Jesaya
47 Wena kgarebe yeo e lego morwedi wa Babele,
Theoga o dule leroleng.
Wena morwedi wa Bakaladea,
Dula fase moo go se nago setulo sa bogoši.
Ka gobane batho ba ka se sa go bona o le motho yo boletiana e bile o swanetše go neneketšwa.
2 Tšea tšhilo o šile bupi.
Apola lešira la gago.
Hlobola sekhethe sa gago, o khupolle maoto a gago.
Tshela dinoka.
3 O tla hlobolwa,
Batho ba go bonela.
Ke tla itefeletša gomme ga go na motho yo a ka nthibelago.
5 Wena morwedi wa Bakaladea,
Dula fase o ikhomoletše gomme o ye leswiswing.
Batho ba ka se sa go bitša Kgošigadi ya Mebušo.
6 Ke ile ka galefela batho ba ka.
Ka dira gore batho ba ka, e lego bjona bohwa bja ka,
Ba nyatšege, gomme ka ba neela go wena.
Eupša ga se wa ka wa ba gaugela.
Gaešita le batšofadi o ile wa ba imetša ka morwalo o boima.
7 O itše: “Ke tla dula ke le Kgošigadi go ya go ile.”
Ga se wa ka wa naganišiša ka dilo tše,
E bile ga se wa ka wa naganišiša ka gore mafelelo a tšona e tlo ba eng.
8 Ekwa se, wena mosadi yo a ratago menate,
Yo a dutšego a šireletšegile, le yo a rego ka pelong ya gagwe:
“Ke nna ke nna, ga go na yo mongwe.
Nka se be mohlologadi,
E bile nka se tsoge ke lobile bana.”
9 Eupša dilo tše tše pedi di tla go wela ka tšhoganetšo, ka letšatši letee feela.
O tla loba bana e bile wa ba mohlologadi.
Masetlapelo a a tla go wela ka bontšhi
Ka gobane o a loya e bile o foša batho ka meleko.
10 O be o dira batho dilo tše mpe, eupša o nagana gore wena di ka se go diragalele.
O itše: “Ga go na motho yo a bonago seo ke se dirago.”
Bohlale bja gago le tsebo ya gago ke tšona di go lahleditšego,
Gomme ka pelong ya gago o re: “Ke nna ke nna, ga go na yo mongwe ntle le nna.”
11 Eupša o tla welwa ke masetlapelo,
Le boloi bja gago bo ka se kgone go a thibela.
O tla welwa ke madimabe, gomme o ka se kgone go a thibela.
O tlo fedišwa ka ponyo ya leihlo o se wa nagana.
12 Gona tšwela pele o loya e bile o foša batho ka meleko,
E lego dilo tšeo o bego o dutše o di dira go tloga o sa le yo moswa.
Mohlomongwe o ka holega,
Mohlomongwe o ka kgona go tšhoša batho.
13 Baeletši ba gago ba bantšhi ba go lapišitše.
Bjale a ba emelele gomme ba go phološe,
Bona bao ba rapelago dilo tšeo di lego magodimong,
E lego bona bao ba lebelelago dinaledi,
Bao ge go tšwelela ngwedi o moswa ba bolelago dilo tšeo di tlago go go diragalela.
14 Bonang! Ba swana le mahlaka.
Mollo o tla ba tšhuma.
Ba ka se kgone go iphološa kgabong ya mollo.
Wo ga se mollo wo o swanago le magala wo o ka dirago gore ba dule ba ruthetše,
E bile ga se mollo wo motho a ka o orelago a iketlile.
15 Le baloi bao o bego o loya le bona ba tlo ba bjalo go wena,
E lego bona bao o bego o dirišana le bona go tloga bosweng.
Ba tlo ralala, gomme yo mongwe le yo mongwe a ikela ka tsela ya gagwe.
Ga go na yo a tlago go go phološa.