Doiteronomio

31 Ke moka Moshe a ya go Baisiraele ka moka a bolela le bona 2 a re: “Lehono ke na le mengwaga e 120 (lekgolo-masomepedi). Nka se sa dumelelwa go le eta pele, ka gobane Jehofa o itše go nna: ‘O ka se tshele Noka ye ya Jorodane.’ 3 Jehofa Modimo wa lena ke yena a tlago go le eta pele ge le tshela Noka ya Jorodane. Ke yena a tlago go fediša ditšhaba tše di lego nageng yeo le yago go yona gomme lena le tla di raka. Joshua ke yena a tlago go le eta pele ge le tshela Noka ya Jorodane, feela bjalo ka ge Jehofa a boletše. 4 Jehofa o tla fediša ditšhaba tšeo go swana le ge a ile a fediša Sihoni le Ogo, e lego dikgoši tša Baamore, gotee le naga ya bona. 5 Jehofa o tla dira gore le di fenye, gomme lena le di dire go ya ka dilo ka moka tšeo ke le laetšego tšona. 6 Ebang le sebete gomme le tie matla. Le se ke la di tšhaba goba la di tšhoga, ka gobane Jehofa Modimo wa lena ke yena a sepelago le lena.* A ka se le lahle goba a le tlogela.”

7 Ke moka Moshe a bitša Joshua a bolela le yena pele ga Baisiraele ka moka a re: “Eba le sebete gomme o tie matla, ka gobane ke wena o tlago go iša batho ba setšhaba se nageng yeo Jehofa a enetšego borakgolokhukhu ba bona gore o tla ba nea yona, wena o tla ba nea yona e le bohwa. 8 Jehofa ke yena a tlago go sepela a le etile pele, e bile o tla dula a na le lena. A ka se le lahle goba a le tlogela. Le se ke la boifa goba la tšhoga.”

9 Ke moka Moshe a ngwala Molao wo a o nea baperisita, e lego Balefi bao ba rwalago areka ya kgwerano ya Jehofa, gomme a o nea le banna ka moka ba bagolo ba Isiraele. 10 Moshe a ba laela a re: “Mafelelong a mengwaga e mengwe le e mengwe e šupago, ka nako e beilwego ya ngwaga wa go phumola melato ya bao ba le kolotago, e lego nakong ya Monyanya wa Mešaša, 11 ge Baisiraele ka moka ba tlile pele ga Jehofa Modimo wa lena lefelong leo a tlago go le kgetha, lena le baleng Molao wo pele ga Baisiraele ka moka gore ba o kwe. 12 Kgoboketšang setšhaba, e lego banna, basadi, bana le batho bao e sego Baisiraele bao ba dulago metseng ya lena, e le gore ba theetše le go ithuta ka Jehofa Modimo wa lena le go mmoifa, gore ba latele mantšu ka moka a Molao wo. 13 Ke moka bana ba bona bao ba bego ba sa tsebe Molao wo, ba tla theetša gomme ba ithuta go boifa Jehofa Modimo wa lena nakong ka moka ya ge le phela nageng yeo le tshelago Noka ya Jorodane gore le yo e tšea e be ya lena.”

14 Ka morago ga moo Jehofa a re go Moshe: “Tseba gore nako ya gore o hwe e batametše. Bitša Joshua gomme le ye taberenakeleng gore ke mo kgethe gore e be moetapele.” Ka gona Moshe le Joshua ba ya taberenakeleng. 15 Ke moka Jehofa a iponagatša taberenakeleng a le lerung gomme leru leo la ema kgauswi le mojako wa taberenakele.

16 Bjale Jehofa a re go Moshe: “Tseba gore o kgauswi le go hwa, gomme batho ba setšhaba se ba ka se sa mpotegela e bile ba tla thoma go rapela medimo ya ditšhaba tše dingwe nageng yeo ba yago go yona. Ba tla ntlogela ba ba ba se sa botegela kgwerano ya ka yeo ke e dirilego le bona. 17 Ka nako yeo ke tla ba galefela kudu, ka ba tlogela e bile ka se ba thuše* go fihlela ba fedišitšwe. Ke moka ka morago ga gore ba welwe ke mathata le dilo tše dintšhi tše mpe, ba tla re: ‘Dilo tše di re diragalela ka gobane Modimo wa rena ga a sa na le rena.’ 18 Eupša letšatšing leo nka se ba thuše ka baka la dilo ka moka tše mpe tšeo ba di dirilego, ka gobane ba ntlogetše gomme ba hlankela medimo e mengwe.

19 Modimo a bolela le Moshe le Joshua a re: “Bjale ingwaleleng koša ye gomme le e rute Baisiraele. Le ba rute koša ye gore e tle e ba gopotše seo se diregago ge e ba ba sa nkwe. 20 Ge ke dira gore ba fihle nageng yeo ke enetšego borakgolokhukhu ba bona gore ke tla ba nea yona, e lego naga yeo e elago maswi le todi ya dinose, ba eja ba khora gomme dilo di ba sepelela gabotse, ba tla thoma go rapela medimo e mengwe, ba se sa ntlhompha e bile ba se sa botegela kgwerano ya ka. 21 Ge ba wetšwe ke mathata le dilo tše dintšhi tše mpe, koša ye e tla ba gopotša seo se diregago ge ba sa nkwe, ka gobane ke šetše ke tseba tsela yeo ba naganago ka yona le pele ke ba iša nageng yeo ke ba enetšego gore ke tla ba nea yona. Le ditlogolo tša bona ga se tša swanela go lebala koša ye.”

22 Ka gona Moshe a ngwala koša ye lona letšatšing leo gomme a e ruta Baisiraele.

23 Ke moka a kgetha Joshua morwa wa Nuni gore e be moetapele, gomme a re go yena: “Eba le sebete gomme o tie matla, ka gobane ke wena o tlago go iša Baisiraele nageng yeo ke ennego gore ke tlo ba nea yona, gomme nna ke tla dula ke na le wena.”

24 Ya re ge Moshe a feditše go ngwala mantšu ka moka a Molao wo ka pukung, 25 a laela Balefi bao ba rwalago areka ya kgwerano ya Jehofa, a re: 26 “Tšeang puku ye ya Molao, gomme le e bee ka thoko ga areka ya kgwerano ya Jehofa Modimo wa lena gomme e tla ba bjalo ka bohlatse bja go le ahlola. 27 Ka gobane ke tseba gabotse gore setšhaba se ga se kwe e bile se na le dihlogo tše thata. Ge e ba se sa kwe Jehofa ke sa phela, ge ke hwile gona go tlo ba bjang? 28 Kgoboketšang banna ka moka ba bagolo ba meloko ya lena le baetapele ba lena gomme ke bolele le bona ba ntheeditše, e bile ke tšea bohle legodimong le lefaseng e le dihlatse tša ka. 29 Ka gobane ke a tseba gore ka morago ga ge ke hwile le tlo dira dilo tše mpe, gomme la tlogela go dira dilo tšeo ke le boditšego tšona. Nakong e tlago le tlo welwa ke mathata ka gobane le tlo dira dilo tše mpe pele ga Jehofa, e bile le tlo mo nyamiša ka dilo tšeo le di dirago ka diatla tša lena.”

30 Ke moka Moshe a botša Baisiraele ka moka mantšu a koša ye go tloga mathomong go fihla mafelelong, a re: