Badiredi ba Nako e Tletšego ba Eta Pele Modiro wa Boboledi

Mo gongwe motho wa pele go Dihlatse tša Jehofa yo a ilego a go etela e be e le modiredi wa mmulamadibogo wa nako e tletšego goba moromiwa. Ka ge Dihlatse tša Jehofa di se na bodiredi bjo bo lefelelwago, mo gongwe o ka ba o ile wa makala kamoo batho ba ba kgonago go ba bodireding ka nako e tletšego.

Dihlatse tša Jehofa ka moka bao ba ineetšego le go kolobetšwa ke badiredi, eupja ba bantši ba bona ba na le boikarabelo bja lapa goba boikarabelo bjo bongwe bjo bo ba thibelago gore ba dirišetše diiri tše di oketšegilego mo bekeng bodireding bja bona. Lega go le bjalo, Dihlatse tše dikete lefaseng ka moka di ile tša beakanya mokgwa wa bona wa bophelo e le gore ba akaretše ditshenyagalelo tša bona tšeo di fokoditšwego ka modiro wa ka thoko gomme ba neele diiri tše 1 000 goba go feta moo ka ngwaga bodireding.

Ke therešo, badiredi ba babulamadibogo ba nako e tletšego ga ba na tšhelete e ntši kudu yeo ba ka e dirišago, eupja go bona ye ke tsela ya go tsoma Mmušo wa Modimo pele. Ba hwetša ditšhegofatšo tše dintši. Go kgona go bolela le ba bangwe ka Lentšu la Modimo ka diiri tše 90 goba go feta moo ka kgwedi e tloga e le phihlelo e botse. Modiredi wa nako e tletšego o kaonefatša tsebo ya gagwe bodireding e bile o na le nako ya go boela go bao ba thabelago ka tshwanelo. Se se tšweletša mafelelo a kgothatšago kudu. Ba na le seo ba se nyakago nameng gomme ba bile ba leboga kudu seo ba nago le sona.—Mateo 6:33.

Ka February 1943 Mokgatlo wa Watch Tower o ile wa hloma Sekolo sa Beibele sa Watchtower sa Gilead. Morero e be e le go tlwaetša badiredi bao ba nago le phihlelo ba nako e tletšego gore ba dire e le baromiwa dinageng di šele. Thuto ya dikgwedi tše hlano e bopilwe ka thuto e matla ya go ithuta Beibele, histori ya Beibele, phuthego ya Jehofa gotee le ditaba tše di tswalanago le tše tša go lokišetša tirelo tšhemong ya dinageng di šele.

Mokgatlo o lefelela ba ba lego dikabelong tša boromiwa tšhelete ya dinamelwa le go lokišetša dijo tše bose le mafelo a bodulo a mabotse magaeng a boromiwa. O bile o nea moromiwa o mongwe le o mongwe tšhelete e nyenyane ya thušo bakeng sa ditshenyagalelo tša motho. Baromiwa ba dira karolo ya bona modirong wa legae ka go ya mabenkeleng, go lokišetša dijo le go hlwekiša. Ka tlhokomelo ye e lekanego baromiwa ba kgona go dirišetša diiri tše ka bago tše 140 ka kgwedi boboleding bja ntlo le ntlo le go swara dithuto tša Beibele le batho bao ba thabelago.

Ba bantši ba baromiwa ba ba abelwa kgole le magae a bona le malapa a bo bona ka dikhilomithara tše dikete. Ba ile ba swanelwa ke go dira dipeakanyo gore ba phele bophelo bjo bo sa swanego gotee le go phela boemong bjo bo sa swanego, go dira dipeakanyo mekgweng e mefsa ya go ja, boemong bja leratadima bjo bo sa swanego le go bolela leleme le lengwe. Ba dira modiro wo ka gobane ba rata batho gomme ba na le kganyogo e matla ya go ba thuša gore ba ithute ka Mmušo wa Modimo.

Go tloga ka 1943 go ya go 1985 Sekolo sa Beibele sa Watchtower sa Gilead se ile sa ba le diklase tše 80 gomme sa romela baromiwa ba fetago 6 000 ka ntle. Ba ka tlase ga tlhahlo ya Mokgatlo ba ile ba eta pele koketšego ya thuto ya Beibele Afrika ka moka, Amerika ya Magareng le ya Borwa, Dinaga tša ka Bohlabela le Pacific ya ka Borwa, gomme ba dirile go gontši kua Yuropa.

Go sa šetšwe gore Dihlatse tša Jehofa ba ba bodireding ka nako e tletšego e le babulamadibogo goba e le baromiwa goba ba dira ka nakwana, ruri ba dira ka ntle le go hwetša moputso wa tša ditšhelete. Ba diriša nako ya bona ka noši le tšhelete, gomme ba ikgafa gore ba thuše ba bangwe go hwetša tsebo yeo e išago bophelong bjo bo sa felego.—Johane 17:3.

• Ba bangwe ba Dihlatse tša Jehofa ba kgona bjang go neela nako ya bona e tletšego bodireding, gomme ke ka baka la’ng ba dira se?

• Badiredi ba tlwaeletšwa bjang modiro wa boromiwa?

• Baromiwa ba thekgwa bjang kabelong ya bona ya dinageng di šele?

[Pictures on page 22]

Le letshadi: Phapoši ya Sekolo sa Gilead, Brooklyn, N.Y., U.S.A.

Le letona: Moromiwa o ruta Lentšu la Modimo kua Papua New Guinea

[Pictures on page 23]

Badiredi ba babulamadibogo le baromiwa ba bolela Lentšu la Modimo dinageng tše fapa-fapanego

Brazil

Dominican Republic

Spania

Sierra Leone, Afrika