Psalme
Ditaelo tšeo di yago go mohlahli. Koša ya barwa ba Kora. Diriša mokgwa wa Mahalathe* gomme e opelwe ka go šiedišana. Maskile* ya Hemane wa Moetsera.
2 Anke thapelo ya ka e fihle go wena,
Gomme o nkwe ge ke llela gore o nthuše.
4 Batho ba bona okare ke kgauswi le go hwa,
Ke bjalo ka monna yo a se nago matla,
5 Yo a lahlilwego gare ga bahu,
Bjalo ka ditopo tšeo di robetšego lebitleng,
Tšeo o se sa hlwago o di gopola
Le tšeo o se sa hlwago o di thuša.
6 O ntsentše ka moleteng o išago tlasetlase,
Moo go nago le leswiswi, ka gare ga molete o mogolo.
7 O nkgalefetše kudu, ke kwa eka o a mpšhatlaganya.
Dilo tšeo o ntirago tšona di bjalo ka ge eka ke bethwa ke maphoto a magolo. (Selah)
8 Bao ke ba tlwaetšego o ba beile kgole le nna.
O dirile gore ba ntšhišingwe.
Ke tantšwe gomme ga ke kgone go phonyokga.
9 Mahlo a ka a lapišitšwe ke tlaišego ya ka.
Ke go bitša letšatši ka moka, wena Jehofa,
E bile ke go rapela ke emišitše matsogo.
10 Na bahu ba ka bona mehlolo ya gago?
Na ba ka tsoga gomme ba go tumiša? (Selah)
11 Na lebitleng go ka bolelwa ka lerato la gago le le botegago?
Na lefelong* leo go ka bolelwa ka go tshepega ga gago?
12 Na bao ba lego leswiswing ba ka tseba ka mehlolo ya gago,
Goba na bao ba lebetšwego ba ka tseba ka go loka ga gago?
13 Eupša ke sa dutše ke go llela gore o nthuše wena Jehofa.
Ke go rapela mesong e mengwe le e mengwe.
14 Go re’ng o ntahla wena Jehofa?
Go re’ng o nkutela sefahlego sa gago?
15 Ga e sa le ke hlaka go tloga ke le moswa,
E bile ke nyakile ke ehwa.
Ke gateletšegile kudu ka baka la dilo tšeo di kwešago bohloko tšeo o di dumeletšego di ntlaiša.
16 Ke feletšwe ke matla ka ge o nkgalefetše kudu,
Ke tšhogile wa go hwa ka baka la dilo tšeo o ntirago tšona.
17 Dilo tšeo o di dirago di ntikologile letšatši ka moka bjalo ka meetse.
Di ntlhasela go tšwa mahlakoreng ka moka.
18 O dirile gore bagwera ba ka le batho ba gešo ba se nyake go ba kgauswi le nna,
Go bjalo ka ge eka leswiswi ke lona feela e lego mogwera wa ka.