Ekisodo

14 Bjale Jehofa a bolela le Moshe a re: 2 “Botša Baisiraele gore ba boele morago gomme ba hlome ditente Pihahirothe magareng ga Migidolo le lewatle moo go lebanego le Baali-tsefone. Le hlome ditente pele ga Baali-tsefone kgauswi le lewatle. 3 Ke moka Farao o tla re: ‘Baisiraele ba timetše, ba kgakgetšwe kua lešokeng.’ 4 Ka gona ke tla lesa Farao a thatafiša hlogo. Yena le mašole a gagwe ba tla le rakediša gomme ke tla dira gore batho ba bone gore ke na le matla a magolo. Baegepeta ba tla tseba gore ke nna Jehofa.” Baisiraele ba dira sona seo ba se boditšwego.

5 Ka morago kgoši ya Egepeta ya botšwa gore Baisiraele ba tšhabile. Ka yona nako yeo, Farao le bahlanka ba gagwe ba itsholela gore ba tlogetše Baisiraele ba sepela gomme ba re: “Go re’ng re be re lesa Baisiraele ba sepela gore e se sa ba makgoba a rena?” 6 Ka gona Farao a tšea dikoloi tša gagwe tša ntwa le mašole a gagwe gomme ba tloga. 7 O ile a tšea dikoloi tša ntwa tše 600 (makgolotshela) tša go phala tše dingwe ka moka, le dikoloi tše dingwe ka moka tša Egepeta. Dikoloi tšeo ka moka di be di nametšwe ke mašole. 8 Ka gona, Jehofa a lesa Farao kgoši ya Egepeta a thatafiša hlogo, gomme Farao yena o ile a kitimiša Baisiraele, mola Baisiraele bona ba be ba sepela ba sa tšhoge selo. 9 Baegepeta ba ba kitimiša gomme dikariki tša ntwa ka moka tša Farao le mašole a gagwe ao a nametšego dipere gotee le mašole a mangwe a gagwe, ba batamela Baisiraele ge ba be ba hlomile ditente kgauswi le lewatle. Baisiraele ba be ba le kgauswi le Pihahirothe yeo e lebanego le Baali-tsefone.

10 Ge Farao le mašole a gagwe ba batamela, Baisiraele ba ile ba ba bona. Ba ile ba tšhoga kudu gomme ba llela Jehofa. 11 Ba re go Moshe: “Kgane ga go na mabitla kua Egepeta? Go be go tlo ba kaone gore re hwele gona go e na le go hwela mo lešokeng. Ke ka baka la’ng o re ntšhitše Egepeta? 12 Na ge re be re le kua Egepeta ga se ra ka ra go botša gore: ‘Re tlogele re hlankele Baegepeta’? Ka gobane go kaone gore re hlankele Baegepeta go e na le gore re yo hwela lešokeng.” 13 Ke moka Moshe a re go setšhaba: “Le se ke la tšhoga, tiang matla gomme le bone ge Jehofa a le phološa lehono. Ka gobane Baegepeta bao le ba bonago lehono le, ke re le ka se tsoge le ba bone gape. 14 Jehofa yena o tla le lwela gomme lena le tla be le ikhomoletše.”

15 Bjale Jehofa a re go Moshe: “O re’ng o dulela go llela go nna? Botša Baisiraele gore ba hlomolle ditente ba sepele. 16 Wena emišetša lepara la gago godimo, o šupe lewatleng gomme o le aroganye, e le gore Baisiraele ba fete gare ga lewatle mo go omilego. 17 Ge e le nna, ke tla lesa Baegepeta ba thatafiša dihlogo. Ba tla le rakediša, gomme ke tla dira gore batho ka moka ba bone gore ke na le matla a magolo ka go fenya Farao, mašole a gagwe ka moka, dikoloi tša gagwe tša ntwa le mašole a gagwe a go namela dipere. 18 Ka morago ga gore ke fenye Farao, dikoloi tša gagwe tša ntwa le mašole a gagwe a go namela dipere, Baegepeta ba tla tseba gore ke nna Jehofa.”

19 Ke moka morongwa wa Modimo wa nnete yo a bego a etile Baisiraele pele a tloga a ya ka morago ga bona, gomme le leru leo le bego le le pele ga bona, la tloga la ya ka morago ga bona. 20 Leru leo la tsena magareng ga Baegepeta le Baisiraele. Ka lehlakoreng le lengwe leru leo le be le dira gore go be le leswiswi. Ka lehlakoreng le lengwe le be le dira gore go be le seetša ge e eba bošego. Ka gona, Baegepeta ba se kgone go batamela Baisiraele bošego ka moka.

21 Bjale Moshe a emišetša letsogo la gagwe lewatleng. Ke moka Jehofa a dira gore phefo e matla ya ka bohlabela e be gona bošego ka moka gore e bušetše lewatle morago. Meetse a arogana ka bogare, gomme lewatle la fetoga naga yeo e omilego. 22 Bjale Baisiraele ba feta gare ga lewatle ba sepela mo go omilego, mola meetse a be a eme bjalo ka leboto ka letsogong la bona la le letona le la le letshadi. 23 Baegepeta ba ba rakediša gomme dipere ka moka tša Farao, dikoloi tša gagwe tša ntwa le mašole a gagwe a go namela dipere, tša tsena lewatleng di ba šetše morago. 24 Ya re e sa le ka masa, ge Jehofa a le gare ga mollo le leru, a lebelela mašole a Baegepeta ke moka a a hlakahlakanya. 25 A thoma go khwamola maotwana a dikoloi tša ona, gomme go be go le thata gore mašole ao a di sepetše. Ka gona Baegepeta ba re: “A re tšhabeng re tlogeleng Baisiraele ka gobane Jehofa o lwa le rena Baegepeta, gore a šireletše Baisiraele.”

26 Ke moka Jehofa a re go Moshe: “Otlollela letsogo la gago lewatleng gore meetse a boele godimo ga Baegepeta, dikoloi tša bona tša ntwa le mašole a bona a go namela dipere.” 27 Moshe a otlollela letsogo la gagwe lewatleng gomme lewatle la boela sekeng ge go esa. Ge Baegepeta ba be ba dutše ba leka go tšhaba, Jehofa o ile a ba hlohlorela ka lewatleng. 28 Meetse a boa, gomme a khupetša dikoloi tša ntwa, mašole a go namela dipere, le mašole ka moka a Farao ao a bego a rakediša Baisiraele ka lewatleng. Gwa se phologe le o tee.

29 Baisiraele bona ba ile ba sepela mo go omilego gare ga lewatle, meetse a eme bjalo ka leboto ka letsogong la bona la le letona le la le letshadi. 30 Ka gona, letšatšing leo Jehofa o ile a phološa Baisiraele go Baegepeta gomme Baisiraele ba bona Baegepeta ba hwile moo lebopong la lewatle. 31 Baisiraele ba bona matla a magolo a Jehofa ao a a dirišitšego go fenya Baegepeta. Batho ka moka ba thoma go hlompha Jehofa kudu. Ba ba le tumelo go Jehofa le go tshepa Moshe mohlanka wa gagwe.