Go Rapela Bagolo-golo

Tlhaloso: Mokgwa wa go hlompha le go godiša bagolo-golo ba ba hwilego (ka mokgwa wa tirelo goba ka tsela e nngwe) ka go dumela gore ba phela lefelong le lengwe leo le sa bonagalego le gore ba ka thuša goba ba tlišetša ba ba phelago kotsi, gomme ka gona ba swanetše gore ba latšwe. Ga se thuto ya Beibele.

Na bagolo-golo ba ba hwilego ba ela hloko seo batho ba ba phelago ba se dirago, gomme na bagolo-golo ba ba kgona go thuša ba ba phelago?

Mmo. 9:5: “Ba ba phelaxo ba tseba xore ba tlo hwa; ’me xo bahu xa xo se se tsebyaxo.”

Jobo 14:10, 21: “Motho xe a ile, ó kae xomme? . . . Xe bana ba xaxwe ba ka rêtwa; yêna xa a sa tseba.”

Ps. 49:10, 17-19: “Ba bohlale ba a hwa; bohle, le mašilô le ditlaêla, thoto ya bôná e šalêla ba šele. . . . Lehung a ka se yê à swere selô; lehumô la xaxwe le ka se foloxe lè mo šetše nthaxo. . . . Ó tlo ya xo ilexo meloko ya bô-rr’axwe, ba ba sa bonexo s’etša neng le neng.”

Na ga se therešo gore dijo tše di bewago aletareng goba lebitleng di dula moo di sa jewe? Na se ga se bontšhe gore bahu ga ba kgone go holwa ke tšona?

Bona gape le hlogo ya ditaba ya “Bonoge.”

Na go na le lebaka la go boifa gore bagolo-golo ba rena ba ba hwilego ba ka re gobatša?

Mmo. 9:5, 6: “’Me xo bahu . . . leratô la bôná, lehlôyô la bôná, lehufa la bôná, di fedile kxalê; xa ba sa na kabêlô neng le neng ya se se kaxo dirwa fá tlase xa letšatši.”

Na go na le karolo ya moya ya motho yeo e phologago lehu la mmele?

Hesek. 18:4, PK: “Bonang meoya ka moka ke ya-ka, byalo ka ge moya wa tatago motho ge e le wa-ka, moya wa morwagwe ke wa-ka le wona, moya o senyago ona o tlo hwa.” (Gape le Hes 18 temana ya 20)

Ps. 146:3, 4: “Se boteng maxoši e lexo bana ba batho, . . . môya wa motho o a tloxa, ’me yêna o boêla mmung wa xaxwe; mohla woo ké mo xo fêlaxo maanô a motho.”

Bo-ra-thutamahlale le dingaka ga go na bohlatse bjo ba bo hweditšego bja karolo lege e le efe e phelago ya motho yeo e phologago ge mmele o e-hwa.

Bona gape le matlakala 249-251, tlase ga hlogo ya ditaba ya “Lehu.”

Na o be o ka rata gore bana ba gago le ditlogolwana tša gago ba go hlomphe le go go rata ge o sa phela, goba gore ba dire ditirelo tša go latša bahu lebitleng la gago ka morago ga ge o hwile?

Ba-Ef. 6:2, 3: “Xodiša tat’axo le mm’axo, ké wôna molaô wa pele o naxo le kholofedišô ya xo re: O tlê O be le mahlatse, O phele xalelele lefaseng.” (Bana ba tlwaeditšwego ka melao ya motheo ya Beibele ba bontšha tlhompho e bjalo yeo e thabišago dipelo tša batswadi ba bona, ge ba sa dutše ba phela.)

Die. 23:22: “Kwaa tat’axo, yêna motswadi wa xaxo; ’me mm’axo xe a kxekotše, O se kê wa mo nyatša.”

1 Tim. 5:4: “Xe mohlôlôxadi a na le bana le xe e le ditloxolo, xo bôná-bao sa pele a e bê xo ithuta borapedi ka lapa; e bê xo leboxa batswadi ba bôná. Ké xôna xo thakxa le xo kxahla Modimo.”

Ge dinoge di bolela gore di nea melaetša e tšwago bahung, ruri ye gabotse-botse e-tšwa kae?

Jes. 8:19: “Xe ba ka re: Botšišang ba medimo, le ba maphala le didupe! Le tlo re: A sethšaba xa se botšiše Modimo wa sôna? A fa bahu ba ka botšišwa ditaba tša ba ba phelaxo?” (Na Modimo o be a ka re lemoša malebana le mokgwa o bjalo, ge e ba ruri o be o re dira gore re boledišane le baratiwa ba rena?)

Dit. 16:16: “Ka ’tšatši le lengwê xe re ya thapelong, ra xahlana le mosetsana e mongwê e a naxo le môya wa bonoxê, e a bexo a ruiša beng ba xaxwe xa-xolo ka xo noxa.”

Bona le matlakala 95-97, tlase ga “Bonoge.”

Borapedi bja rena bo swanetše go išwa go mang?

Luka 4:8: “Jesu a re: Ntloxêlê Sathane; xo ngwadilwe xwa thwe: O khunamêlê [Jehofa] Modimo wa xaxo, O dirêlê Yêna a nnoši.”

Joh. 4:23, 24: “Xo tla lebaka, le byale ké lôna, leo barapedi ba makxonthe ba tl’o xo rapêla Tate ka Môya le ka therešo. Le xôna Tate ó nyaka ba ba mo rapêlaxo ka mokxwa woo. Modimo ké Môya; xomme ba ba mo rapêlaxo ba tlo Mo rapêla ka môya le ka xo rereša.”

Ke kholofelo efe e lego gona ya go kopanywa ga nako e tlago ga ditho tša lapa go akaretša le tšeo di šetšego di hwile?

Joh. 5:28, 29: “Di se kê tša Le tlaba; xobane xo tla lebaka leo bohle ba lexo mabitleng ba tl’o xo kwa Lentšu la Morwa-Modimo ka lôna. Xomme ba tlo tšwa; ba ba dirilexo tše botse ba tlo tsoxa ba phela; ba ba dirilexo tše mpe ba tlo tsoxa ba lahlwa.”