Puku ya Bobedi ya Samuele

17 Ka morago, Ahithofele a re go Abesalomo: “Hle e re ke kgethe mašole a 12 000 gore re yo kitimiša Dafida bošegong bjo. 2 Ke tla mo hlasela nakong ya ge a lapile ebile a feletšwe ke matla, ka ba ka mo tšhoša, gomme batho ka moka bao ba nago le yena ba tla tšhaba ke moka nna ka bolaya kgoši. 3 Ke tla bušetša batho ka moka go wena. Seo o tlago go se dira monna yoo o mo nyakago se tla dira gore batho ka moka ba boele go wena. Ke moka batho ka moka ba tla phela ka khutšo.” 4 Abesalomo le banna ka moka ba bagolo ba Isiraele ba kwa taba yeo e kwagala gabotse.

5 Eupša Abesalomo a re: “Ke kgopela gore le bitše Hushai wa Moarakhi gore re kwe gore yena o reng.” 6 Ka gona, Hushai a tla go Abesalomo. Ke moka Abesalomo a re go yena: “Ahithofele o re file keletšo ye. Na re e diriše? Ge e ba go se bjalo, gona wena re botše gore re dire eng.” 7 Hushai a re go Abesalomo: “Keletšo ya Ahithofele e ka se šome mo nakong ye!”

8 Hushai a buša a re: “O tseba gabotse gore tatago le banna bao a nago le bona ba na le matla ebile ba bogale go swana le bere yeo e lahlegetšwego ke bana. Le gona o a tseba gore tatago ke lešole le matla, ebile a ka se fetše bošego ka moka a robetše moo batho ka moka ba robetšego gona. 9 Gona bjale o khutile go le lengwe la mawa* goba lefelong le lengwe. Le gona ge e ba a ka hlasela pele, bao ba tlago go kwa ka se ba tla re: ‘Batho bao ba latelago Abesalomo ba fentšwe!’ 10 Gaešita le monna yoo a nago le sebete go swana le tau,* a ka felelwa ke matla ka baka la go tšhoga, ka gobane Baisiraele ka moka ba a tseba gore tatago ke lešole le matla, le gona banna bao a nago le bona ba na le sebete. 11 Nna ke eletša ka gore: Anke Baisiraele ka moka go tloga Dani go fihla Beresheba ba kgoboketšwe pele ga gago, ba tle ka bontšhi go swana le santa ya lewatleng gomme wena o ba etelele pele go ya ntweng. 12 Re tla mo hlasela kae le kae moo re mo hwetšago gona gomme ra mo wela godimo go swana le phoka ge e wela fase. Le gona, ga go na yoo a tlago go phologa, e ka ba yena goba banna bao a nago le bona. 13 Ge e ba a ka tšhabela motseng, gona Baisiraele ka moka ba tla ya motseng woo ba swere dithapo gomme ra gogela maboto a wona ka moeding ka dithapo, go fihlela go se sa na leswikana leo le šetšego.”

14 Ke moka Abesalomo le banna ka moka ba Isiraele ba re: “Keletšo ya Hushai wa Moarakhi e phala keletšo ya Ahithofele!” Jehofa o be a dirile* gore ba se ke ba latela keletšo ya Ahithofele le ge e be e le e botse, e le gore Jehofa a tle a bakele Abesalomo masetlapelo.

15 Ka morago Hushai a re go moperisita Tsadoko le moperisita Abiathara: “Ahithofele o eleditše Abesalomo le banna ba bagolo ba Isiraele ka gore le ka gore, nna ka ba eletša ka gore le ka gore. 16 Bjale romelang molaetša go Dafida kapelapela gomme le mo lemoše le re: ‘Bošegong bjo, o se ke wa dula lešokeng moo go tshelwago* Noka ya Jorodane gona, eupša o tshelele ka mošola wa noka. Go sego bjalo, kgoši le batho ka moka bao e nago le bona ba ka bolawa.’”

17 Jonathane le Ahimaatse ba be ba eme Ene-rogele, ka gobane ba be ba sa nyake go bonwa ke batho ge ba tsena motseng. Ka gona go ile gwa tla mohlanka wa ngwanenyana a ba botša seo se diregago gomme bona ba ya ba botša Kgoši Dafida ditaba tšeo. 18 Eupša lesogana le lengwe la ba bona gomme la ya go botša Abesalomo. Ka gona, Jonathane le Ahimaatse ba tloga kapelapela gomme ba ya ntlong ya monna yo mongwe kua Bahurimi, monna yoo o be a na le sediba ka jarateng ya gagwe, ka gona ba tsena ka gare ga sona, 19 gomme mosadi wa monna yoo a ala lešela godimo ga sediba seo gomme a anega mabele ao a setlilwego, ga go na yoo a lemogilego seo. 20 Bahlanka ba Abesalomo ba tla go mosadi yoo ka ntlong ya gagwe gomme ba mmotšiša ba re: “Ahimaatse le Jonathane ba kae?” Mosadi yoo a re: “Ba fetile mo ba eya nokeng.” Ke moka banna bao ba ba nyaka eupša ba se ba hwetše, ka gona ba boela Jerusalema.

21 Ka morago ga ge banna bao ba sepetše, Ahimaatse le Jonathane ba tšwa ka sedibeng gomme ba ya go botša Kgoši Dafida ba re: “Tshela noka ye kapelapela, ke moka ba mmotša seo Ahithofele a se boletšego.” 22 Gateetee Dafida le batho ka moka bao a bego a na le bona, ba tshela Noka ya Jorodane. Ge letšatši le hlaba, go be go se sa na yoo a šetšego yo a sego a tshela Noka ya Jorodane.

23 Ge Ahithofele a bona gore keletšo ya gagwe ga se ya latelwa, o ile a namela tonki ya gagwe a ya ntlong ya gagwe motseng wa gabo. A fa ba lapa la gagwe ditaelo gomme ka morago a itekeletša.* Ka gona a hwa a bolokelwa mabitleng a borakgolokhukhu ba gagwe.

24 Ka nako yeo, Dafida a ya Mahanaime gomme Abesalomo a tshela Noka ya Jorodane a na le banna ka moka ba Baisiraele. 25 Abesalomo a bea Amasa gore e be molaodi wa mašole legatong la Joaba. Amasa e be e le morwa wa monna yoo leina la gagwe e lego Ithira wa Moisiraele yo a ilego a robala le Abigaile morwedi wa Nahashi ngwanabo Tseruya, mmago Joaba. 26 Baisiraele le Abesalomo ba hloma ditente nageng ya Gileada.

27 Gateetee ge Dafida a fihla Mahanaime, Shobi morwa wa Nahashi yo a tšwago Raba ya Baamoni le Makiri morwa wa Amiele yo a tšwago Lodibara gotee le Barasilai wa Mogileada yo a tšwago Rogelima 28 ba tliša mepete, dikotlelo, dipitša tša letsopa, korong, mabele,* folouru, dithuthupe,* dinawa, dihlodi le dijo tše dingwe tšeo di bešitšwego, 29 ba tliša le todi ya dinose, potoro, dinku le tšhese. Dilo tše ka moka ba be ba di tlišeditše Dafida le batho bao a bego a na le bona gore ba di je, ka gobane ba be ba re: “Batho bao ba lego kua lešokeng ba swerwe ke tlala, ba lapile ebile ba nyorilwe.”