Jobo

 2 “Hle o se ke wa mphelela pelo ge ke hlalosa,

Ka gobane go sa na le dilo tšeo ke swanetšego go di bolela legatong la Modimo.

 3 Ke tla bolela ka mo go tseneletšego ka seo ke se tsebago,

Le gona, ke tla bontšha gore Mmopi wa ka o lokile.

 4 Ruri ga ke bolele maaka,

Dilo tšeo ke di bolelago, di tšwa go yo a tsebago dilo ka moka.

 5 Ka nnete Modimo o na le matla gomme ga a gane motho.

O kwešiša kudu.

 6 A ka se dumelele gore batho ba babe ba tšwele pele ba phela,

Eupša bao ba hlakago o ba ahlola ka toka.

 7 Modimo o dula a lebeletše batho bao ba lokilego,

O ba bea gore e be dikgoši gomme ba hlomphiwa go ya go ile.

 8 Eupša ge e ba ba tlengwa ka diketane,

E bile ba ekwa bohloko ka ge ba tlemilwe ka dithapo,

 9 Gona o tla ba botša dilo tšeo ba di dirilego,

A ba botša le diphošo tšeo ba di dirilego ka ge ba ikgantšha.

10 O bula ditsebe tša bona gore ba kwe ge a ba phošolla,

E bile o ba botša gore ba tlogele go dira dilo tše mpe.

11 Ge e ba ba mo kwa gomme ba mo hlankela,

Ba tla dula ba ipshina ka bophelo,

Gomme bophelo bja bona bo tla ba bose.

12 Eupša ge e ba ba sa mo kwe ba tla fedišwa ka sabola,

E bile ba tla hwa ba sa tsebe selo.

14 Ba fetša bophelo bja bona ka moka ba phela le bagweba-ka-mmele ba banna ba tempeleng,

Gomme ba hwa e sa le ba baswa.

15 Eupša Modimo o thuša bao ba hlakago ge ba le mathateng,

O dira gore ba mo kwe ge ba gateletšwe.

16 Modimo o go ntšha mathateng a gago,

A go iša lefelong leo le šireletšegilego leo le se nago mathata,

A go homotša ka go go beela dijo tše monate tafoleng ya gago.

17 O tla thabišwa ke kahlolo yeo Modimo a tlago go ahlola batho ba babe ka yona,

Ge a ba ahlola e bile a dira gore go be le toka.

18 Eupša o hlokomele gore kgalefo ya gago e se ke ya dira gore o re kwere,

Le gona o se ke wa dumelela pipamolomo e go ntšha tseleng.

19 Ge o llela thušo goba o šoma ka thata,

Na seo se tla dira gore o se sa ba le mathata?

20 O se ke wa duma gore e be bošego,

Ge batho ba nyamelela kapejana.

21 O itlhokomele gore o se ke wa dira dilo tše mpe,

Ka gobane o lapišišwe ke go kgotlelela mathata.

22 Modimo o na le matla a magolo kudu,

Na go na le mohlahli wa go swana le yena?

23 Ke mang yo a kilego a botša Modimo gore a dire eng,

Goba a re go yena: ‘O dirile selo seo se sa lokago’?

24 Gopola gore o swanetše go reta mediro ya gagwe,

Yeo batho ba opetšego ka yona.

25 Batho ka moka ba bone mediro ya gagwe,

Motho wa nama le madi yena o e bone a le kgole.

26 Modimo ke yo mogolo kudu go feta kamoo re kwešišago ka gona,

Ga go na motho yo a ka kgonago go bala mengwaga ya gagwe.

27 Modimo o dira gore marothi a meetse a moyafale,

A ye godimo gomme a fetoge maru.

28 Maru ao a neša pula,

Gomme batho ka moka ba hwetša meetse.

29 Ke mang a ka kwešišago gore maru a dirilwe bjang,

Le yo a ka kwešišago medumo yeo e tšwago moo Modimo a dulago gona?

30 Bona kamoo a dirago gore legadima le phadime ka gona marung,

Le kamoo a dirago gore bodiba bja lewatle bo tlale ka meetse.

31 Ka gobane o diriša dilo tše go fepa batho,

O ba nea dijo tše dintšhi.

32 O khupetša legadima ka diatla tša gagwe,

O le botša gore le bethe mo yena a nyakago.

33 Medumo ya legadima e re botša gore o gona,

Le diruiwa di kgona go re tsebiša gore ke mang yo a tlago.