Go Tshela Lewatle le Lehwibidu

BONA seo se diregago mo! Ke Moshe o otlolletše lepara la gagwe Lewatleng le Lehwibidu. Bao ba nago le yena ke Baisiraele. Eupša Farao le madira a gagwe ka moka ba kgangwa ke lewatle. Anke re bone kamoo se se diregilego ka gona.

Bjalo ka ge re ithutile, Farao o ile a botša Baisiraele gore ba tloge Egipita ka morago ga ge Modimo a tlišeditše Baegipita kotlo ya lesome. Go ile gwa tloga banna ba Baisiraele bao e ka bago ba 600 000 gotee le basadi ba bantši le bana. Le gona batho ba bangwe ba bantši bao ba ilego ba dumela go Jehofa le bona ba ile ba tloga le Baisiraele. Ka moka ga bona ba ile ba tloga le dinku tša bona le dipudi le dikgomo.

Pele ga ge Baisiraele ba ka tloga Egipita, ba ile ba kgopela Baegipita diaparo le dilo tše dingwe tšeo di dirilwego ka gauta le silifera. Baegipita ba be ba tšhogile kudu ka baka la kotlo ya mafelelo yeo e bego e ba wetše. Ka gona ba ile ba nea Baisiraele dilo ka moka tšeo ba bego ba di kgopela.

Ka morago ga matšatši a sego kae, Baisiraele ba ile ba fihla Lewatleng le Lehwibidu. Ba khutša moo. Ge ba sa le moo, Farao le banna ba gagwe ba itshola gore ba dumeletše Baisiraele go tloga. Ba re: ‘Re lesitše makgoba a rena a tloga!’

Ka gona Farao o ile a fetoša monagano gape. Gateetee a namela koloi ya gagwe ya ntwa gomme a tšea le bahlabani ba gagwe. Ba rakediša Baisiraele ka dikoloi tše di hlaotšwego tše 600 gotee le dikoloi tše dingwe tša ntwa tša Egipita.

Ge Baisiraele ba bona Farao le bahlabani ba gagwe ba ba rakediša, ba tšhoga kudu. Go be go se na moo ba ka tšhabelago gona. Lewatle le Lehwibidu le be le le ka thoko e nngwe ya bona gomme Baegipita ba etla ka thoko e nngwe. Eupša Jehofa o ile a bea leru magareng ga batho ba gagwe le Baegipita. Ka gona Baegipita ba be ba sa kgone go bona Baisiraele gore ba ba hlasele.

Bjale Jehofa a botša Moshe gore a emišetše lepara la gagwe Lewatleng le Lehwibidu. Ge a dirile bjalo, Jehofa a dira gore phefo e matla ya bohlabela e foke. Meetse a lewatle a arogana gomme a ema ka mahlakoreng a mabedi.

Ke moka Baisiraele ba phatša gare ga lewatle ba sepela mo go omilego. Go ile gwa tšea diiri tše dintši gore batho bao ba dimilione gotee le diruiwa tša bona ka moka ba tshelele ka mošola wa lewatle ba bolokegile. Mafelelong Baegipita ba ile ba kgona go bona Baisiraele gape. Makgoba a bona a be a tšhaba! Baegipita ba kitimela ka lewatleng ba šala Baisiraele morago.

Ge Baegipita ba tsene ka lewatleng, Modimo a khwamola maotwana a dikoloi tša bona. Ba thoma go tšhoga kudu gomme ba re: ‘Jehofa o lwela Baisiraele. A re tšhabeng!’ Eupša nako e be e šetše e ba šiile.

Ka yona nako yeo, Jehofa a botša Moshe gore a emišetše lepara la gagwe Lewatleng le Lehwibidu, go etša ge o bone seswantšhong seo se lego letlakaleng le le fetilego. Ge Moshe a dirile bjalo, meetse ao a boela sekeng gomme a khupetša Baegipita le dikoloi tša bona tša ntwa. Bahlabani bao ka moka ba Baegipita ba be ba tsene ka lewatleng ba latela Baisiraele. Ga go le o tee wa bona yo a ilego a phologa!

Ruri batho ba Modimo ka moka ba be ba thabile kudu ka ge ba phološitšwe! Banna ba Baisiraele ba opela koša ya go leboga Jehofa ba re: ‘Jehofa o fentše. O lahletše dipere le banamedi ba tšona ka lewatleng.’ Miriamo kgaetšedi ya Moshe a swara moropa wa gagwe gomme basadi ka moka ba mo latela ba letša meropa ya bona. Ge ba dutše ba bina ba thabile, le bona ba be ba opela koša yeo banna bao ba bego ba e opela, ba re: ‘Jehofa o fentše. O lahletše dipere le banamedi ba tšona ka lewatleng.’