Numeri

14 Ke moka setšhaba ka moka sa hlaboša mantšu a sona, sa goeletša sa lala se lla bošegong bjoo ka moka. 2 Baisiraele ka moka ba thoma go ngongoregela Moshe le Arone gomme ba bolela gampe ka bona ba re: “Go kaone ge nkabe re ile ra hwela Egepeta goba ra no hwela mo lešokeng le! 3 Ke ka baka la’ng Jehofa a re tlišitše nageng ye? Re tlo bolawa ka tšhoša. Manaba a rena a tlo tšea basadi ba rena le bana ba rena. Na ga go kaone gore re boele Egepeta?” 4 Le gona batho ba be ba botšana ba re: “A re ikgetheleng moetapele, re boeleng Egepeta!”

5 Ka gona Moshe le Arone ba wela fase ka difahlego pele ga setšhaba ka moka sa Baisiraele. 6 Joshua morwa wa Nuni le Kalebe morwa wa Jefune, e lego ba bangwe ba bao ba tšwago go hlola naga, ba kgeila diaparo tša bona. 7 Ba botša setšhaba ka moka sa Baisiraele ba re: “Naga yeo re tšwago go e hlola e botse kudu. 8 Ge e ba Jehofa a re amogela, gona o tla re iša nageng yeo a ba a re nea yona, e lego naga yeo e elago maswi le todi ya dinose. 9 Eupša le se ke la hlanogela Jehofa, le gona le se ke la tšhaba batho ba naga yeo ka gobane re tlo no ba fenya gabonolo. Ga go sa na yo a ba šireletšago, eupša Jehofa o na le rena. Le se ke la ba tšhaba.”

10 Setšhaba ka moka se ile sa re: “A re ba kgatleng ka maswika.” Eupša Baisiraele ka moka ba ile ba bona seetša sa letago la Jehofa taberenakeleng.

11 Ke moka Jehofa a re go Moshe: “Setšhaba se se tlo tlogela neng go nnyatša, le gona se tlo tlogela neng go se be le tumelo go nna le ge se bone mehlolo* ka moka yeo ke se bontšhitšego yona? 12 E re ke se otle ka leuba la bolwetši e bile ke se rake, gomme wena ke go dire setšhaba se segolo kudu le seo se se fetago ka matla.”

13 Eupša Moshe a re go Jehofa: “Baegepeta bao o ntšhitšego setšhaba se gare ga bona o diriša matla a gago ba tla kwa ka taba ye, 14 gomme ba tla botša badudi ba naga yeo ka yona. Badudi ba naga ye ba kwele gore wena Jehofa o gare ga setšhaba se, le gore o iponagaditše go sona le lebantše difahlego. Wena Jehofa, leru la gago le ka godimo ga setšhaba se, e bile o se eta pele ka leru mosegare gomme bošego o se eta pele ka mollo. 15 Ge e ba o ka bolaya setšhaba se ka moka ka nako e tee, gona ditšhaba tšeo di kwelego ka wena di tla re: 16 ‘Ka ge Jehofa a paletšwe ke go fihliša setšhaba se nageng yeo a se tshepišitšego yona, o se bolaetše lešokeng.’ 17 Bjale hle Jehofa, bontšha gore matla a gago ke a magolo, bjalo ka ge o ile wa bolela wa re: 18 ‘Jehofa yo a sa galefego kapela, yo a nago le lerato le legolo,* yo a lebalelago bao ba dirago diphošo le dibe, a ka se lese go otla yo a dirilego phošo, eupša o tla otla bana, ditlogolo le ditlogolokhukhu ka baka la diphošo tša botatago bona.’ 19 Hle lebalela setšhaba se molato wa sona bjalo ka ge o ile wa se lebalela go tloga Egepeta go fihla gona bjale, ka gobane o na le lerato le legolo.”

20 Ke moka Jehofa a re: “Ke a se lebalela go ya kamoo o kgopetšego ka gona. 21 Le gona, nna Jehofa ke ikana ka bophelo bja ka gore lefase ka moka le tla tlala letago la ka. 22 Eupša batho ka moka bao ba bonego letago la ka le mehlolo yeo ke e dirilego kua Egepeta le lešokeng, fela ba no tšwela pele ba nteka gantšhintšhi e bile ba se ntheetše, 23 ba ka se tsoge ba bone naga yeo ke e tshepišitšego botatago bona. Ke re batho ka moka bao ba nnyatšago ba ka se e bone. 24 Eupša ka ge Kalebe mohlanka wa ka yena a be a sa swane le bona, e bile a ile a dula a nkwa ka pelo ka moka, ke tla mo tsenya nageng yeo a ilego a ya go yona, le gona bana ba gagwe ba tla e tšea ya ba ya bona. 25 Ka ge Baamaleke le Bakanana ba dula moeding, gona gosasa le boeleng morago le ye lešokeng le sepela ka tsela yeo e yago Lewatleng le Lehwibidu.”

26 Ke moka Jehofa a bolela le Moshe le Arone a re: 27 “Setšhaba se sa go dira dilo tše mpe se tla ngongorega ka nna go fihlela neng? Ke kwele ge Baisiraele ba be ba ngongorega ka nna. 28 Ba botše o re: ‘Jehofa o re: “Ke ikana ka bophelo bja ka gore ke tla le dira sona seo ke le kwelego le se bolela! 29 Ditopo tša lena di tla wela lešokeng le, lena bao le bego le ngongorega ka nna. Ka moka bao ba ngwadišitšwego mo go lena go tloga ka ba mengwaga e 20 go ya godimo. 30 Ga go le o tee wa lena yo a tlago go tsena nageng yeo ke ikannego gore le tla dula go yona. Go tla tsena feela Kalebe morwa wa Jefune le Joshua morwa wa Nuni.

31 “‘“Bana ba lena bao le itšego ba tlo tšewa ke manaba, ke tla ba iša nageng yeo gomme ba tla tseba naga yeo lena le e gannego. 32 Eupša lena le tla hwela mo lešokeng le. 33 Bjale bana ba lena e tla ba badiši mo lešokeng ka mengwaga e 40, gomme ba tla ikarabela ka baka la go se botege ga lena go fihlela wa mafelelo wa lena a hwetše mo lešokeng. 34 Le feditše matšatši a 40 le hlola naga, bjale le tlo ikarabela ka melato ya lena ka mengwaga e 40. Letšatši letee le emela ngwaga o tee. Ka gona le tla bona gore mafelelo a go ntlhanogela ke afe.

35 “‘“Nna Jehofa ke boletše gore setšhaba se seo se dirago dilo tše mpe le seo se ipopilego ngatana e tee gore se lwe le nna, se tlo felela mo lešokeng, sa hwela gona mo. 36 Banna bao Moshe a bego a ba romile go yo hlola naga, bao ba rilego ge ba boa ba tliša pego e mpe ka naga yeo, gomme ba dira gore setšhaba ka moka se ngongorege ka Moshe, 37 e lego bona banna bao ba tlišitšego pego e mpe ka naga yeo, ba tla otlwa ba hwela pele ga ka nna Jehofa. 38 Eupša go banna bao ba bego ba ile go hlola naga, Joshua morwa wa Nuni le Kalebe morwa wa Jefune ke bona ba tla tšwelago pele ba phela.”’”

39 Ge Moshe a be a botša setšhaba ka moka sa Baisiraele ditaba tše, ba ile ba lla kudu. 40 Le gona ba tsoga ka masa ba leka go rotogela godimo ga thaba, ba re: “Ke rena ba, re itokišeleditše go ya lefelong leo Jehofa a boletšego ka lona ka gobane re dirile sebe.” 41 Eupša Moshe a re: “Go re’ng le tshela taelo ya Jehofa? Seo le nyakago go se dira le ka se se kgone. 42 Le se ke la rotogela moo thabeng ka gobane Jehofa ga a na le lena, le gona manaba a lena a tlo le fenya. 43 Ka gobane Baamaleke le Bakanana ba itokišeleditše go lwa le lena e bile ba tlo le bolaya ka tšhoša, ka gobane le tlogetše go theetša Jehofa gomme Jehofa a ka se tšwele pele a na le lena.”

44 Eupša ba ile ba gapeletša go rotogela thabeng, fela areka ya Jehofa ya kgwerano ya se tloge ditenteng, le Moshe a se tloge. 45 Ke moka Baamaleke le Bakanana bao ba bego ba dula thabeng yeo ba ile ba theoga ba ba hlasela, gomme ba ba phatlalatša go fihla Horoma.