Kamoo go ka Dirišwago ka Gona “Go Boledišana ka Mangwalo”

Mohlala o ka latelwago ge go thušwa ba bangwe gore ba kwešiše Beibele, ke wo o neilwego ke Jesu Kriste le baapostola ba gagwe. Jesu ge a be a araba dipotšišo, o tsopotše mangwalo gomme ka dinako tše dingwe o dirišitše diswantšho tše di swanetšego tšeo di bego di ka thuša batho ba dipelo tše di botegago gore ba amogele seo Beibele e se bolelago. (Mat. 12:1-12) Moapostola Paulo o ile a go dira mokgwa go ‘boledišana ka Mangwalo, go hlalosa le go hlatsela ka ditšhupetšo’ seo a bego a se ruta. (Dit. 17:2, 3) Taba e lego ka pukung ye e ka go thuša gore o dire se se swanago.

Go Boledišana ka Mangwalo go e na le gore e akaretše ka bophara taba e nngwe le e nngwe, ruri e ela hloko kudu dipotšišo tšeo mo nakong ye di botšišwago ke batho ba bantši.

Puku ye ga se ya rulaganyeletšwa morero wa go thuša motho lege e le ofe go “fenya dingangišanong” tšeo a bago le tšona le batho bao ba sa hlomphego therešo. Go e na le moo, e nea tsebišo e holago yeo e rulaganyeditšwego gore e dirišwe tabeng ya go boledišana le batho bao ba tlago go go dumelela gore o dire bjalo. Ba bangwe ba bona mo gongwe ba ka botšiša dipotšišo tšeo ba ka ratago e le ka kgonthe go hwetša dikarabo tše di kgotsofatšago tša tšona. Ba bangwe ge go dutše go boledišanwa le bona, mo gongwe ba ka bolela feela tumelo ya bona gomme mo gongwe ba dira bjalo ka go kgodišega. Eupja na ke batho ba ba hlaloganyago bao ba ratago go theetša kgopolo e nngwe? Ge e ba go le bjalo, gona o ka abelana le bona seo Beibele e se bolelago gomme o dira seo ka go kgodišega gore se tla amogelwa dipelong tša barati ba therešo.

O ka hwetša bjang pukung ye taba e kgethegilego yeo o ratago go e hwetša? Gantši o tla e hwetša gabonolo kudu ka go bula ka go lebana hlogong ya ditaba e kgolo yeo e emelago taba yeo e bolelwago. Dipotšišo tše dikgolo di bonolo go hwetšwa tlase ga dihlogo ka moka tša ditaba tše dikgolo; di ngwadilwe ka mongwalo o mokoto wo o fihlago mafelelong a letlakala ka lehlakoreng la ntsogošo. Ge e ba o sa hwetše seo o se nyakago kapejana, gona e ya Tlhatlamanong yeo e lego ka mafelelong a puku.

Go lokišeletša poledišano e sa le pele go hola ka mehla. Eupja ge e ba o sešo wa tlwaela dikarolo tše dingwe tša puku, gona o ka tšwela pele o dutše o di diriša. Bjang? Ge o nyaka potšišo yeo gantši e dumelelanago le ntlha yeo o ratago go e bolela, gona lebelela dihlogwana lege e le dife tšeo di lego tlase ga yona. Dihlogwana tše di ngwadilwe ka mongwalo o mokoto o sekamego, gomme di bontšhitšwe tlase ga dipotšišo tšeo di bolelago ka tšona. Ge e ba o šetše o e-na le tsebo ya taba, gona go boeletša dihlogwana tšeo gomme gatee-tee wa lebelela dintlha tše dingwe tšeo di lego tlase ga tšona mo gongwe e ka ba sohle seo o se nyakago, ka gobane di nea taba e holago yeo mo gongwe e ka dirišwago. O se ke wa dika-dika go bolela dintlha tšeo ka mantšu a gago.

Na o bona gore o nyaka mo gogolo, ee, mo gongwe mangwalo a lebantšego, ntlha yeo o ka e dirišago mabapi le mangwalo ao, diswantšho tše itšego tšeo di ka go thušago gore o bontšhe molaleng tlhaloganyo ya seo Beibele e se bolelago, le tše dingwe? Ge e ba go le bjalo, gona mo gongwe o ka rata go bontšha motho yo o bolelago le yena seo o nago le sona ka pukung ye, gomme le bale gotee karolo yeo e lego mabapi le potšišo yeo a e botšišitšego. Gaešita lege e ba o sešo wa ithuta taba e sa le pele, fela o ka e diriša gore o nee karabo e kgotsofatšago. Ditaba ka moka di ka mo pukung ye gomme di boletšwe ka mokgwa o bonolo le o kwešišegago.

Gopola gore puku ye ke thušo feela. Beibele ke yona yeo e dirišwago. Yeo ke Lentšu la Modimo. Ge ditsopolo ka pukung ye e le tšeo di tšwago Beibeleng, gona bolela kudu ka taba ye bathong bao o boledišanago le bona. Kae le kae mo go kgonegago, hle ba kgopele gore ba tšee Dibeibele tša bona gomme ba bule mangwalo e le gore ba tle ba bone gore seo o se bolelago se ka Dibeibeleng tšeo e lego tša bona. Ge e ba diphetolelo tše dingwe tša Beibele tšeo di dirišwago kudu di tšweletša dikarolo tše dikgolo tša ditemana tše dingwe ka tsela e arogilego, gona gantši go elwa tše hloko gomme ditsela tšeo di tšweletšwago ka tšona diphetolelong tšeo di sa swanego di neetšwe gore di bapišwe.

Ka go dumelelana le mohlala o beilwego ke moapostola Paulo wa go bolela ka aletare yeo e bego e le ya “Modimo wa xo se Tsebye” le ka go tsopola ditaba tše dingwe tše di bego di tlwaetšwe ge a be a bolela go ba-Athene (Dit. 17:22-28), ruri puku ye e diriša ditsopolo tše dintšinyana tše di tšwago historing ya lefase, disaeklopedieng, dipukung tša bodumedi tša ditšhupetšo le go di-lexicon tša maleme a Beibele. Ka gona, go e na le go baka dingangišano ge e le ka mathomo a mekgwa ya bodumedi bja maaka, go tšweletšwa ga dithuto tše dingwe le seo se bolelwago ke mantšu a Sehebere le a Segerika, ruri puku e bontšha mabaka a dipolelo tšeo di bolelwago. Lega go le bjalo, e dira gore go hlokomelwe Beibele ka ge e le mothopo o mogolo wa therešo.

Dikarolo tša mathomo tša puku ye ka go ba thušo e nngwe tabeng ya go bula tsela ya go abelana therešo ya Beibele le ba bangwe, ruri di nea lelokelelo la “Matseno a ka Dirišwago Bodireding bja Tšhemo” le dikeletšo tše di rulagantšwego mabapi le “Kamoo mo Gongwe o ka Arabago ka Gona Bao e ka Bago Bašitiši ba Poledišano.” Ba bangwe ba bantši bao e ka bago “bašitiši ba poledišano” ke ba tumelo e itšego, gomme se se bolelwa bofelong bja karolo e nngwe le e nngwe e kgolo yeo e dirišanago le tumelo ya bona. Ga go nyakege gore o sware dikarabo tše ka hlogo, eupja ka ntle le pelaelo o tla hwetša e le mo go holago go ela hloko lebaka leo ba bangwe ba di hweditšego e le tše di thušago kudu; gomme o bolele dikgopolo ka mantšu a gago.

Go dirišwa ga puku ye go swanetše go go thuša gore o hlagolele go kgona go bolela ka Mangwalo, le go a diriša ka matla ge o thuša ba bangwe go ithuta ka “matete a Modimo.”—Dit. 2:11.