Doiteronomio

15 “Mafelelong a ngwaga o mongwe le o mongwe wa bošupa, le phumole* melato ya bao ba le kolotago. 2 Seo le swanetšego go se dira ke se: Motho yo mongwe le yo mongwe yo a adimilego motho tšhelete a phumole sekoloto seo. A se ke a gapeletša Moisiraele wa gabo goba ngwanabo gore a mo patele, ka gobane go phumolwa ga sekoloto go dira gore Jehofa a godišwe. 3 Motho yo e sego Moisiraele yena o swanetše go mmotša gore a go patele, eupša o swanetše go phumola sekoloto le ge e le sefe sa motho yo e lego Moisiraele. 4 Eupša go se ke gwa ba le motho yo a diilago mo gare ga lena, ka gobane Jehofa o tla le šegofatša nageng yeo yena Jehofa Modimo wa lena a le neago yona e le bohwa gore e be ya lena, 5 ge feela le ka theetša Jehofa Modimo wa lena gomme la latela ditaelo ka moka tšeo ke le neago tšona lehono. 6 Ka gobane Jehofa Modimo wa lena o tla le šegofatša feela bjalo ka ge a le tshepišitše, gomme lena le tla adima ditšhaba tše dintšhi tšhelete, eupša lena go ka se hlokagale gore le adime selo go tšona. Lena le tla buša ditšhaba tše dintšhi, eupša tšona di ka se le buše.

7 “Ge e ba go o mongwe wa metse ya nageng yeo Jehofa Modimo wa gago a go neago yona go na le yo mongwe wa banabeno yo a diilago, gona o se ke wa thatafiša pelo ya gago, eupša o thuše ngwaneno yo a diilago. 8 O fane, gomme o mo adime selo le ge e le sefe seo a se nyakago goba seo a se hlokago. 9 O itlhokomele gore o se ke wa nagana selo se se sebe ka pelong ya gago wa re: ‘Ngwaga wa bošupa, e lego ngwaga wa go phumola sekoloto o batametše.’ Ke moka wa tima ngwaneno yo a diilago wa se mo nee selo. Ge e ba yena a ka llela Jehofa a mmotša ka wena, gona o tla be o dirile sebe. 10 O mo nee seo a se hlokago, gomme o dire seo ka pelo ka moka, ka gobane Jehofa Modimo wa gago o tla šegofatša dilo ka moka tšeo o di dirago. 11 Mo nageng ya lena go tla dula go na le badiidi. Ke ka baka leo ke go laelago ke re: ‘O fane gomme o thuše banabeno bao ba hlakago le bao ba diilago mo nageng ya lena.’

12 “Ge e ba o rekile ngwaneno, e ka ba e le monna wa Moheberu goba mosadi wa Moheberu, gomme a go hlanketše mengwaga e tshelelago, gona ka ngwaga wa bošupa o mo lokolle. 13 Le gona ge o mo lokolla, o se ke wa mo tlogela a sepela a lekeleditše diatla. 14 O mo nee se sengwe go tšwa mohlapeng wa gago wa dinku goba dipudi, o mo nee beine ya gago, makhura a gago a mohlware, le dilo tšeo o di bunnego. O mo nee go ya ka mokgwa woo Jehofa Modimo wa gago a go šegofaditšego ka gona. 15 O gopole gore o be o le lekgoba nageng ya Egepeta, gomme Jehofa Modimo wa gago a go lokolla. Ke ka baka leo lehono ke go laelago gore o dire dilo tše.

16 “Eupša ge a ka re go wena: ‘Nka se go tlogele,’ ka baka la ge a go rata e bile a rata le lapa la gago, gomme a thabela go dula le wena, 17 gona wena o mmee kgauswi le lebati gomme o tšee nalete o mo phule tsebe. Yena e tla ba lekgoba la gago bophelo bja gagwe ka moka. O dire se se swanago le ka lekgoba la gago la mosadi ge e ba le sa nyake go sepela. 18 O mo lokolle ka pelo e tšhweu gore a sepele, ka gobane mošomo wo a o dirilego ka mengwaga e tshelelago o lekana gabedi le mošomo wa motho yo o mo hirilego, e bile Jehofa Modimo wa gago o go šegofaditše dilong ka moka tšeo o di dirilego.

19 “Leitšibulo le lengwe le le lengwe le letona la dikgomo tša gago, dinku tša gago le dipudi tša gago, o le nee Jehofa Modimo wa gago. O se ke wa šoma mošomo le ge e le ofe ka leitšibulo la poo ya gago goba wa kota leitšibulo la dinku tša gago. 20 Wena le ba lapa la gago, le le je le le pele ga Jehofa Modimo wa gago ngwaga o mongwe le o mongwe lefelong leo Jehofa a tlago go le kgetha. 21 Eupša ge e ba phoofolo yeo ya leitšibulo e solega, e hlotša, e foufetše, goba e solega ka tsela le ge e le efe, gona le se ke la direla Jehofa Modimo wa lena sehlabelo ka yona. 22 Le e je le le ka gare ga metse ya lena, gomme e jewe ke motho yo a sa hlwekago le yo a hlwekilego, le e je go swana le ge le eja nama ya kgama. 23 Eupša madi a yona le se ke la a ja. Le a tšhollele fase go swana le meetse.