Psalme
PUKU YA BONE
(Dipsalme 90–106)
Thapelo ya Moshe, yoo e lego monna wa Modimo wa nnete.
90 Wena Jehofa, o be o dutše o le lefelo leo re tšhabelago go lona,
O be o dutše o le gona pele ga ge dithaba di ka ba gona,
2 Le pele o bopa lefase, le dilo ka moka tšeo di lego go lona.
O Modimo yo a se nago mathomo le yo a se nago mafelelo.
3 O dira gore motho a boele leroleng,
Le gona o re: “Lena batho, boelang leroleng.”
4 Gobane mengwaga e 1 000 (sekete) go wena e bjalo ka letšatši letee leo le fetago ka lebelo,
Le swana le diiri tše sego kae.*
5 O dira gore ba nyamelele bjalo ka toro,
Mesong ba ba bjalo ka bjang bjo bo hlogago.
6 Mesong bo a hloga gomme bja fetoga,
Eupša mantšiboa bo a pona gomme bja oma.
7 Re fedišitšwe ka baka la bogale bja gago,
Gomme ra tšhošwa ke pefelo ya gago.
8 O bona diphošo tša rena,
E bile o kgona go bona dilo tšeo re di dirago ka sephiring.
9 Ga re phele nako e telele ka gobane o re galefetše.
Re hwa ka pela go swana le mohemo wo o hwelelago ka pela.
10 Re phela mengwaga e 70
Goba e 80 ge e ba motho a na le matla.
Eupša mengwaga yeo e tletše ka mathata le ditlaišego,
E feta ka pela gomme ra hlokofala.
11 Ke mang yo a ka tsebago gore wena o galefa go fihla kae?
Bogale bja gago ke bjo bogolo go swana le tsela yeo re swanetšego go go hlompha ka yona.
13 Hle Jehofa, re bontšhe botho gape. O tla dula o galefile go fihlela neng?
Kwela bahlanka ba gago bohloko.
14 Re bontšhe lerato la gago le le botegago mesong,
E le gore re go opelele re thabile bophelo bja rena ka moka.
15 Dira gore matšatši a rena a go thaba a lekane le ao o re hlakišitšego ka ona,
O dire gore matšatši ao a lekane le mengwaga yeo re e feditšego re hlaka.
16 Anke bahlanka ba gago ba bone dilo tšeo o di dirago,
Gomme barwa ba bona ba bone matla a gago a magolo.
17 Eka Jehofa Modimo wa rena a ka re šegofatša,
Eka a ka dira gore dilo tšeo re di dirago di atlege.
Ruri anke a dire gore dilo tšeo re di dirago di atlege.