Jesaya
30 Jehofa o re: “Go madimabe bana ba dinganga,
Bao ba itirelago boithatelo, ba sa dirego dilo tšeo ke di nyakago,
Bao ba dirago ditumelelano tšeo ke sa dumelelanego le tšona,
E le gore ba dire sebe godimo ga sebe.
2 Ba ya Egepeta ba se ba bolela le nna,
Gore ba yo kgopela gore Farao a ba šireletše
Le go tšhabela moriting wa Egepeta.
3 Eupša ge Farao a le šireletša le tlo hlabja ke dihlong,
Gomme go tšhabela moriting wa Egepeta go tlo dira gore le tlontlollwe.
4 Ka gobane baetapele ba gagwe ba kua Tsoane,
Le batho ba gagwe bao ba romilwego ba fihlile Hanese.
5 Ka moka ga bona ba tla hlabišwa dihlong
Ke batho bao ba ka se ba holego ka selo,
Bao ba ka se ba thušego ka selo e bile ba se nago mohola.
Baegepeta ba tla tlontlolla Baisiraele le go ba hlabiša dihlong.”
6 Molaetša wo o lego mabapi le go ahlola diphoofolo tša ka borwa šo:
Nageng ya tlalelo le ya mathata,
Ya ditau le ditau tšeo di rorago,
Ya dinoga tša mpholo le dinoga tše kotsikotsi,*
Ba tšea mahumo a bona ba a bea godimo ga ditonki,
Gomme dithoto tša bona ba di bea godimo ga dikamela.
Eupša dilo tše di ka se hole batho ka selo.
7 Thušo ya Egepeta ga e na mohola le gatee.
Ka gona ke e biditše ka re ke “Rahaba* yo a dulago a sa dire selo.”
8 “Bjale sepela o yo ngwala molaetša leswikeng o na le bona,
Gomme o o ngwale le ka pukung,
E le gore nakong e tlago
E tle e be bohlatse bja go ya go ile.
9 Ka gobane ke setšhaba seo se sa kwego Modimo,
Bana bao ba se nago nnete le bao ba sa nyakego go kwa molao wa Jehofa.
10 Ba botša batho bao ba bonago dipono ba re: ‘Tlogelang go bona dipono.’
Ba botša baporofeta ba re: ‘Le se ke la porofeta dilo tša nnete.
Re botšeng dilo tše dibotse, re porofeteleng dilo tša maaka.
11 Arogang tseleng, tlogang tseleng.
Tlogelang go re botša ka Modimo yo Mokgethwa wa Isiraele.’”
12 Ka gona Modimo yo Mokgethwa wa Isiraele o re:
“Ka ge le gana lentšu la ka,
Gomme le tshepile maaka le boradia,
E bile le ithekgile ka tšona,
13 Gona molato wo mo go lena o tla swana le leboto leo le thubegilego.
O tla swana le leboto le letelele leo le pharogilego gomme le le kgauswi le go wa.
Le tla wa kapelapela, ka ponyo ya leihlo.
14 Leboto leo le tla phušolwa go swana le ge go pšhatlaganywa sebjana se segolo sa letsopa,
Se tla pšhatlaganywa gwa se šale le karolwana le e tee
Ya go tšea magala sebešong
Goba ya go kga meetse.”
15 Mmuši Morena Jehofa, yena Modimo yo Mokgethwa wa Isiraele, o re:
“Ge le ka boela go nna gomme la khutša, le tla phološwa.
Le tla ba le matla ge le dula le sa tshwenyege e bile le ntshepa.”
Eupša le ile la gana.
16 Go e na le moo, le itše: “Aowa, re tla tšhaba re nametše dipere!”
Ke ka baka leo le tlago go tšhaba.
Le gona le itše: “Re tla namela dipere tšeo di kitimago ka lebelo!”
Ke ka baka leo bao ba le rakedišago ba tla kitimago ka lebelo.
17 Ba 1 000 (sekete) ba tla thothomela ba tšhošwa ke motho o tee.
Le tla tšhaba ge le tšhošwa ke batho ba bahlano
Go fihlela mo go lena go šetše seo se swanago le kota e tee ntlheng ya thaba,
Le seo se swanago le kota yeo e nago le folaga mmotong.
18 Eupša Jehofa o letile a sa fele pelo gore a le gaugele,
Gomme o tla le šokela.
Ka gobane Jehofa ke Modimo yo a ahlolago ka go loka.
Go thaba batho ka moka bao ba dulago ba mo letetše.
19 Ge batho ba dula Tsione yeo e lego Jerusalema, le ka se ke la lla le gatee. O* tla le gaugela ge a ekwa le lla le nyaka thušo, o tla le araba gateetee ge a ekwa le lla. 20 Le ge Jehofa a ka le nea tlalelo gore e be dijo tša lena, gomme a le nea kgatelelo gore e be meetse a lena, Mohlahli wa lena yo Mogolo a ka se sa iphihlela lena, e bile le tla bona Mohlahli wa lena yo Mogolo ka mahlo a lena. 21 Ditsebe tša lena di tla kwa lentšu ka morago ga lena le re: “Tsela še. Sepelang ka yona,” e le gore le se ke la arogela ka go le letona goba le letshadi.
22 Le tla šilafatša diswantšho tša lena tše di betlilwego tšeo di pentilwego ka silifera, le diswantšho tša lena tša tšhipi tše di pentilwego ka gauta. Le tla di lahla bjalo ka lešela la ditšhila la mosadi yo a bonago kgwedi, gomme la re go tšona: “Tlogang mo!” 23 Modimo o tla le nešetša pula bakeng sa peu yeo le e bjetšego mobung, gomme mobu o tla tšweletša dijo tše dintšhi le tšeo di nonnego. Letšatšing leo diruiwa tša lena di tla ba le mafelo a magolo ao di fulago go wona. 24 Dikgomo le ditonki tšeo di lemago nageng di tla ja dijo tšeo di tswakilwego gabotse, tšeo di ološitšwego ka garafo le foroko. 25 Go tla ba le dinokana le maope a meetse dithabeng ka moka tše ditelele le mebotong ka moka e phagamego letšatšing la polao e kgolo, ge maboto a matelele a ewa. 26 Seetša sa ngwedi wo o feletšego se tla ba bjalo ka seetša sa letšatši leo le phadimago, gomme seetša sa letšatši le le phadimago se tla phadima gašupa go feta mehleng. Go tla swana le ge seetša sa matšatši a šupago se phadima ka letšatši letee. Se se tla direga letšatšing la ge Jehofa a tlema batho ba gagwe mo ba robegilego gona, gomme a alafa dintho tše šoro tšeo di bakilwego ke ge a ba otla.
O bolela a galefile,
E bile leleme la gagwe le swana le mollo o tšhumago.
28 Moya wa gagwe o swana le moedi woo meetse a wona a tletšego go fihla ka melala,
E le gore a šikinye ditšhaba ka sefong ya go fediša,
Le gona mehlagareng ya ditšhaba o tla tsenya ditomo tšeo di di arošago.
29 Eupša koša ya lena e tla swana le yeo e opelwago bošego
Ge le itokišeletša monyanya,
Gomme dipelo tša lena di tla thaba go swana le
Motho yo a tšamago a letša naka
Ge a eya thabeng ya Jehofa, yena Leswika la Isiraele.
30 Jehofa o tla dira gore batho ba kwe lentšu la gagwe le matla,
A dira gore ba bone ge letsogo la gagwe le theoga le hlasela ka bogale,
Ka mollo o tšhumago,
Lefula, ledimo le sefako.
31 Asiria e tla tšhošwa ke lentšu la Jehofa,
O tla e betha ka kgati.
32 Nako le nako ge Jehofa a emiša
Kgati ya gagwe ya go otla Asiria,
Go tla lla meropa le diharepa
Ge a emiša letsogo la gagwe gore a lwe le bona.
Lefelo leo a le diretšego mokgobo wa dikgong ke molete o išago,
Gomme o tletše mollo le dikgong.
Mohemo wa Jehofa o tla fiša lefelo leo
Go swana le moedi wa sebabole.*