Jesaya
49 Ntheetšeng lena dihlakahlaka,
Hlwayang tsebe, lena ditšhaba tšeo di lego kgole.
Jehofa o nkgethile le pele nka belegwa.
O boletše ka leina la ka go tloga nakong ya ge ke sa le ka mpeng ya mma.
2 O dirile gore molomo wa ka o swane le sabola e bogale.
O ntšhireleditše ka seatla sa gagwe.
O ntouditše go swana le mosebe.
O nkhutišitše ka mokotleng wa gagwe wo o swarago mosebe.
3 A re go nna: “O mohlanka wa ka, wena Isiraele,
Yoo ke tlago go mo diriša go bontšha letago la ka.”
4 Eupša nna ka re: “Ke bereketše mahala.
Ke sentše matla a ka ka dilo tšeo e sego tša nnete, e lego tša lefeela.
Ruri ke tla ahlolwa ke Jehofa,
E bile ke yena a tlago go nnea moputso wa ka.”
5 Bjale Jehofa, yena yo a mpopilego ka mpeng ke le mohlanka wa gagwe,
O mpoditše gore ke bušetše Jakobo go yena,
E le gore Baisiraele ba kgobokeletšwe go yena.
Ke tla tagafatšwa mahlong a Jehofa,
Gomme Modimo wa ka ke yena a tlago go nnea matla.
6 Ke moka yena a re: “O mohlanka wa ka yo ke mo kgethilego
Gore a tsošološe meloko ya Jakobo,
Le go bušetša Baisiraele bao ba phologilego* nageng ya bona.
E bile ke go dirile le gore o be seetša sa ditšhaba,
E le gore phološo ya ka e fihle le mafelelong a lefase.”
7 Jehofa, yena yo a rekolotšego Isiraele, e lego yena Mokgethwa wa Isiraele, o botša yo a nyatšwago kudu, yena yo a hloilwego ke setšhaba, mohlanka wa babuši, o re:
“Dikgoši di tla bona gomme tša ema,
Dintona di tla khunama
Ka gobane Jehofa, yo a botegago,
Yena Mokgethwa wa Isiraele, o go kgethile.”
8 Jehofa o re:
“Ke go arabile nakong ya ge ke be ke go bontšha kgaugelo,
Gomme ke ile ka go thuša letšatšing la phološo.
Ke ile ka dula ke go šireletša gore o be kgwerano
Magareng ga ka le batho ba ditšhaba,
E le gore ba tle ba hwetše bohwa bjo bo bego bo šwalalantšwe,
9 O re go bao ba golegilwego: ‘Etšwang!’
E bile go bao ba lego leswiswing o re go bona: ‘Etšwang, e le gore batho ba le bone!’
Ba tla swana le dinku tšeo di fulago ditseleng,
Gomme mafelo ao ba fulago go ona a tla ba ditseleng tšeo di sepelwago kudu.
10 Ba ka se swarwe ke tlala, e bile ba ka se nyorwe,
Letšatši le phišo e kgolo di ka se ba tšhume.
Ka gobane yo a ba šokelago o tla ba hlahla
A ba iša didibeng tša meetse.
11 Dithaba tša ka ka moka ke tla di fetoša ditsela,
Gomme ditsela tša ka ka moka tše dikgolo di tla ba morotogeng.
12 Bonang! Batho ba tla ba etšwa kgole.
Ba bangwe ba tšwa ka leboa, gomme ba bangwe ba tšwa ka bodikela,
Mola ba bangwe ba etla ba etšwa nageng ya Sinimi.”
13 Goelelang le thabile, lena magodimo, le wena lefase, anke o thabe.
Anke dithaba di goelele ka mokgoši wa lethabo.
Ka gobane Jehofa o homoditše batho ba gagwe,
Gomme o šokela batho ba gagwe bao ba hlakišwago.
14 Eupša Tsione o duletše gore:
“Jehofa o ntlogetše, e bile Jehofa o ntebetše.”
15 Na mosadi a ka lebala leseana la gagwe leo le sa amušwago,
Goba na a ka se kwele bohloko ngwana yo a tšwago ka mpeng ya gagwe?
Le ge basadi ba ka lebala, eupša nna nka se go lebale.
16 Bona! Ke ngwadile leina la gago ka diatleng tša ka.
Maboto a gago a dula a le ka pele ga ka.
17 Bana ba gago ba boile ka pela.
Bao ba go phušotšego le bao ba go šwalalantšego, ba tla tloga mo go wena.
18 Gaša mahlo a gago gohle gomme o bone.
Ka moka ga bona ba kgobokana gotee.
Ba tla go wena.
Jehofa o re: “Ke ikana ka nna yo a phelago,
Gore o tla ba apara ka moka bjalo ka ge eka ke dilo tša go ikgabiša,
Gomme o tla ipofa ka bona go no swana le ge monyadiwa a rwala selo sa go ikgabiša molaleng.
19 Le ge mafelo a lena a be a pšhatlilwe e bile a sentšwe gomme naga ya lena e le marope,
Gona bjale e tla pitlagana kudu, gomme ya se lekane batho bao ba dulago moo.
Ke moka bao ba le meditšego ba tla ba kgole le lena.
20 Bana bao o ba belegego ka morago ga ge o hlokofaletšwe ke bana ba gago ba tla re go wena:
‘Lefelo le le pitlagane kudu.
Re okeletše lona gore re kgone go dula mo.’
21 Ke moka ka pelong ya gago o tla re:
‘Tatago bana ba ba ka ke mang?
Ka ge ke le mosadi yo a hlokofaletšwego ke bana
E bile nka se sa kgona go ba le bona,
Ke thopilwe e bile ke golegilwe, ke mang yo a godišitšego bana ba?
Ke ile ka tlogelwa ke nnoši,
Bjale bana ba ba tšwa kae?’”
22 Mmuši Morena Jehofa o re:
“Ke tla emiša seatla sa ka gore ditšhaba di bone,
Gomme ke tla emiša leswao la ka gore merafo e bone.
Ba tla tliša barwa ba gago ba ba kukile,
Gomme ba tliša barwedi ba gago ba ba beile magetleng a bona.
23 Dikgoši di tla go hlokomela,
Gomme barwedi ba tšona ba tla nyantšha bana ba gago.
Ba tla go khunamela ba inamišitše difahlego,
Gomme ba latswa lerole leo le lego dinaong tša gago.
Ka gona, o tla tseba gore ke nna Jehofa,
E bile bao ba ntshepilego ba ka se hlabje ke dihlong.”
24 Na bao ba šetšego ba tšerwe ba ka amogwa monna yo a nago le matla,
Goba na go ka ba le motho yo a phološago bao ba thopilwego ke motho yo a gatelelago ba bangwe?
25 Eupša Jehofa o re:
“Gaešita le batho bao ba thopilwego ke monna yo a nago le matla, ba tla tšewa,
Gomme bao ba thopilwego ke motho yo a gatelelago ba bangwe, ba tla phološwa.
Ke tla lwa le bao ba lwago le wena,
Le gona, ke tla phološa le bana ba gago.
26 Ke tla dira gore bao ba go hlakišago ba je nama ya bona,
Gomme ba tla tagwa ke madi a bona bjalo ka ge eka ba tagilwe ke beine e bose.
Ka gona, batho ka moka ba tla tseba gore ke nna Jehofa,
Yena yo a go phološago le yo a go rekollago,
E lego Modimo yo Matla wa Jakobo.”