Lefitiko

15 Jehofa a tšwela pele a bolela le Moshe le Arone a re: 2 “Botšang Baisiraele le re: ‘Ge monna a ka ediša sethong sa gagwe sa bong, gona go ediša moo go dira gore a se ke a hlweka. 3 Motho yoo o tla tšwela pele e le yo a sa hlwekago le ge go ediša moo go tšwela pele go etšwa sethong sa gagwe sa bong, goba go dirile gore setho seo se thibane.

4 “‘Selo le ge e le sefe seo motho yo a edišago a ka robalago go sona e tla ba seo se sa hlwekago, le selo le ge e le sefe seo a ka dulago go sona e tla ba seo se sa hlwekago. 5 Motho yo a ka kgwathago selo seo monna yoo a bego a robetše go sona, a hlatswe diaparo tša gagwe gomme a hlape, e be yo a sa hlwekago go fihla mantšiboa. 6 Motho yo a ka dulago godimo ga selo seo motho yo a edišago a bego a dutše go sona, a hlatswe diaparo tša gagwe gomme a hlape, e be yo a sa hlwekago go fihla mantšiboa. 7 Motho yo a ka kgwathago yo a edišago a hlatswe diaparo tša gagwe gomme a hlape, e be yo a sa hlwekago go fihla mantšiboa. 8 Ge motho yo a edišago a ka tshwela motho yo a hlwekilego ka mare goba mare a gagwe a tšhela motho yoo, gona motho yo a hlwekilego a hlatswe diaparo tša gagwe gomme a hlape, e be yo a sa hlwekago go fihla mantšiboa. 9 Selo le ge e le sefe seo motho yo a edišago a bego a dutše go sona godimo ga phoofolo, e tla ba seo se sa hlwekago. 10 Motho le ge e le ofe yo a kgwathago selo le ge e le sefe seo motho yo a edišago a bego a se duletše, e tla ba yo a sa hlwekago go fihla mantšiboa. Le motho le ge e le ofe yo a tšeago dilo tšeo, a hlatswe diaparo tša gagwe gomme a hlape, e be yo a sa hlwekago go fihla mantšiboa. 11 Ge motho yo a edišago a ka re a se a hlapa matsogo a kgwatha motho yo mongwe, gona motho yoo a hlatswe diaparo tša gagwe gomme a hlape, e be yo a sa hlwekago go fihla mantšiboa. 12 Ge e ba motho yo a edišago a ka kgwatha sebjana sa letsopa, gona sebjana seo se pšhatlaganywe, gomme ge e ba e le sa kota gona se hlatswiwe ka meetse.

13 “‘Bjale ge e ba motho yoo a se sa ediša, gona ka morago ga matšatši a šupago a hlatswe diaparo tša gagwe, a hlape mmele ka meetse ao a gelwego ka nokeng, gomme e tla ba yo a hlwekilego. 14 Ka letšatši la seswai a tšee maeba a mabedi a nageng goba maebana a mabedi, a tle pele ga Jehofa mojakong wa taberenakele gomme a a nee moperisita. 15 Moperisita a a neele Modimo, le lengwe e be la sebego sa sebe gomme le lengwe e be la sebego sa go fišwa. Ke moka moperisita o tla dira gore a hlweke* pele ga Jehofa.

16 “‘Bjale ge e ba monna a ka tšwa matšhedi, gona a hlape mmele wa gagwe ka moka, gomme e be yo a sa hlwekago go fihla mantšiboa. 17 A hlatswe seaparo le ge e le sefe le selo le ge e le sefe seo se dirilwego ka letlalo seo se nago le matšhedi, gomme e be seo se sa hlwekago go fihla mantšiboa.

18 “‘Ge monna a ka re a robetše le mosadi gomme a tšwa matšhedi, ka moka ga bona ba hlape gomme e be ba sa hlwekago go fihla mantšiboa.

19 “‘Ge mosadi a ka tšwa madi ka ge a bona kgwedi, e tla ba yo a sa hlwekago ka matšatši a šupago. Motho le ge e le ofe yo a mo kgwathago e tla ba yo a sa hlwekago go fihla mantšiboa. 20 Selo le ge e le sefe seo a ka robalago go sona nakong ya ge a se a hlweka ka ge a bona kgwedi, e tla ba seo se sa hlwekago. Le selo se sengwe le se sengwe seo a ka dulago godimo ga sona e tla ba seo se sa hlwekago. 21 Motho le ge e le ofe yo a kgwathago selo le ge e le sefe seo mosadi yoo a bego a robetše go sona, a hlatswe diaparo tša gagwe, a hlape gomme e be yo a sa hlwekago go fihla mantšiboa. 22 Motho le ge e le ofe yo a kgwathago selo le ge e le sefe seo mosadi yoo a bego a dutše go sona, a hlatswe diaparo tša gagwe, a hlape gomme e be yo a sa hlwekago go fihla mantšiboa. 23 Ge e ba motho le ge e le ofe a ka kgwatha mpete woo mosadi yoo a bego a dutše go ona goba a kgwatha selo le ge e le sefe, gona motho yoo e tla ba yo a sa hlwekago go fihla mantšiboa. 24 Ge e ba monna a ka robala le mosadi gomme monna yoo a šilafatšwa ke madi a ge mosadi yoo a bona kgwedi, gona monna yoo e tla ba yo a sa hlwekago ka matšatši a šupago, gomme selo le ge e le sefe seo monna yoo a ka robalago go sona e tla ba seo se sa hlwekago.

25 “‘Ge e ba mosadi a ka tšwa madi ka matšatši a mantši mola e se nako ya gagwe ya go bona kgwedi, goba ge e ba a ka bona kgwedi nako e teletšana go feta mehleng, gona e tla ba yo a sa hlwekago matšatši ka moka a ge a etšwa madi, go swana le matšatšing a ge a bona kgwedi. 26 Selo le ge e le sefe seo mosadi yoo a ka robalago go sona matšatšing a ge a etšwa madi, e tla ba seo se sa hlwekago go swana le seo a robalago go sona ge a bona kgwedi, gomme selo le ge e le sefe seo a ka se dulelago e tla ba seo se sa hlwekago go no swana le nakong ya ge a bona kgwedi. 27 Motho le ge e le ofe yo a kgwathago dilo tšeo e tla ba yo a sa hlwekago, a hlatswe diaparo tša gagwe, a hlape gomme e be yo a sa hlwekago go fihla mantšiboa.

28 “‘Eupša ge e ba a se sa tšwa madi, gona a bale matšatši a šupago gomme ka morago ga moo e tla ba yo a hlwekilego. 29 Ka letšatši la seswai a tšee maeba a mabedi a nageng goba maebana a mabedi gomme a a tliše go moperisita mojakong wa taberenakele. 30 Moperisita a dire sebego sa sebe ka le lengwe gomme ka le lengwe a dire sebego sa go fišwa. Ke moka moperisita o tla dira gore mosadi yoo a hlweke pele ga Jehofa.

31 “‘Wena Moshe le Arone le thuše Baisiraele gore ba hlweke, e le gore ba se ke ba hwa ka baka la go šilafatša taberenakele ya ka yeo ke e beilego gare ga bona.

32 “‘Woo ke molao wa mabapi le monna yo a edišago le monna yo a sa hlwekago ka baka la go tšwa matšhedi, 33 le mabapi le mosadi yo a sa hlwekago ka ge a bona kgwedi, le monna le ge e le ofe yo a edišago goba mosadi le ge e le ofe yo a tšwago madi ka nako e teletšana, le mabapi le monna yo a robalago le mosadi yo a sa hlwekago go ya ka molao.’”