Lengwalo la Pele le le Yago go Bathesalonika
2 Banabešo, lena le tseba gabotse gore ge re be re le etetše le ile la holega kudu. 2 Le a tseba gore le ge re ile ra tlaišega ebile ra se swarwe gabotse ge re be re le kua Filipi, Modimo o ile a re fa sebete sa go le botša ditaba tše dibotse ka yena le ge batho ba be ba re ganetša kudu. 3 Dikeletšo tšeo re le neago tšona ga se tša maaka, ebile ga re le nee tšona e le gore re le lahletše goba re le fore, 4 eupša re bolela le lena bjalo ka batho bao ba kgethilwego ke Modimo gore re bolele ditaba tše dibotse. Ga re bolele le lena gore re kgahliše batho, eupša re nyaka go kgahliša Modimo, yena yo a hlahlobago dipelo tša rena.
5 Le a tseba gore ga se ra ka ra le reta ka mo go feteletšego goba ra itira batho ba go loka e le gore re hwetše se sengwe. Modimo o tseba taba ye gabotse. 6 Le gona ga se ra ka ra nyaka gore lena goba batho ba bangwe le re tumiše. Ka ge re le baapostola ba Kriste, nkabe re ile ra le imetša ka gore le re hlokomele. 7 Go e na le moo, re ile ra le swara ka boleta go swana le ge mma yo a amušago a hlokomela bana ba gagwe. 8 Ka ge re le rata kudu, re thabela go le botša ditaba tše dibotse tša Modimo, le go neela maphelo a rena e le gore re le thuše.
9 Banabešo, le tseba gabotse kamoo re bego re šoma ka thata ka gona. Ge re be re tlile go tlo le botša ditaba tše dibotse ka Modimo, re be re šoma bošego le mosegare e le gore re kgone go itlhokomela gore re se ke ra imetša le o tee wa lena. 10 Lena le dihlatse tša gore ge re be re na le lena re be re botega, re dira dilo tše di lokilego le tšeo di sa solegego. Modimo le yena ke hlatse ya se. 11 Le tseba gabotse gore re be re kgothatša yo mongwe le yo mongwe wa lena, re le homotša ebile re le eletša, go no swana le ge tate a dira se se swanago go bana ba gagwe. 12 Re dirile seo e le gore le tšwele pele le sepela ka tsela yeo Modimo a e amogelago, yena yo a le bitšago gore le tle Mmušong wa gagwe gomme le hwetše letago.
13 Ke ka baka leo re dulago re leboga Modimo, ka gobane ge le be le ekwa lentšu la Modimo leo re le boditšego lona, le ile la le amogela e le lentšu la Modimo ka nnete, e sego la batho. E lego lentšu leo le thušago lena badumedi. 14 Lena banabešo, le ile la ekiša diphuthego tša Bokriste tšeo di lego Judea tšeo e lego diphuthego tša Modimo. Le ile la tlaišwa ke batho ba nageng ya gabo lena go swana le kamoo banababo lena ba Judea ba tlaišwago ke Bajuda. 15 Bajuda ke bona ba bolailego Morena Jesu go etša ge ba bolaile baporofeta gomme ba ile ba re tlaiša. Le gona ga ba dire dilo tšeo Modimo a di amogelago, ebile dilo tšeo ba di dirago ga di hole motho. 16 Ba leka go re thibela gore re se ke ra botša batho ba ditšhaba tše dingwe molaetša wa gore ba ka dira eng gore ba phološwe. Ka go dira seo, ba dulela go oketša dibe tša bona. Eupša gona bjale Modimo o ba galefetše.
17 Banabešo, ge re be re arogane le lena ka nakwana re sa kgone go bonana, re be re le gopotše. Ka ge re be re le hlologetše kudu, re ile ra dira sohle seo re ka se kgonago gore re tle re le bone. 18 Ke ka baka leo re bego re nyaka go le etela eupša Sathane o be a dula a thiba tsela ya rena. Ge e le nna Paulo ke lekile go tla go lena gabedi. 19 Nakong ya ge Morena Jesu a boa, na ga se lena le tlago go ba kholofelo ya rena, lethabo la rena le moputso wa rena woo re tlago go ikgantšha ka wona pele ga gagwe? 20 Ka nnete re ikgantšha ka lena ebile le dira gore re thabe.