Jeremia
10 Ekwang seo Jehofa a le boditšego sona, lena Baisiraele. 2 Jehofa o re:
“Le se ke la ithuta mekgwa ya ditšhaba tše dingwe,
Le gona le se ke la tšhošwa ke maswao a magodimong,
Ka gobane ditšhaba tše dingwe di tšhošwa ke maswao ao.
3 Dilo tšeo ba tlwaetšego go di dira e fo ba lefeela.
Di no swana le mohlare wo motho a o remilego sethokgweng,
Gomme mmetli a dira modimo wa seswantšho ka wona.
4 Batho ba botsefatša modimo woo ka silifera le gauta,
Ke moka ba o kokotela fase ka dipikiri le hamola gore o se ke wa wa.
5 Medimo ya diswantšho e swana le dilo tša go tšhošetša tšeo di bewago mašemong a dikhukhampa, gomme ga e kgone go bolela.
E swanetše go rwalwa ka gobane ga e kgone go sepela.
Le se ke la e tšhaba ka gobane e ka se le gobatše,
E bile e ka se le direle selo le ge e le sefe se sebotse.”
6 Wena Jehofa, ga go na yo a swanago le wena.
O yo mogolo, le gona leina la gago ke le legolo e bile le bontšha matla a gago.
7 Wena Kgoši ya ditšhaba, ke mang a ka se kego a go boifa, ka gobane o swanelwa ke go hlomphiwa,
E bile gare ga batho ka moka ba bohlale ba ditšhaba le gare ga dikgoši tša tšona ka moka,
Ga go na yo a swanago le wena.
8 Ka moka ga tšona ke ditlaela, ga se tša hlalefa,
Thuto ya medimo ya diswantšho ga e na mohola.
9 Go tlišwa silifera yeo e bataladitšwego yeo e tšwago Tarashishi le gauta yeo e tšwago Ufatse,
Tšeo di dirilwego ke setsebi sa mošomo wa diatla, e lego motho yo a šomago ka tšhipi.
Diaparo tša medimo yeo di dirilwe ka garane e talalerata le wulu ya mmala o mophepolo.
Medimo yeo ka moka e dirilwe ke batho bao ba nago le bokgoni.
10 Eupša Jehofa yena ke Modimo wa nnete.
Ke Modimo yo a phelago le Kgoši ya go ya go ile.
Lefase le tla šikinyega ka baka la ge a galefile,
Gomme ga go na ditšhaba tšeo di tlago go kgotlelela ge a galefile.
11 Le swanetše go botša ditšhaba tšeo le re:
“Medimo yeo e sa kago ya dira magodimo le lefase,
Ke yona e tlago go fedišwa lefaseng le ka tlase ga magodimo.”
12 Ke yena a dirilego lefase ka matla a gagwe,
Yena yo a šomišitšego bohlale bja gagwe gore go be le naga yeo e enywago,
Le yo a šomišitšego kwešišo ya gagwe gore a phurolle magodimo.
13 Ge a bolela,
Meetse ao a lego magodimong a a huduega,
Gomme o dira gore maru a rotoge a etšwa moo lefase le felelago gona.
O direla pula legadima,
Gomme a bulela phefo moo a e bolokago gona.
14 Motho yo mongwe le yo mongwe o dira tša botlaela, e bile dilo tšeo a di dirago di bontšha gore ga a tsebe selo.
Motho yo mongwe le yo mongwe yo a šomago ka tšhipi o tla hlabišwa dihlong ka baka la seswantšho seo a se betlilego,
Ka gobane modimo wa gagwe wa seswantšho ke wa maaka,
Le gona ga o kgone go hema.
15 Ga e na mohola, e swanelwa ke go no kwerwa.
Ge letšatši la gore Modimo a e ahlole le fihla, e tla fedišwa.
16 Yo e lego bohwa bja Jakobo ga a swane le dilo tše,
Ka gobane ke yena a dirilego dilo ka moka,
Gomme Isiraele ke molamo wa bohwa bja gagwe.
Leina la gagwe ke Jehofa wa madira.
18 Jehofa o re:
“Ke nna yo mo nakong ye ke raka badudi mo nageng,
Gomme ke tla dira gore ba gateletšege.”
19 Ke wa madimabe ka ge ke gobetše!
Ntho ya ka ga e fole.
Nna ka re: “Ruri bjo ke bolwetši bja ka, gomme ke swanetše go bo kgotlelela.
20 Tente ya ka e sentšwe gomme dithapo ka moka tša tente ya ka di kgaotšwe.
Barwa ba ka ba ntlogetše, gomme ga ba sa le gona.
Ga go sa na yo a ka phurollago tente ya ka goba a tsoša diseila tša yona.
21 Badiši ba dirile tša botlaela,
Gomme ga se ba botšiša Jehofa.
Ke ka baka leo ba sa kago ba dira dilo ka temogo,
Gomme mehlape ya bona ka moka e gašantšwe.”
22 Theetšang! Ditaba tšeo le sa tšwago go di kwa ke tše:
Go tsogile tlhakatlhakano nageng ya ka leboa,
Gore metse ya Juda e dirwe lešope, wona molete wa diphukubje.
23 Ke tseba gabotse wena Jehofa, gore ga se gwa ithekga ka motho gore a ikgethele tsela yeo a swanetšego go phela ka yona,
E bile motho ga a kgone go laola bophelo bja gagwe.
24 Wena Jehofa, nkahlole kamoo o bonago go swanetše,
Eupša o se nkahlole o galefile, e le gore o se ke wa tla wa mphediša.
25 Galefela ditšhaba tšeo di se nago taba le wena,
Le merafo yeo e sa nyakego go tumiša leina la gago.
Ka gobane ditšhaba tšeo di hlasetše Jakobo,
Ruri di mo hlasetše, go fihla mo e lego gore di be di le kgauswi le go mo fediša,
E bile di dirile gore naga ya gagwe e be marope.