Puku ya Bobedi ya Dikgoši

17 Hoshea morwa wa Elaa e bile kgoši ya Isiraele a le kua Samaria ka ngwaga wa bo-12 wa ge Kgoši Ahasi wa Juda a buša, gomme o bušitše ka mengwaga e senyane. 2 O ile a dulela go dira dilo tše mpe pele ga Jehofa, eupša ga se a di dira go swana le dikgoši tša Isiraele tšeo di bilego gona pele ga gagwe. 3 Kgoši Shalamanesere ya Asiria o ile a tla a hlasela Hoshea, ke moka Hoshea yena a ba mohlanka wa gagwe gomme a thoma go mo patela lekgetho. 4 Eupša kgoši ya Asiria e ile ya kwa gore Hoshea o e logetše maanomabe, ka gobane o be a rometše molaetša go Kgoši So wa Egepeta gore a mo thuše e bile o be a sa patele kgoši ya Asiria lekgetho go swana le mengwageng e fetilego. Ka gona, kgoši ya Asiria e ile ya mo tlema gomme ya mo lahlela teronkong.

5 Kgoši ya Asiria e ile ya tla ya hlasela naga ka moka, ke moka ya ya Samaria gomme ya e dikanetša ka mengwaga e meraro. 6 Ka ngwaga wa bosenyane wa ge Hoshea a buša, kgoši ya Asiria e ile ya thopa Samaria ke moka ya iša Baisiraele bothopša kua Asiria, gomme ya ba dira gore ba dule Hala le Habora nokeng ya Gotsana gotee le metseng ya Bamede.

7 Se se diregile ka gobane Baisiraele ba be ba diretše Jehofa Modimo wa bona sebe, yena yoo a ba ntšhitšego nageng ya Egepeta ge Farao kgoši ya Egepeta a be a ba laola. Ba be ba hlankela medimo e mengwe, 8 ba dira dilo tšeo di bego di dirwa ke ditšhaba tšeo Jehofa a di rakilego pele ga bona, e bile ba latela melao yeo dikgoši tša Isiraele di bego di itiretše yona.

9 Baisiraele ba be ba dulela go dira dilo tšeo Jehofa Modimo wa bona a bego a di lebelela di sa loka. Ba be ba dulela go aga mafelo a phagamego ao go rapelwago go ona metseng ya bona ka moka, go tloga toreng yeo batho ba go leta motse ba bego ba ema go yona go ba go fihla ka motse* wo o šireleditšwego. 10 Ba dulela go itlhomelela diphilara tše kgethwa le dikota tše kgethwa mebotong ka moka e phagamego le ka tlase ga mehlare ka moka e metala. 11 Le gona ba dira dihlabelo tšeo di thuntšhago muši mafelong ka moka a phagamego ao go rapelwago go ona go swana le kamoo go ilego gwa dira ditšhaba tšeo Jehofa a ilego a di raka pele ga bona gore a di iše bothopša. Ba ile ba dulela go dira dilo tše mpe gore ba kgopiše Jehofa.

12 Ba ile ba tšwela pele ba hlankela medingwana yeo e šišimišago* yeo Jehofa a bego a ba boditše ka yona a re: “Le se ke la e hlankela!” 13 Jehofa a dula a lemoša Baisiraele le Bajuda a diriša baporofeta ba gagwe ka moka le batho ka moka bao ba kgonago go bona dipono, a re: “Tlogelang go dira dilo tše mpe! Phelang ka go dumelelana le melao ya ka le ditaelo tša ka go ya ka melao ka moka yeo ke e laetšego borakgolokhukhu ba lena le yeo ke le rometšego yona ke diriša bahlanka ba ka ba baporofeta.” 14 Eupša ga se ba ka ba theetša, e bile ba ile ba dula ba na le dihlogo tše thata* go swana le borakgolokhukhu ba bona bao ba bego ba sa bontšhe gore ba dumela go Jehofa Modimo wa bona. 15 Ba ile ba tlogela go latela melao ya gagwe le kgwerano ya gagwe yeo a bego a e dirile le borakgolokhukhu ba bona, ba ba ba tlogela go latela le dikgopotšo tša gagwe tšeo a bego a ba file tšona e le go ba lemoša. Ke moka ba tšwela pele ba latela medimo ya go se re selo gomme bona ka bobona ba šala ba se na mohola. Ba be ba ekiša dilo tšeo di bego di dirwa ke ditšhaba tšeo di bego di ba dikologile, tšona tšeo Jehofa a ilego a ba laela gore ba se ke ba di ekiša.

16 Ba be ba dulela go tlogela ditaelo ka moka tšeo Jehofa Modimo wa bona a bego a ba laetše tšona, gomme ba tšea tšhipi ba itirela medimo ya diswantšho ya dinamane tše pedi le kota e kgethwa, ba ba ba khunamela letšatši, ngwedi le dinaledi le go hlankela Baali. 17 Le gona ba ile ba dira dihlabelo ka barwa ba bona le barwedi ba bona.* Ba be ba dira dilo tša boloi e bile ba dira maleatlana, ba ba ba tšwela pele ba dira* dilo tše mpe pele ga Jehofa e le gore ba mo kgopiše.

18 Ka gona Jehofa a galefela Baisiraele kudu, moo a ilego a ba tloša pele ga gagwe. Ga se a ka a šia motho le o tee nageng ka ntle le ba moloko wa Juda feela.

19 Bajuda le bona ga se ba ka ba latela ditaelo tša Jehofa Modimo wa bona, ba ile ba dira dilo tšeo Baisiraele ba bego ba di dira. 20 Jehofa o ile a lahla Baisiraele ka moka* gomme a ba dira gore ba lewe ke dihlong, a ba a ba tlogela gore mahodu a ba hlasele go fihlela a ba raka pele ga gagwe. 21 O ile a dira gore Baisiraele ba se sa hlwa ba bušwa ke ba ntlo ya Dafida, gomme ba kgetha Jeroboama morwa wa Nebata gore e be kgoši, eupša Jeroboama a dira gore Baisiraele ba se sa hlankela Jehofa, a ba a ba diriša sebe se segolo. 22 Baisiraele ba ile ba dira dibe ka moka tšeo Jeroboama a di dirilego. Ga se ba tlogela go di dira 23 go fihlela Jehofa a tloša Baisiraele pele ga gagwe. Go ile gwa direga seo a ilego a se bolela a diriša bahlanka ba gagwe ka moka ba baporofeta. Ka gona Baisiraele ba ile ba tlošwa nageng ya bona gomme ba išwa bothopša Asiria moo ba lego gona go fihla le lehono.

24 Ke moka kgoši ya Asiria ya tliša batho ba go tšwa Babilona, Khutha, Afa, Hamathi le Sefarafaima gomme ya ba bea metseng ya Samaria gore ba dule go yona go e na le gore go dule Baisiraele. Ba tšea Samaria ya ba ya bona gomme ba dula metseng ya yona. 25 Ge ba be ba sa thoma go dula moo, ba be ba sa boife Jehofa. Ka gona Jehofa a romela ditau gare ga bona tša bolaya ba bangwe ba batho bao. 26 Kgoši ya Asiria ya hwetša molaetša wa go re: “Ditšhaba tše o di thopilego wa di bea metseng ya Samaria ga di tsebe gore Modimo wa nageng yeo o rapelwa bjang. Ke ka baka leo a dulago a romela ditau go bona, gomme ditau tšeo di a ba bolaya ka gobane ga go le o tee wa bona yo a tsebago gore Modimo wa nageng yeo o rapelwa bjang.”

27 Ge kgoši ya Asiria e ekwa seo ya re: “Eyang le yo tšea yo mongwe wa baperisita bao le ba thopilego le mmušetše Samaria gore a yo dula moo, e le gore a kgone go ba ruta gore Modimo wa nageng yeo o rapelwa bjang.” 28 Ka gona yo mongwe wa baperisita bao ba bego ba tšerwe Samaria ba išwa bothopša, a boa a tla a dula Bethele, ke moka a thoma go ba ruta kamoo ba ka hlankelago Jehofa ka gona.

29 Lega go le bjalo, setšhaba se sengwe le se sengwe se ile sa itirela medingwana ya sona, gomme sa e bea dintlong tša borapedi tšeo Basamaria ba bego ba di dirile mafelong a phagamego ao go rapelwago go ona. Setšhaba se sengwe le se sengwe se ile sa dira bjalo motseng woo se bego se dula go ona. 30 Ka gona, setšhaba sa Babilona sa dira modingwana yo a bitšwago Sukothe-benothe, setšhaba sa Khutha sona sa dira modingwana yo a bitšwago Neregala gomme setšhaba sa Hamathi sona sa dira modingwana yo a bitšwago Ashima, 31 Baafa bona ba dira modingwana yo a bitšwago Nibihatse le yo a bitšwago Tharathake. Basefarafaima bona ba be ba fiša barwa ba bona mollong, ba ba fišetša modingwana yo a bitšwago Adirameleke le yo a bitšwago Anameleke, yona medingwana ya Sefarafaima. 32 Le ge ba be ba hlankela Jehofa, ba ile ba ikgethela baperisita go tšwa go batho feela gore ba hlankele mafelong a phagamego. Baperisita bao ba ile ba ba hlankela ba le dintlong tšeo go rapelwago medingwana go tšona mafelong ao go rapelwago go ona. 33 Ka gona, ba be ba hlankela Jehofa, eupša ba rapela le medingwana ya bona go ya ka bodumedi bja ditšhaba tšeo di bego di ba išitše bothopša.

34 Ba sa dutše ba latela mekgwa ya bodumedi bja bona bja nakong e fetilego. Ga go le yo a hlankelago Jehofa e bile ga go yo a latelago melao ya gagwe, dikahlolo tša gagwe, Molao le ditaelo tšeo Jehofa a di filego barwa ba Jakobo, yoo a ilego a fetoša leina la gagwe a re ke Isiraele. 35 Ge Jehofa a be a dira kgwerano le bona o ile a ba laela a re: “Le se ke la rapela medingwana e mengwe e bile le se ke la e khunamela goba la e hlankela goba la e direla dihlabelo. 36 Eupša le swanetše go hlankela Jehofa yoo a le ntšhitšego nageng ya Egepeta ka matla a magolo le ka seatla sa gagwe se matla.* E bile le swanetše go khunamela yena le go mo direla dihlabelo. 37 Le dule le ekwa melao ya gagwe, dikahlolo tša gagwe, Molao wa gagwe le ditaelo tša gagwe tšeo a le ngwaletšego tšona, le gona le se ke la hlankela medingwana e mengwe. 38 Le se ke la lebala kgwerano yeo ke e dirilego le lena e bile le se ke la hlankela medingwana e mengwe. 39 Eupša le hlankele Jehofa Modimo wa lena, ka ge e le yena yoo a tlago go le phološa go manaba a lena ka moka.”

40 Eupša ditšhaba tše ga se tša ka tša theetša, le gona di ile tša dira dilo go ya ka bodumedi bja tšona bja pele. 41 Ka gona di ile tša thoma go rapela Jehofa, eupša di be di sa dutše di hlankela le diswantšho tša tšona tšeo di betlilwego. Bana ba ditšhaba tšeo le ditlogolo tša tšona, ba be ba dutše ba dira dilo go ya le kamoo borakgolokhukhu ba bona ba di dirilego go ba go fihla le lehono.