Lengwalo le le Yago go Bakolose

2 Gobane ke nyaka le tseba gore ke leka ka thata go le thuša le go thuša bao ba lego Laoditsea gotee le batho ka moka bao ba sa kago ba mpona ka go lebanya. 2 Ke dira se gore ke ba homotše e le gore ba be le botee gomme ba ratane, gore ba hwetše ditšhegofatšo tšeo di tlišwago ke kwešišo ya bona e feletšego, e le gore ba tle ba hwetše tsebo e nepagetšego ya sephiri se sekgethwa sa Modimo, e lego Kriste. 3 Bohlale bjo bogolo le tsebo di utilwe go yena. 4 Ke bolela se gore go se ke gwa ba le motho yo a le forago gomme a le lahletša. 5 Le ge ke se gona moo le lego gona, ke dula ke nagana ka lena. Ke thabela go kwa gore le dira dilo ka thulaganyo e bile le tshepa Kriste ka dipelo tša lena ka moka.

6 Ka gona, ka ge le dumela go Kriste Jesu Morena wa rena, tšwelang pele le itshwere ka yona tsela yeo. 7 Go etša ge le ithutile, tumelo ya lena go Kriste e swanetše go le tiiša le go le matlafatša go swana le mohlare woo medu ya wona e išago fase gomme le dule le leboga Modimo.

8 Le be šedi gore go se be le motho yo a le tanyago ka bohlale bja lefase le dikgopolo tša maaka tšeo batho ba ithometšego tšona, e lego dilo tšeo batho ba di bonago di le bohlokwa eupša di sa tšwe go Kriste. 9 Ka gobane dika ka moka tša Modimo di bonagala gabotse go Kriste. 10 Ka baka la gagwe ga le hloke selo ka ge a laola mebušo ka moka le balaodi. 11 Le ile la bolotšwa ka ge le na le tumelo go Kriste, la se bolotšwe ka diatla tša batho eupša ka go hlobola mmele wa nama wo o nago le sebe, ka gobane yeo ke tsela yeo bahlanka ba Kriste ba swanetšego go bolotšwa ka yona. 12 Gobane le ile la bolokwa le yena ka go kolobetšwa go swana le yena. Modimo o le tsošitše bahung gotee le yena ka ge le na le tumelo medirong ya gagwe, yena Modimo yo a tsošitšego Kriste bahung.

13 Go feta moo, le ge go be go le bjalo ka ge eka le hwile ka ge le be le na le dibe e bile le se la bolotšwa, Modimo o le phedišitše gotee le yena. O re bontšhitše botho ka go re lebalela dibe tša rena ka moka, 14 gomme a phumola ka mo go feletšego molao woo o bego o ngwadilwe ka seatla, woo o bego o na le ditaelo e bile o ganetšana le rena. O ile a o fediša ka go o kokotela koteng ya tlhokofatšo. 15 O dirišitše kota* yeo go fenya mebušo le balaodi, a ba tlontlolla pele ga batho ka moka ka go ba dira makgoba, ka go re’alo a bontšha gore o ba fentše ka mo go feletšego.

16 Ka gona, ga go na yo a nago le tshwanelo ya go le botša gore le je eng goba le nwe eng, goba gore le keteke monyanya, kgwedi e mpsha* goba sabatha. 17 Dilo tšeo di swantšhetša dilo tšeo di tlago go tla, eupša dilo tša kgonthe di tla phethagatšwa ke Kriste. 18 Hlokomelang batho bao ba itirago eka ba ikokobeditše e le feela gore ba bonwe ke batho, le bao ba rapelago barongwa, ka gobane ba ka dira gore le se ke la hwetša moputso. Batho ba bjalo ba ithekga feela ka dilo tšeo ba kgonago go di bona e bile ba ikgantšha ka dilo tšeo ba di naganago tša go se re selo. 19 Batho ba bjalo ga ba latele hlogo yeo e neago mmele ka moka dilo tšeo o di hlokago e bile e kgomaganya ditho ka moka tša mmele. Kriste o dira gore mmele o tšwele pele o gola a thušwa ke matla a Modimo.

20 Ge e ba le hwile gotee le Kriste gomme le lokologile dikgopolong tša lefase, ke ka baka la’ng le sa phela okare le karolo ya lefase ka go latela ditaelo tše di rego: 21 “O se ke wa swara goba wa latswa goba wa kgwatha,” 22 tšeo di šupago go dilo tšeo di senyegago ka morago ga go dirišwa? Tše ke ditaelo le dithuto tša batho. 23 Ditaelo tše di ka bonagala di le bohlale, eupša ga di thuše batho go ganetša dikganyogo tša mebele ya bona. Se se dirwa ke gore batho ba ikgethela tsela yeo ba nyakago go hlankela Modimo ka yona, ba itira eka ba ikokobeditše gomme ba tlaiša mebele ya bona.