Puku ya Pele ya Samuele
26 Ka morago banna ba Tsifi ba tla go Saulo kua Gibea ba re: “Dafida šole o ikutile mmotong wa Hakila wo o lebanego le Jeshimone.”* 2 Ke moka Saulo a theogela lešokeng la Tsifi a na le mašole a matla a 3 000 (dikete tše tharo) ao a kgethilwego go Baisiraele, go yo tsoma Dafida lešokeng la Tsifi. 3 Saulo a kampa mmotong wa Hakila wo o lebanego le Jeshimone, kgauswi le tsela. Ka nako yeo, Dafida o be a dula lešokeng, ke moka a kwa gore Saulo o tlile lešokeng go tlo mo nyaka. 4 Dafida a roma banna gore ba ye ba nyakišiše ka sephiring go bona ge e ba ka nnete Saulo a tlile. 5 Ka morago Dafida a ya lefelong leo Saulo a bego a kampile go lona gomme Dafida a bona lefelo leo Saulo le Abenere morwa wa Nere, molaodi wa mašole a gagwe ba bego ba robetše go lona. Saulo o be a robetše gare ga kampa gomme mašole a mangwe ka moka a hlomile ditente go mo dikologa. 6 Ke moka Dafida a re go Ahimeleke wa Mohethe le go Abishai morwa wa Tseruya buti’a Joaba: “Ke mang yo a tlago go theogela le nna go Saulo kua kampeng?” Abishai a re: “Ke tla theoga le wena.” 7 Ke moka Dafida le Abishai ba tloga bošego ba ya moo go nago le mašole a Saulo gomme ba hwetša Saulo a robetše kampeng, lerumo la gagwe le tsemilwe fase kgauswi le hlogo ya gagwe. Abenere le mašole a mangwe ba be ba robetše go mo dikologa.
8 Abishai a re go Dafida: “Lehono Modimo o go file lenaba la gago. Hle, ntumelele gore ke mo hlabe ka lerumo le phuleletše le tsene fase, ke tla mo hlaba gatee ya ba moka. Go ka se hlokege gore ke bušeletše.” 9 Eupša Dafida a re go Abishai: “O se ke wa mo gobatša, ka gobane ga go na yo a ka gobatšago motlotšwa wa Jehofa gomme a se be le molato.” 10 Dafida a re: “Ke ikana ka Jehofa yo a phelago gore Jehofa o tla mo otla, goba ka letšatši le lengwe o tlo hwa goba o tla ya ntweng gomme a bolawa. 11 Jehofa a ka se ntumelele gore ke otle motlotšwa wa Jehofa! Bjale ke kgopela gore o tšee lerumo leo le lego kgauswi le hlogo ya gagwe le sekupu sa meetse re sepele.” 12 Ke moka Dafida a tšea lerumo le sekupu sa meetse tšeo di bego di le kgauswi le hlogo ya Saulo gomme ba sepela. Ga go na yo a ba bonego goba yo a ilego a tsoga, ka gobane Jehofa o be a ba robaditše boroko bjo bogolo. 13 Ke moka Dafida a tshela moedi gomme a ema godimo ga thaba yeo e bego e le kgojana. Magareng ga bona go be go na le sekgoba se segolo.
14 Dafida a goeletša mašole a Saulo le Abenere morwa wa Nere a re: “Abenere na o a nkwa?” Abenere a araba a re: “O mang wena o goeletšago kgoši?” 15 Dafida a re go Abenere: “Na ga o monna yo matla? Ke mang yo a swanago le wena Isiraeleng? Ke ka baka la’ng o se wa leta kgoši mong wa gago? Ka gobane yo mongwe wa mašole o be a tlile kampeng bošego go tlo bolaya kgoši mong wa gago. 16 Selo seo o se dirilego ga se botse. Ke ikana ka Jehofa Modimo yo a phelago gore ruri le swanetše go hwa, ka gobane ga se la leta kgoši mong wa lena, motlotšwa wa Jehofa. Bjale lebelela! Lerumo la kgoši le sekupu sa meetse tšeo di bego di le kgauswi le hlogo ya gagwe di kae?”
17 Ke moka Saulo a tseba lentšu la Dafida gomme a re: “Na lentšu le ke le kwago ke la gago Dafida morwa wa ka?” Ke moka Dafida a re: “Ee ke lona kgoši mong wa ka.” 18 Dafida a buša a re: “Mong wa ka, ke ka baka la’ng o rakediša nna mohlanka wa gago? Ke dirile’ng, gona ke sentše’ng? 19 Kgoši mong wa ka, ke kgopela o theetše seo nna mohlanka wa gago ke nyakago go se bolela: Ge e ba e le Jehofa yo a go hlohleleditšego go lwa le nna, gona anke a amogele sebego sa ka sa mabele. Eupša ge e ba e le batho ba go hlohleleditšego, gona anke Jehofa a ba otle ka gobane lehono ba nthakile gore ke se be gotee le batho* ba Jehofa, ba re: ‘Sepela o yo hlankela medimo e mengwe!’ 20 Anke o se ke wa dumelela madi a ka a tšhollelwa fase kgole le Jehofa ka gobane kgoši ya Isiraele e ile go nyakana le nna tše e kego e nyakana le letsetse, le tše e kego e nyakana le nonyana ya naga dithabeng.”
21 Ka morago Saulo a re: “Ke dirile sebe. Boa, Dafida morwa wa ka, ka gobane nka se sa go kweša bohloko, ka ge o tšere bophelo bja ka bo le bohlokwa lehono. Ke a dumela gore ke dirile dilo tša bošilo e bile ke dirile phošo e kgolo kudu.” 22 Dafida a re: “Lerumo la kgoši šele. Anke yo mongwe wa banna bao o nago le bona a tle mo a tle a le tšee. 23 Jehofa o tla putsa yo mongwe le yo mongwe yo a lokilego le yo a botegago ka gobane Jehofa o be a mphile wena lehono eupša nna ka bona go sa swanela gore ke gobatše motlotšwa wa Jehofa. 24 Ka ge ke babaletše bophelo bja gago lehono, anke Jehofa a ntšhireletše a be a dire gore ke se ke ka welwa ke masetlapelo” 25 Saulo a re go Dafida: “Anke Modimo a go šegofatše wena Dafida morwa wa ka. Ruri o tlo dira dilo tše dikgolo gomme o tla atlega dilong ka moka tše o di dirago.” Ke moka Dafida a sepela gomme Saulo a boela gae.