Diema
2 Morwa wa ka, ge o ka amogela dilo tšeo ke di bolelago,
Gomme wa boloka ditaelo tša ka,
2 Wa dira gore tsebe ya gago e theetše dilo tše bohlale
Gomme wa tlwaetša pelo ya gago gore e kgone go kgethologanya dilo,
3 Le gona ge o ka kgopela Modimo gore a go fe kwešišo,
Wa ba wa mo kgopela ka pelo ya gago ka moka gore a go thuše go kgethologanya dilo,
4 Ge o ka dula o nyaka dilo tše tše e kego o nyaka silifera
Gomme wa dula o di epa bjalo ka ge eka o epa mahumo ao a utilwego,
5 Gona o tla kwešiša gore go boifa Jehofa go ra go reng.
Le gona o tla atlega ge o ithuta ka Modimo.
6 Ka gobane Jehofa o nea bohlale.
Dilo tšeo a di bolelago di dira gore batho ba be le tsebo le kwešišo.
8 O hlokometše maphelo a bao ba dirago dilo ka toka,
E bile o tla hlokomela maphelo a bao ba mmotegelago.
9 Ke moka wena o tla kwešiša se se lokilego le seo se nepagetšego.
O tla kwešiša tsela ye e nepagetšego yeo o swanetšego go sepela ka yona.
10 Ge pelo ya gago e thoma go rata bohlale,
Gomme wena o thoma go rata tsebo,
11 Gona o tla kgona go nagana gabotse gomme seo sa go hola.
Le gona, temogo e tla go šireletša
12 E le gore o se ke wa dira dilo tše mpe
Le gore o se ke wa arošwa ke motho yoo a bolelago maaka.
13 E bile o tla šireletšega go batho bao ba tlogetšego go dira dilo tše dibotse
Gomme ba dira tše mpe,
14 Bao ba thabišwago ke go dira dilo tše mpe,
E bile ba thabišwa le ke dilo tše mpe tša go tšwa tseleng,
15 Bao ba dirago dilo tša go tšwa tseleng
E bile ba sa tshepege.
16 Temogo e tla go šireletša go mosadi wa go hloka boitshwaro*
Le go mosadi yo a hlokago boitshwaro* yoo a goketšago batho ka mantšu a gagwe,
17 Yo a tlogelago mogwera* wa gagwe yo mogolo yoo a gweranego le yena go tloga bosweng,
Le go lebala kgwerano yeo a e dirilego le Modimo wa gagwe.
18 Ka gobane go ya ntlong ya gagwe go no swana le go hwa,
E bile tsela ya go ya ntlong ya gagwe e iša lebitleng.
19 Bohle bao ba ikgweranyago le yena ba ka se boe,
E bile ba ka se sa sepela ditseleng tša bao ba phelago.
20 Ka gona, dira dilo tšeo di dirwago ke batho ba go loka
Gomme o dule o dira dilo tšeo di lokilego.
21 Ka gobane bao ba lokilego ke bona feela bao ba tlago go dula mo lefaseng.
Le gona bao ba kwago Modimo dilong ka moka, ba tla šala mo go lona.
22 Ge e le ba babe, ba tla fedišwa lefaseng,
Gomme bao ba radiago ba bangwe, ba tla tlošwa go lona.