Puku ya Bobedi ya Dikgoši

15 Asaria* morwa wa Kgoši Amatsia wa Juda e bile kgoši ka ngwaga wa bo-27 wa ge Kgoši Jeroboama* wa Isiraele a buša. 2 O thomile go ba kgoši a na le mengwaga e 16, gomme o bušitše Jerusalema ka mengwaga e 52. Leina la mmagwe e be e le Jekolia wa Jerusalema. 3 O ile a tšwela pele a dira dilo tše di lokilego pele ga Jehofa go swana le ge tatagwe Amatsia a di dirile. 4 Eupša mafelo a phagamego ao go rapelwago go ona a ile a tšwela pele a le gona. E bile setšhaba se be se sa dutše se dira dihlabelo le go dira dihlabelo tšeo di thuntšhago muši mafelong ao. 5 Jehofa o ile a otla kgoši ka lephera, gomme ya dula e na le lephera go fihla letšatšing leo e hlokofetšego ka lona. E ile ya dula ntlong ya yona e le tee. Ka nako yeo Jothama morwa wa kgoši o be a hlokometše mošate e bile a ahlola setšhaba nageng yeo. 6 Ditaba ka moka tša Asaria le dilo ka moka tšeo a di dirilego, di ngwadilwe ka pukung ya histori ya mehleng ya dikgoši tša Juda. 7 Mafelelong Asaria o ile a hlokofala gomme a bolokwa le borakgolokhukhu ba gagwe Motseng wa Dafida, ke moka Jothama morwa wa gagwe a ba kgoši legatong la gagwe.

8 Sakaria morwa wa Jeroboama e bile kgoši ya Isiraele a le Samaria ka ngwaga wa bo-38 wa ge Kgoši Asaria wa Juda a buša, gomme o bušitše ka dikgwedi tše tshelelago. 9 O ile a dira dilo tše mpe pele ga Jehofa go swana le ge borakgolokhukhu ba gagwe ba dirile. Ga se a ka a tlogela go dira dibe tšeo Jeroboama morwa wa Nebata a di dirišitšego Baisiraele. 10 Ke moka Shalume morwa wa Jabeshe a mo logela maanomabe gomme a mmolaela Ibileama, ke moka a ba kgoši legatong la gagwe. 11 Ditaba ka moka tša Sakaria di ngwadilwe ka pukung ya histori ya mehleng ya dikgoši tša Isiraele. 12 Go ile gwa phethagala seo Jehofa a se boditšego Jehu ge a be a re: “Barwa ba gago ba tla dula setulong sa bogoši sa Isiraele go fihla molokong wa bone.” Ke moka gwa direga ka wona mokgwa woo.

13 Shalume morwa wa Jabeshe e bile kgoši ngwageng wa bo-39 wa ge Kgoši Usia wa Juda a buša, gomme o bušitše kgwedi e tee kua Samaria. 14 Ke moka Menaheme morwa wa Gadi a ya Samaria a etšwa Thiritsa, a bolaya Shalume morwa wa Jabeshe kua Samaria. Ka morago ga gore a mmolaye, o ile a ba kgoši legatong la gagwe. 15 Ditaba ka moka tša Shalume le maanomabe ao a a logilego, di ngwadilwe ka pukung ya histori ya mehleng ya dikgoši tša Isiraele. 16 Menaheme o ile a tloga Thiritsa a ya a hlasela Thifisa le batho ka moka bao ba bego ba dula moo le ditikologo tša yona, ka gobane Thifisa ga se ya ka ya mmulela dikeiti tša yona. O ile a e hlasela a ba a bula le dimpa tša basadi ba moo ba baimana.

17 Menaheme morwa wa Gadi e bile kgoši ya Isiraele ka ngwaga wa bo-39 wa ge Kgoši Asaria wa Juda a buša, gomme o bušitše ka mengwaga e lesome a le Samaria. 18 O ile a tšwela pele a dira dilo tše mpe pele ga Jehofa. Nakong ka moka ya ge a sa phela, ga se a ka a tlogela go dira dibe ka moka tšeo Jeroboama morwa wa Nebata a di dirišitšego Baisiraele. 19 Kgoši Pule wa Asiria o ile a tla nageng ya Isiraele. Eupša Menaheme o ile a mo fa silifera yeo e imelago dikhilokgerama tše e ka bago tše 34 000 (dikete tše masometharo-nne),* e le gore Pule a kgone go mo thuša gore a tšwele pele e le kgoši. 20 E le gore Menaheme a kgoboketše silifera yeo a bego a ka e fa kgoši ya Asiria, o ile a laela gore monna yo mongwe le yo mongwe yo a tumilego le wa go huma wa Isiraele a ntšhe silifera yeo e lekanago dikgerama tše 600 (makgolo a tshelelago).* Ke moka kgoši ya Asiria ya boela morago gomme ya se sa hlasela naga yeo. 21 Ditaba ka moka tša Menaheme le dilo ka moka tšeo a di dirilego, di ngwadilwe ka pukung ya histori ya mehleng ya dikgoši tša Isiraele. 22 Mafelelong Menaheme a hlokofala go no swana le borakgolokhukhu ba gagwe gomme a bolokwa le borakgolokhukhu ba gagwe, ke moka Pekahia morwa wa gagwe a ba kgoši legatong la gagwe.

23 Pekahia morwa wa Menaheme e bile kgoši ya Isiraele a le Samaria ka ngwaga wa bo-50 wa ge Kgoši Asaria wa Juda a buša, gomme o bušitše ka mengwaga e mebedi. 24 O ile a tšwela pele a dira dilo tše mpe pele ga Jehofa. Ga se a ka a tlogela go dira dibe tšeo Jeroboama morwa wa Nebata a di dirišitšego Baisiraele. 25 Ke moka Peka morwa wa Remalia e lego moetapele wa mašole yoo Pekahia a mo tshepilego, o ile a mo logela maanomabe gomme a mmolaela kua Samaria toreng yeo e šireleditšwego ya mošate a na le Arigobo le Ariye. O be a na le banna ba 50 bao ba tšwago Gileada. Ka morago ga gore a mmolaye, o ile a ba kgoši legatong la gagwe. 26 Ditaba ka moka tša Pekahia le dilo ka moka tšeo a di dirilego, di ngwadilwe ka pukung ya histori ya mehleng ya dikgoši tša Isiraele.

27 Peka morwa wa Remalia e bile kgoši ya Isiraele a le Samaria ka ngwaga wa bo-52 wa ge Kgoši Asaria wa Juda a buša, gomme o bušitše mengwaga e 20. 28 O ile a tšwela pele a dira dilo tše mpe pele ga Jehofa. Ga se a ka a tlogela go dira dibe tšeo Jeroboama morwa wa Nebata a di dirišitšego Baisiraele. 29 Mehleng ya Kgoši Peka wa Isiraele, Kgoši Tigilathe-pilesere wa Asiria o ile a tla a hlasela Ijoni, Abele-bethe-maaka, Janoa, Kedeshe, Hatsora le Gileada. A ba a fenya le Galelia e lego naga ka moka ya Nafutali gomme a di thopa, a tšea le batho bao ba bego ba dula go tšona a ba iša bothopša Asiria. 30 Ke moka Hoshea morwa wa Elaa a logela Peka morwa wa Remalia maanomabe, a mo hlasela gomme a mmolaya. Ke moka a ba kgoši legatong la gagwe ka ngwaga wa bo-20 wa ge Jothama morwa wa Usia a buša. 31 Ditaba ka moka tša Peka le dilo ka moka tšeo a di dirilego, di ngwadilwe ka pukung ya histori ya mehleng ya dikgoši tša Isiraele.

32 Jothama morwa wa Kgoši Usia wa Juda e bile kgoši ngwageng wa bobedi wa ge Peka morwa wa Remalia kgoši ya Isiraele a buša. 33 O be a na le mengwaga e 25 ge a eba kgoši, gomme o bušitše Jerusalema ka mengwaga e 16. Leina la mmagwe e be e le Jerusha morwedi wa Tsadoko. 34 O ile a dula a dira dilo tše di lokilego pele ga Jehofa, go swana le ge tatagwe Usia a ile a dira bjalo. 35 Eupša mafelo a phagamego a ile a tšwela pele a le gona. E bile setšhaba se be se sa dutše se dira dihlabelo le go dira dihlabelo tšeo di thuntšhago muši mafelong ao. Ke yena a agilego keiti ya ka godimo ya ntlo ya Jehofa. 36 Ditaba ka moka tša Jothama le dilo tšeo a di dirilego, di ngwadilwe ka pukung ya histori ya mehleng ya dikgoši tša Juda. 37 Mehleng yeo Jehofa o ile a thoma go roma Retsini kgoši ya Siria le Peka morwa wa Remalia gore ba yo hlasela Juda. 38 Mafelelong Jothama a hlokofala go no swana le borakgolokhukhu ba gagwe gomme a bolokwa Motseng wa Dafida rakgolokhukhu wa gagwe, ke moka Ahasi morwa wa gagwe a ba kgoši legatong la gagwe.