Lengwalo la Boraro la Johane

1 Nna mokgalabje ke ngwalela Gayo, yo ke mo ratago ka pelo ka moka.

2 Ngwanešo yo a rategago, ke rapela gore o phele gabotse le gore dilo di dule di go sepelela gabotse. 3 Ke ile ka thaba kudu ge ba bangwe ba bana babo rena ba etla gomme ba mpotša gore o sa sepela nneteng. 4 Ga go na selo seo se nthabišago kudu go feta go kwa gore bana ba ka ba sa phela ka go dumelelana le dithuto tša nnete.

5 Ngwanešo yo a rategago, o bontšha gore o a tshepega ka go thuša bana babo rena le ge o sa ba tsebe. 6 Ba boditše phuthego ka lerato la gago. Ka morago ge ba tlo sepela, dira sohle seo o ka se kgonago go ba thuša ka tsela yeo e tlago go kgahliša Modimo. 7 Ka gobane ba ile ba yo botša batho ka leina la Modimo, ba se tšee selo bathong ba ditšhaba. 8 Ka gona re swanetše go amogela batho bao, e le gore re tle re šome gotee ge re phatlalatša nnete.

9 Ke ngwaletše phuthego lengwalo, eupša Dioterefe yo a ratago go ba maemong a pele gare ga lena, ga a hlomphe selo le ge e le sefe seo re se bolelago. 10 Ke ka baka leo ge ke etla go lena ke tlago go le botša dilo tšeo a di dirago, tše bjalo ka go bolela ka rena gampe. Le gona ka ge se se sa mo kgotsofatše, ga a hlomphe e bile o gana go amogela bana babo rena, gomme bao ba nyakago go ba amogela o leka go ba thibela le go ba raka ka phuthegong.

11 Ngwanešo yo a rategago, ekiša batho bao ba dirago dilo tše dibotse, e sego bao ba dirago dilo tše mpe. Yo a dirago dilo tše dibotse ke ngwana wa Modimo. Eupša yo a dirago dilo tše mpe, ga se a tšwa a tseba Modimo. 12 Demetrio o boletšwe gabotse ke bana babo rena ka moka, gomme dipego tše di hlatselwa ke gore o phela ka go dumelelana le seo Modimo a rego ke nnete. Le rena re dumelelana le seo, e bile le a tseba gore re dula re bolela nnete.

13 Ke na le dilo tše dintši tšeo nka ratago go go ngwalela tšona, fela ga ke nyake go tšwela pele ke di ngwala ka pene le enke. 14 Eupša ke tshepa gore kgauswinyane ke tla go bona, gomme ra boledišana re lebantše difahlego.

Anke Modimo a go nee khutšo.

Bana babo rena le dikgaetšedi ba mo ba a go dumediša. Ntumedišetše bana babo rena le dikgaetšedi ba moo ka maina.