humilego kudu ba tla tla ba go kgopela gore o ba amogele.
13 Morwedi wa kgoši o ka ntlong ya kgoši gomme o botse kudu.
Diaparo tša gagwe di kgabišitšwe ka gauta.
14 O tla tlišwa go kgoši a apere diaparo tše dibotse.
Bagwera ba gagwe ba dikgarebe ba mo šetše morago gomme ba išwa go yena.
15 Bao ba ba tlišago, ba ba tliša ba thabile kudu.
Ba tla tsena ka ntlong ya kgoši.
16 Barwa ba gago ba tla tšea legato la borakgolokhukhu ba gago.
O tla ba kgetha gore e be dikgošana lefaseng ka moka.
17 Ke tla dira gore leina la gago le gopolwe melokong ka moka e tlago.
Ke ka baka leo batho ba tlago go go reta go ya go ile.