Puku ya Bobedi ya Dikoronika
36 Ke moka setšhaba sa nageng yeo sa tšea Jehoahase morwa wa Josia gomme sa mmea gore e be kgoši Jerusalema legatong la tatagwe. 2 Jehoahase o be a na le mengwaga e 23 ge a eba kgoši, gomme o bušitše Jerusalema ka dikgwedi tše tharo. 3 Eupša kgoši ya Egepeta e ile ya mo tloša gore e se sa ba kgoši Jerusalema, ya laela gore batho ba naga yeo ba ntšhe silifera yeo e imelago dikhilokgerama tše 3 420 (dikete tše tharo makgolonne-masomepedi) le gauta yeo e imelago dikhilokgerema tše 34.* 4 Go oketša moo kgoši ya Egepeta e ile ya dira Eliakima ngwanabo Jehoahase gore e be kgoši ya Juda le Jerusalema gomme ya fetoša leina la gagwe gore e be Jehoyakima. Eupša Neko o ile a tšea Jehoahase a mo iša Egepeta.
5 Jehoyakima o be a na le mengwaga e 25 ge a eba kgoši, gomme o bušitše Jerusalema ka mengwaga e 11. O ile a tšwela pele a dira dilo tše mpe pele ga Jehofa Modimo wa gagwe. 6 Kgoši Nebukadinetsara wa Babilona o ile a tla a mo hlasela gore a kgone go mo tlema ka diketane tše pedi tša koporo, e le gore a mo iše Babilona. 7 Ebile Nebukadinetsara o ile a tšea tše dingwe tša dibjana tša ntlong ya Jehofa a di iša Babilona ke moka a di bea mošate wa gagwe. 8 Ditaba ka moka tša Jehoyakima, dilo ka moka tšeo di šišimišago tšeo a di dirilego le dilo ka moka tše mpe tšeo go hweditšwego gore o di dirile, di ngwadilwe ka Pukung ya Dikgoši tša Isiraele le tša Juda, gomme morwa wa gagwe Jehoyakini o ile a ba kgoši legatong la gagwe.
9 Jehoyakini o be a na le mengwaga e 18 ge a eba kgoši, gomme o bušitše Jerusalema ka dikgwedi tše tharo le matšatši a lesome. Ebile o ile a tšwela pele a dira dilo tše mpe pele ga Jehofa. 10 Ge ngwaga o thoma,* Kgoši Nebukadinetsara o ile a romela molaetša wa gore Jehoyakini a tlišwe Babilona le dilo tše bohlokwa tša ntlong ya Jehofa. Ke moka Nebukadinetsara a dira gore Tsedekia, e lego ngwanabo tatago Jehoyakini e be kgoši ya Juda le Jerusalema.
11 Tsedekia o be a na le mengwaga e 21 ge a eba kgoši, gomme o bušitše Jerusalema ka mengwaga e 11. 12 O ile a tšwela pele a dira dilo tše mpe pele ga Jehofa Modimo wa gagwe. Le gona ga se a ikokobeletša moporofeta Jeremia yoo a bego a bolela molaetša woo o tšwago go Jehofa. 13 O ile a hlanogela Kgoši Nebukadinetsara yo a bego a mo enišitše ka Modimo. O ile a thatafiša hlogo ya gagwe, a ngangabala a ba a gana go boela go Jehofa Modimo wa Isiraele. 14 Baetapele ka moka ba baperisita le setšhaba ka moka ba ile ba tšwela pele ba sa botegele Modimo, ebile ba dira dilo ka moka tšeo di šišimišago tšeo di dirwago ke ditšhaba tše dingwe, le gona ba ile ba šilafatša ntlo ya Jehofa yeo a bego a e kgethagaditše Jerusalema.
15 Jehofa Modimo wa borakgolokhukhu ba bona o ile a tšwela pele a ba lemoša a diriša baromiwa ba gagwe. O ile a dulela go ba lemoša ka gobane o be a kwela batho ba gagwe bohloko ebile a sa nyake gore tempele ya gagwe e fedišwe. 16 Eupša ba ile ba tšwela pele ba kwera baromiwa ba Modimo wa nnete, ba nyatša seo a se boletšego ebile ba kwera baporofeta ba gagwe. Ba ile ba dira dilo tše go fihlela Jehofa a ba galefela le go fihlela go se sa na motho yo a ka ba phološago.
17 Ka gona Modimo o ile a dira gore kgoši ya Bakaladea e tle e ba hlasele, ke moka ya bolaya masogana a bona ka sabola ka sekgethweng sa bona. Kgoši yeo e be e bolaya lesogana, kgarebe, motšofadi goba motho yo a babjago, e be e sa ba kwele bohloko. Modimo o ile a e dumelela gore e dire dilo tše ka moka. 18 E ile ya tšea dibjana ka moka tša ntlong ya Modimo wa nnete, tše dikgolo le tše dinyenyane, gotee le mahumo ka moka ao a lego ntlong ya Jehofa le mahumo a kgoši le a baetapele bao e ba kgethilego. E ile ya tšea dilo ka moka ya di tliša Babilona. 19 E ile ya tšhuma ntlo ya Modimo wa nnete, ya wiša leboto la Jerusalema, ya tšhuma le ditora tša yona ka moka tšeo di šireleditšwego gomme ya senya dilo ka moka tše bohlokwa. 20 Batho bao ba bego ba se ba bolawa ka sabola e ile ya ba iša bothopša Babilona. Ba ile ba ba bahlanka ba yona le ba barwa ba yona go fihlela ge mmušo wa Peresia o thoma go buša, 21 e le go phethagatša mantšu ao Jehofa a a boletšego a diriša Jeremia, go fihlela ge naga e khuditše ka disabatha ka moka tšeo e bego e se ya khutša ka tšona. Ge naga e be e le lešope e ile ya khutša* go fihlela ge mengwa e 70 e fedile.
22 Ngwageng wa mathomo wa ge go buša Kgoši Korese wa Peresia, Jehofa o ile a dira gore seo a ilego a se bolela a diriša Jeremia se phethege. Ka gona Jehofa o ile a dira gore Kgoši Korese a tsebiše batho ka moka mmušong wa gagwe molaetša woo, a be a o ngwale. Molaetša woo o be o re: 23 “Kgoši Korese wa Peresia o re: ‘Jehofa Modimo wa magodimong o mphile mebušo ka moka ya lefaseng, le gona o ntaetše gore ke mo agele ntlo Jerusalema, yeo e lego Juda. Anke mang le mang mo go lena, yo e lego wa setšhaba sa gagwe, a ye Jerusalema gomme Jehofa Modimo wa gagwe a be le yena.’”