Puku ya Bobedi ya Samuele

3 Ba ntlo ya Saulo le ba ntlo ya Dafida ba ile ba lwa ka nako e telele. Dafida yena a ba le matla le go feta. Eupša ba ntlo ya Saulo ba fela matla ganyenyane-ganyenyane.

2 Ka nako yeo, Dafida a belegelwa barwa kua Heburone, wa mathomo ya ba Aminone yo a mmelegetšwego ke Ahinoama wa Mojeseriele. 3 Wa bobedi ya ba Kileaba yo a mmelegetšwego ke Abigaile yoo e bego e le mosadi wa Nabala wa Mokaramele, wa boraro ya ba Abesalomo morwa wa Maaka, morwedi wa Talamai kgoši ya Geshuri. 4 Wa bone ya ba Adonija morwa wa Hagithi, wa bohlano ya ba Shefatia morwa wa Abitala. 5 Wa botshelela ya ba Ithireama yo a mmelegetšwego ke Egela. Ba ke bona bao ba belegetšwego Dafida kua Heburone.

6 Ge ntwa magareng ga ba ntlo ya Saulo le ba ntlo ya Dafida e gakala, Abenere o ile a tšwela pele a eba le matla kudu ntlong ya Saulo. 7 Saulo o be a na le mosadi wa serethe yo leina la gagwe e bego e le Ritsipa morwedi wa Aya. Ka morago Ishiboshethe a re go Abenere: “Ke ka baka lang o ile wa robala le mosadi wa serethe wa tate?” 8 Abenere a galefa kudu ka baka la seo se boletšwego ke Ishiboshethe gomme a re: “Na ke nna mpša ya Juda? Ke be ke dutše ke bontšha ba lapa la tatago Saulo le banababo le bagwera ba gagwe botho* go ba go fihla le lehono, ebile ga sa nka ka go tlogela gore Dafida a go bolaye, eupša lehono o mpona molato ka baka la mosadi. 9 Anke Modimo a otle Abenere a be a oketše kotlo yeo ge e ba nna nka se direle Dafida seo Jehofa a mo enetšego sona. 10 O mo enetše gore o tla tloša mmušo go ba ntlo ya Saulo gomme a thea setulo sa bogoši sa Dafida e le gore a buše Isiraele le Juda go tloga Dani go ya Beresheba.” 11 Ishiboshethe a palelwa ke go fetola Abenere le ka lentšu le letee ka gobane o be a mo tšhaba.

12 Gateetee Abenere a romela baromiwa go Dafida, a re: “Naga ke ya mang?” A oketša a re: “Dira kgwerano le nna gomme nna ke tla dira sohle seo nka se kgonago gore Isiraele ka moka e be ka lehlakoreng la gago.” 13 Ge a realo, Dafida a re: “Go lokile! Ke tla dira kgwerano le wena. Eupša ke kgopela gore nakong e tlago ge o etla go mpona o tle le Mikala morwedi wa Saulo.” 14 Ke moka Dafida a romela baromiwa go Ishiboshethe morwa wa Saulo a re: “Mphe Mikala mosadi wa ka yo ke mmeeleditšego ka matlalwana a 100 a ditho tša botona tša Bafilisita.” 15 Ka gona Ishiboshethe a roma baromiwa ba yo tšea Mikala go monna wa gagwe, e lego Palatiele morwa wa Laishi. 16 Eupša monna wa gagwe a mo šala morago a tšama a lla go fihlela Bahurimi. Ke moka Abenere a re go Palatiele: “Gomela morago!” Ge a realo, Palatiele a goma.

17 Ge nako e dutše e eya, Abenere a bolela le banna ba bagolo ba Isiraele a re: “Ke kgale le nyaka gore Dafida e be kgoši ya lena. 18 Bjale gatang mogato, ka gobane Jehofa o boditše Dafida a re: ‘Ke tla phološa setšhaba sa ka sa Isiraele go Bafilisita le go manaba a sona ka moka ke diriša Dafida mohlanka wa ka.’” 19 Ke moka Abenere a bolela le batho ba Benjamini. A buša a yo bolela le Dafida ka sephiring kua Heburone, a mmotša ka dilo tšeo Isiraele le moloko ka moka wa Benjamini ba dumelelanego ka tšona.

20 Ge Abenere a fihla go Dafida kua Heburone a na le banna ba 20, Dafida o ile a ba direla monyanya. 21 Ke moka Abenere a re go Dafida: “Kgoši mong wa ka, e re ke ye go go kgobokeletša Baisiraele ka moka, e le gore ba tle ba dire kgwerano le wena. O tla ba kgoši gomme wa buša setšhaba ka moka sa Isiraele ka mokgwa wo o nyakago ka gona.” Ke moka Dafida a tlogela Abenere gore a sepele gomme Abenere a sepela ka khutšo.

22 Ka nako yeo, bahlanka ba Dafida le Joaba ba boa ba etšwa ntweng ba swere dilo tše dintši tšeo ba di hweditšego ka morago ga ntwa. Abenere o be a se sa na le Dafida kua Heburone, ka gobane Dafida o be a mo tlogetše gore a sepele ka khutšo. 23 Ge Joaba le mašole ka moka ao a bego a na le yena ba fihla, o ile a botšwa gore: “Abenere morwa wa Nere o be a tlile go kgoši gomme kgoši ya mo lesa gore a sepele ke moka yena a itshepelela ka khutšo.” 24 Joaba a ya go kgoši a re: “O dirileng? Ke kwele gore Abenere o be a tlile go wena. Ke ka baka lang o mo tlogetše a sepela? Gona bjale o tšhabile. 25 O tseba gabotse gore Abenere morwa wa Nere o be a tlile mo go go tlaetša le go nyakolla dilo ka moka ka wena le selo se sengwe le se sengwe seo o se dirago.”

26 Ke moka Joaba a tloga go Dafida a roma baromiwa gore ba late Abenere gomme bona ba mo gomiša a etla sedibeng sa Sira. Eupša Dafida o be a sa tsebe selo ka taba yeo. 27 Ge Abenere a boetše Heburone, Joaba a tsena le yena ka keiti ya motse gomme a mmiletša ka thokwana gore ba bolelele ka sephiring. Eupša ge ba le moo, Joaba a mo hlaba mo dimpeng gomme a hwa. O be a itefeletša gore o bolaile ngwanabo e lego Asahele. 28 Ka morago ge Dafida a ekwa ka seo, o ile a re: “Jehofa o a tseba gore nna le batho bao ke ba bušago re ka se tsoge re bile le molato wa go bolaya Abenere morwa wa Nere le gatee. 29 Anke molato wo o boele go Joaba le go ba lapa la tatagwe ka moka. Anke ka ntlong ya Joaba go se hlokwe monna yo a edišago goba yo a nago le lephera goba monna yo a šomago ka sedirišwa sa go loga* goba yo a bolawago ka sabola goba yo a se nago dijo!” 30 Joaba le Abishai ngwanabo ba ile ba bolaya Abenere ka ge a bolaile Asahele ngwanabo bona ntweng kua Gibeoni.

31 Ke moka Dafida a re go Joaba le go batho ka moka bao ba bego ba na le yena: “Gagolang diaparo tša lena le apare masaka gomme le llele Abenere.” Kgoši Dafida o be a sepela ka morago ga batho bao ba bego ba rwele setopo sa Abenere. 32 Ba boloka Abenere Heburone gomme kgoši ya lla kudu ebile e hlaboša lentšu gona moo lebitleng la Abenere, ke moka batho ka moka le bona ba lla. 33 Kgoši ya llela Abenere ya re:

“Ke ka baka lang Abenere a hwile lehu la go hlabiša dihlong gakaakaa?

O hwile go swana le motho yo a bolailwego ke disenyi.”

Ge a realo batho ka moka ba mo llela gape.

35 Ka morago mosegareng wa letšatši leo, batho ka moka ba tla go Dafida gore ba tlo mo fa senkgwa sa go mo homotša. Eupša Dafida a ena a re: “Anke Modimo a nkotle a be a oketše kotlo yeo ge e ba nka ja senkgwa goba selo le ge e le sefe pele letšatši la lehono le sobela!” 36 Batho ka moka ba bona seo se diragetšego gomme sa ba kgahla. Ba kgahlwa ke dilo ka moka tšeo kgoši e di dirilego. 37 Letšatšing leo batho ka moka le Baisiraele ka moka ba tseba gore ga se kgoši e dirilego gore Abenere morwa wa Nere a bolawe. 38 Ke moka kgoši ya re go bahlanka ba yona: “Na ga le tsebe gore letšatšing le mo Isiraele go hwile moetapele, yena monna yo bohlokwa? 39 Le ge ke tloditšwe gore ke be kgoši, lehono ga ke na matla gomme banna ba, e lego bana ba Tseruya, ba sehlogo kudu. Eka Jehofa a ka bušetša modiri wa dilo tše mpe go ya ka bobe bja gagwe.”