Jobo
30 “Gona bjale ke segwa le
Ke banna bao ke ba fetago,
Bao botatago bona ke bego ke ba nyatša,
Gomme nka se ba dumelele le gore ba batamele dimpša tšeo di hlokomelago mohlape wa ka wa dinku.
2 Matla a bona a be a tla nkhola ka eng?
Ba feletšwe ke matla.
3 Ga ba na matla ka ge ba sa hwetše dilo tšeo ba di hlokago le ka baka la tlala.
Ba ja dilo tšeo ba di hwetšago nageng yeo e omilego,
Yeo e bego e šetše e senyegile e bile e se na selo.
4 Ba kga dimela tša nageng tšeo di nago le letswai.
Ba ja medu ya mehlare ya mehlopi.
5 Ba rakwa setšhabeng.
Batho ba ba rakediša go swana le mahodu.
6 Ba dula meeding yeo e theogelago,
Ka meleteng le ka maswikeng.
7 Ba goeletša ba le dihlašaneng,
Gomme ba kgobokana gare ga mehlašana yeo e hlabago.
8 Barwa ba batho bao ba hlokago tlhaologanyo le bao ba hlokago maina,
Ba rakilwe nageng.
9 Eupša gona bjale ba a nkwera le ge ba opela,
E bile ba a ntlontlolla.
10 Ba a ntšhišingwa e bile ba sepelela kgole le nna,
Le gona ga ba tšhabe go ntshwela ka mare sefahlegong.
11 Ka gobane Modimo o dirile gore ke se ke ka kgona go itwela gomme a nkokobetša,
Ba ntlhasela ntle le go senya nako.
12 Ba eme ka lehlakoreng la ka la le letona bjalo ka sehlopha sa batho bao ba nyakago go ntlhasela.
Ba dira gore ke tšhabe,
Gomme ba mpeela melaba tseleng yeo ke sepelago go yona e le gore ba mphediše.
14 Ba tla bjalo ka ge eka ba tsena ka lešoba le legolo lebotong,
Ba šwahlela lefelong leo le senyegilego.
15 Ke tšhogile,
Seriti sa ka se nyameletše bjalo ka lerole leo le tšewago ke phefo.
Kholofelo ya ka ya gore ke tla phološwa e nyamelela go swana le leru.
16 Gona bjale ke kgauswi le go hwa,
Ke tlaišega letšatši le lengwe le le lengwe.
17 Bošego marapo a ka a opa gabohloko,
Le bohloko bjo ke bo kwago ga bo fele.
18 Seaparo sa ka se sentšwe kudu,
Go swana le kholoro ya seaparo, se a nkgama.
19 Modimo o ntahletše lerageng,
Ke fetogile lerole le melora.
20 Ke llela gore o nthuše wena Modimo, eupša ga o nkarabe.
Ke eme pele ga gago, eupša wena o no ntebelela.
21 O mphetogetše gasehlogo,
O ntlhasela ka matla a gago ka moka.
22 Go bjalo ka ge eka o a nkuka gomme wa dira gore ke tšewe ke phefo,
Ke moka wa nkiša godimo le fase ka gare ga ledimo.
23 Ka gobane ke a tseba gore o tlo dira gore ke hwe,
Gomme wa nkiša lefelong leo motho yo mongwe le yo mongwe a tlago go feleletša a eya go lona.
24 Eupša ga go na motho yo a tlago go hlasela motho yo a nago le mathata
Ge a kgopela thušo nakong ya ge a tlaletšwe.
25 Na ga se ka llela bao ba wetšwego ke mathata?
Na ga se ka kwešwa bohloko ke modiidi?
26 Le ge ke be ke letetše go diragalelwa ke dilo tše dibotse, ke ile ka diragalelwa ke dilo tše mpe.
Ke be ke letetše seetša, eupša go ile gwa tla leswiswi.
27 Ke be ke dula ke tshwenyegile,
E bile ka matšatši a mangwe ke tlaišega.
28 Ke sepelasepela ke nyamile, e bile ga go na seetša sa letšatši.
Ke ema gare ga setšhaba, gomme ka lla ke kgopela thušo.
29 Go bjalo ka ge eka ke ngwanabo diphukubje,
Le mogwera wa barwedi ba mpšhe.
30 Letlalo la ka le fetogile le leso e bile le a hlobega,
Marapo a ka a fiša ka baka la bolwetši bja ka.
31 Harepa ya ka e letšwa feela ge go lliwa,
Gomme naka ya ka yona, e letšwa ge go na le bao ba llago.