Psalme
Koša ya letšatši la Sabatha.
92 Ke mo gobotse go go leboga wena Jehofa,
Le go opela dikoša tša go reta leina la gago wena yo Godimodimo.
2 Ke mo gobotse go bolela ka lerato la gago le le botegago mesong,
Le go bolela ka go botega ga gago bošego bjo bongwe le bjo bongwe.
3 Ke go reta ke letša seletšo sa metato e lesome,
Le ka mmino wo o kwagalago wa harepa.
4 Wena Jehofa o dirile gore ke thabe ka baka la dilo tšeo o di dirilego.
Ke goelela ka lethabo ka baka la mediro ya diatla tša gago.
5 Mediro ya gago ke ye e kgahlišago kudu wena Jehofa!
Dikgopolo tša gago ke tše dikgolo kudu.
6 Motho yo a sa kwešišego selo a ka se di tsebe,
Le setlaela se ka se di kwešiše.
7 Le ge batho ba babe ba ka atlega go etša ge dimela di hloga,
Gomme bao ba dirago dilo tše mpe le bona ba atlega,
Mafelelong ba tla fedišetšwa sa ruri.
8 Eupša wena Jehofa o yo a phagamego go ya go ile.
9 Bona manaba a gago, hle Jehofa!
Ka nnete manaba a gago a tla fedišwa.
O tla dira gore batho ka moka bao ba dirago dilo tše mpe ba tšhabe gomme ba phatlalale le lefase.
10 Eupša wena o tla dira gore ke be le matla go swana le poo ya naga.
Ke tla tlotša letlalo la ka ka makhura a mabotse.
11 Ke tla bona ge manaba a ka a fenywa.
Ditsebe tša ka di tla kwa ka go fenywa ga manaba a ka ao a ntlhaselago.
12 Eupša baloki ba tla atlega go swana le mopalema woo o thunyago,
Gomme ba gola kudu go swana le mohlare wa motsedara wa kua Libanoni.
13 Ba swana le mehlare yeo e bjetšwego ntlong ya Jehofa.
Ba gola ba le ka ntlong ya Modimo wa rena.
14 Le ge ba tšofetše ba tla dula ba atlega.
Ba tla dula ba na le matla gomme ba phetše gabotse,
15 Ba tla dula ba bolela gore Jehofa o lokile.
Ke Leswika la ka, e bile o dula a dira dilo tša go loka.