Lefitiko

20 Jehofa a tšwela pele a bolela le Moshe a re: 2 “O botše Baisiraele o re: ‘Moisiraele le ge e le ofe le motho yo e sego Moisiraele yo a dulago nageng ya gabo lena, yo a ka neelago bana ba gagwe go modimo yo a bitšwago Mmoleke, a bolawe. Setšhaba se mo kgatle ka maswika. 3 Nna ke tla otla motho yoo, gomme ka mo fediša setšhabeng sa gabo. Ka gobane o neetše bana ba gagwe go Mmoleke, e le gore a šilafatše lefelo la ka le lekgethwa le go senya leina la ka le lekgethwa. 4 Ge e ba setšhaba se itira eka ga se bone motho yoo ge a neela bana ba gagwe go Mmoleke, gomme sa se mmolaye, 5 gona nna ke tla otla motho yoo le lapa la gagwe. Ke tla fediša motho yoo le batho ka moka bao ba mo latelago ka go rapela* Mmoleke.

6 “‘Ge e ba motho a sa mpotegele* ka gore a ye go batho bao ba lekago go boledišana le bahu le go bao ba rego ba kgona bolela dilo tšeo di tlago go direga nakong e tlago, ke tla mo otla ka ba ka mo fediša setšhabeng sa gabo.

7 “‘Le hlwekeng le be ba bakgethwa ka gobane ke nna Jehofa Modimo wa lena. 8 Le phele ka melao ya ka le be le e latele. Ke nna Jehofa yo a le hlwekišago.

9 “‘Ge e ba go ka ba le motho yo a rogago tatagwe le mmagwe, motho yoo a bolawe. Ka ge a rogile tatagwe le mmagwe, o ikarabela* ka lehu la gagwe.

10 “‘Bjale ge monna a ka robala le mosadi wa monna yo mongwe, ke gore a hlotlola le mosadi wa monna yo mongwe, a bolawe, go bolawe monna yoo le mosadi yoo. 11 Monna yo a robalago le mosadi wa tatagwe o dira gore tatagwe a nyatšege. Bobedi bja bona ba bolawe. Ba ikarabela ka lehu la bona. 12 Ge monna a ka robala le ngwetši ya gagwe, bobedi bja bona ba bolawe. Ba tshetše molao wa tlhago. Ba ikarabela ka lehu la bona.

13 “‘Ge monna a ka robala le monna yo mongwe go swana le ka mokgwa wo monna a robalago le mosadi ka gona, bobedi bja bona ba dirile selo se se šišimišago, ba bolawe. Ba ikarabela ka lehu la bona.

14 “‘Ge monna a ka nyala mosadi gomme a robala le mmago mosadi yoo, ke selo se se šišimišago. Ba bolaye monna yoo le basadi bao gomme ba ba fiše ka mollo, e le gore boitshwaro bjo bo šišimišago bo se ke bja tšwela pele gare ga lena.

15 “‘Ge monna a ka robala le phoofolo, a bolawe gomme le bolaye le phoofolo yeo. 16 Ge mosadi a ka robala le phoofolo, le bolaye mosadi yoo gotee le phoofolo yeo. Monna yoo le mosadi yoo ba ikarabela ka lehu la bona.

17 “‘Ge monna a ka robala le kgaetšedi ya gagwe, e lego morwedi wa tatagwe goba morwedi wa mmagwe, seo ke selo se se šišimišago. Ka gona ba bolawe pele ga setšhaba. Monna yoo o dirile gore kgaetšedi ya gagwe e nyatšege. A ikarabele bakeng sa molato wa gagwe.

18 “‘Ge monna a ka robala le mosadi nakong ya ge a bona kgwedi, bobedi bja bona ga se ba hlompha madi a mosadi yoo. Ka gona ka moka ga bona ba bolawe.

19 “‘O se ke wa robala le mmamogolo wa gago, goba mmane wa gago goba rakgadi wa gago, ka gobane ba tswalane le wena. Batho bao ba ikarabele ka molato wa bona. 20 Monna yo a robalago le mosadi wa ramogolo wa gagwe goba wa rangwane wa gagwe, o dira gore ramogolo wa gagwe goba rangwane wa gagwe a nyatšege. Ba ikarabele ka sebe sa bona. Ga se ba swanela go ba le bana, e bile ba bolawe. 21 Ge monna a ka robala le mosadi wa buti wa gagwe goba moratho wa gagwe, seo ke selo se se šišimišago. O dirile gore ngwanabo a nyatšege. Ba se be le bana.

22 “‘Le phele ka melao ya ka gomme le latele ditaelo tša ka ka moka, e le gore ke se ke ka tla ka le raka nageng yeo ke le išago go yona. 23 Le se ke la phela go swana le batho ba ditšhaba tšeo ke tlo di rakago nageng yeo ke tlo le neago yona. Ka gobane ba dirile dilo tše ka moka e bile ba a ntšhišimiša. 24 Ke ka baka leo ke le boditšego gore: “Le tla tšea naga ya bona la dula go yona gomme ke tla le nea yona gore e be ya lena, e lego naga yeo e elago maswi le todi ya dinose. Ke nna Jehofa Modimo wa lena yo a le kgethilego ditšhabeng tše dingwe.” 25 Le tsebe phapano magareng ga phoofolo ya go hlweka le yeo e sego ya hlweka, le magareng ga nonyana ya go hlweka le yeo e sego ya hlweka. Le se ke la itšhilafatša ka phoofolo, nonyana le selo le ge e le sefe seo se sepelago mo mobung, e lego dilo tšeo ke le boditšego gore ga se tša hlweka. 26 Le beng ba bakgethwa go nna ka gobane nna Jehofa ke yo mokgethwa. Ke le kgetha gare ga ditšhaba gore le be ba ka.

27 “‘Ge e le monna goba mosadi yo a lekago go boledišana le bahu goba yo a rego o kgona go bolela dilo tšeo di tlago go direga nakong e tlago, a bolawe. A kgatlwe ka maswika. O ikarabela ka lehu la gagwe.’”