Phuthego

Tlhaloso: Mokgatlo goba lekoko la batho bao maiteko a bona a rulaganyeditšwego modiro goba morero o itšego. Ditho tša phuthego di kopantšwe ke dithulaganyo tša taolo le melao goba ditaelo. Batho bao e lego dihlatse tše di ineetšego le go kolobetšwa tša Jehofa ba tla ka phuthegong ya Jehofa ka baka la go ikgethela ga bona, e sego ka baka la go belegelwa go yona goba go gapeletšwa lege e le gofe. Ba tlile ka phuthegong ya gagwe ya lefase ka baka la dithuto le mekgwa ya yona le ka baka la ge ba rata go ba le karolo modirong woo o e dirago.

Na Jehofa ruri o na le phuthego mo lefaseng?

Go araba potšišo ye, ela hloko se se latelago:

Na dibopiwa tša Modimo tša legodimo, e lego barongwa, di rulagantšwe?

Dan. 7:9, 10: “Ya re kè sa lebeletše, xwa bewa didulô, xwa dula Motála-wa-mabaka, wa kobô ya bošweu bya leswêla, wa meriri ya xo taxa bo-ka bôya bya nku; sedulô sa xaxwe ké kxabô ya mollô, se na le maotwana a xo tuka mollô. Noka ya mollô e hlaxa pele xa xaxwe; ó hlankêlwa ke ba dikete tše sekete. Baahlodi ba dula, mangwalô a phuthollwa.”

Ps. 103:20, 21: “Rêtang [Jehofa], lena Barongwa ba xaxwe, lena baxale ba matla ba xo dira ka Lentšu la xaxwe, ba xo theetša se a se bolêlaxo. Rêtang [Jehofa], lena madirá a xaxwe ohle, lena bahlanka ba xaxwe ba xo dira tše di mo kxahlaxo.” (“Madirá” ke sehlopha se se rulagantšwego.)

Modimo o ile a tliša bjang ditaelo go bahlanka ba gagwe lefaseng mehleng e fetilego?

Nakong ya ge barapedi ba Jehofa ba sa balwa ka menwana, ruri o ile a nea ditaelo go bao e bego e le dihlogo tša malapa ba swanago le Noage le Aborahama, gomme bona ba thoma go dira e le baboleledi ba Jehofa go malapa a bona. (Gen. 7:1, 7; 12:1-5) Nakong ya ge Jehofa a be a ntšha ba-Isiraele Egipita, ruri o ile a ba nea ditaelo ka Moše. (Ek. 3:10) Modimo kua Thabeng ya Sinai o ile a rulaganya batho gore e be setšhaba, gomme a nea melao le ditaelo tša go sepediša borapedi bja bona le ditswalano tša bona. (Ek. 24:12) O ile a tšweletša baperisita gore ba etelele pele ditabeng tša borapedi le go ruta batho melao ya Jehofa; ge nako e tšwela pele o ile a tšweletša le ka baporofeta gore ba nee keletšo le temošo e swanetšego bathong. (Doit. 33:8, 10; Jer. 7:24, 25) Ee, gaešita lege Jehofa a ile a theetša dithapelo tša barapedi ba gagwe, o ile a ba nea ditaelo ka thulaganyo ya phuthego.

Ge nako e be e batamela ya gore Jehofa a thome go dira gore barapedi ba therešo ba be gotee le yena ka Jesu Kriste, ruri Modimo o ile a mo romela lefaseng gore a tle a dire e le mmoleledi wa Gagwe. (Ba-Heb. 1:1, 2) Phuthego ya Bokriste ka go tšhollelwa ga moya o mokgethwa ka Pentekoste ya 33 Mehleng ya Rena, e ile ya tswalwa. Ka morago ga ge Jesu a boetše legodimong, phuthego ye e ile ya ba thulaganyo ya Jehofa ya go ruta le go rulaganya maiteko a Bakriste. Go be go e-na le balebeledi bao ba bego ba etelela pele diphuthegong tša lefelong leo, gomme sehlopha se se bušago se be se dira diphetho tše di nyakegago le go thuša go rulaganya modiro. Ruri, Jehofa o ile a tšweletša phuthego lefaseng yeo e dirilwego ka Bakriste ba therešo.—Dit. 14:23; 16:4, 5; Ba-Gal. 2:7-10.

Na mediro ya Jehofa ya tlholo e bonalago e bontšha gore ke Modimo wa thulaganyo?

Jes. 40:26: “Llalang Le bônê tša kwa xodimo; ké mang e a di hlodilexo, a di nthša byalo ka mohlape wo o badilwexo? a di bitša tšohle ka maina, mo xo boati byo bokaakaa xwa se hlôkwê le setee, ka xobane è le yo matla a maxolo.” (Dinaledi di dirilwe ka dihlopha tša melalatladi gomme di sepela ka go kwana gaešita lege dibopego tša tšona di sa swane. Dikgokolo di sepela go ya kamoo di laoletšwego ka gona ditseleng tša tšona. Dieleketrone tše di hwetšwago diathomong tša mehuta yohle le tšona di na le ditsela tša tšona. Sebopego sa dilo ka moka se latela mekgwa ya tša dipalo yeo e kwanago e le ka kgonthe mo go ilego gwa kgonega go bo-ra-thutamahlale go bolela e sa le pele ka go ba gona ga dilo tše dingwe pele ga ge ba ka di hwetša e le ka kgonthe. Tše ka moka di nea bohlatse bja thulaganyo yeo e lego e kgolo kudu.)

Na Beibele e bontšha gore Bakriste ba therešo e be e tla ba batho ba rulagantšwego?

Mat. 24:14, NW; Mat 28:19, 20: “Ditaba tše tše di lokilego tša mmušo di tla bolelwa lefaseng ka moka le le agilwego gore e be bohlatse go ditšhaba ka moka; gomme e tla ba gona bofelo bo fihlago.” “Ké xôna yang Le dirê dithšaba ka moka barutiwa ka xo ba kolobetša . . . le ka xo ba ruta.” (Se se be se ka dirwa bjang ka ntle le go rulaganywa? Ge Jesu a be a tlwaeletša barutiwa ba gagwe ba pele modiro wo, ruri ga se A ka a botša o mongwe le o mongwe wa bona go ya moo a bego a rata go ya gona le go abelana tumelo ya gagwe ka tsela lege e le efe yeo a e kgethago. O ba tlwaeditše, a ba nea ditaelo gomme a ba roma ka mokgwa o rulagantšwego. Bona Luka 8:1; 9:1-6; 10:1-16.)

Ba-Heb. 10:24, 25: “A re hlôkômêlaneng seng sa rena, re išanê leratong le medirong e botse. Re se ngalê phuthêxô ya xešo ka mokxwa wa ba bangwê; sa rena a e bê xo eletšana, xa-xolo ka xe letšatši le le kxaufsi; le lena Le a di bôna.” (Eupja ke kae moo motho a bego a ka iša batho bao ba thabelago e le gore ba tle ba kwe taelo ye, ge e ba go be go se na phuthego yeo e nago le diboka tša ka mehla moo ba bego ba ka ya go yona?)

1 Ba-Kor. 14:33, 40: “Modimo xa se Modimo wa thlakathlakanô; ke Modimo wa moláô. . . . Tšohle di yê ka bothakxa le ka molaô.” (Moapostola Paulo mo o bolela ka mokgwa wa bothakga dibokeng tša phuthego. Go diriša keletšo ye yeo e buduletšwego go nyaka gore go hlompšhe phuthego.)

1 Pet. 2:9, 17: “Xe e le lena Le moloko wo o hlaotšwexo, Le boperisita bya boxoši, Le sethšaba se sekxêthwa, Le selete se Yêna a lexo Mong wa sôna, xore Le tsebatšê mabothakxa a Eo a Le biditšexo Lé le lefsifsing, a Le biletša seetšeng sa xaxwe se se tlabaxo. . . . Le ratê bana beno.” (Mokgatlo wa batho bao maiteko a bona a reretšwego go dira modiro o itšego, ke phuthego.)

Na bao e lego bahlanka ba botegago ba Modimo ke feela batho bao ba gašanego dikerekeng tše di sa swanego tša Bojakane?

2 Ba-Kor. 6:15-18: “Modumedi ó abêlana eng le e a sa dumelexo? . . . Tšwang-xê moo xare xa bôná, Le khuduxê; ó r’yalo [Jehofa], Le se swarê thšila. Ké mo ke tl’o xo Le amoxêla. Ke tlo ba Tataweno; ’me lena Le tlo ba barwa ba-ka le barwedi ba-ka. O r’yalo [Jehofa] Ra-matla-ohle.” (Na motho ruri ke mohlanka yo a botegago wa Modimo, ge e ba a tšwela pele go ba borapeding gotee le batho bao ba bontšhago ka tsela ya bona ya bophelo gore ga se badumedi e le ka kgonthe? Bona hlogo ya ditaba e kgolo ya “Babele o Mogolo.”)

1 Ba-Kor. 1:10: “Xomme lena Bana-bešo, ke a Le rapêla, ka ’ina la Jesu Kriste Mong ’a rena, ke re: Bohle bolêlang se tee, xore mo xo lena xo se bê le diphapang; Le bê ba xo bapêlana, kxopolô è le e tee, kêlêlô è le e tee.” (Botee bjo bo bjalo ga bo gona gare ga dikereke tše di sa swanego tša Bojakane.)

Joh. 10:16: “Ke sa na le dinku tše dingwê tše e sexo tša lešaka lé. Le tšôna ke swanetše xo di xapa; ’me di tlo kwa lentšu la-ka, ya tlo ba mohlape o tee le modiši o tee.” (Ka ge Jesu a be a tla tliša ba bjalo ‘mohlapeng o tee,’ ruri na ga go molaleng gore ba be ba ka se ke ba gašana dikerekeng tša Bojakane?)

Phuthego e bonalago ya Jehofa mehleng ya rena e ka tsebja bjang?

(1) E godiša Jehofa e le ka kgonthe e le Modimo o nnoši wa therešo, gomme e reta leina la gagwe.—Mat. 4:10; Joh. 17:3.

(2) E lemoga e le ka kgonthe karolo ya bohlokwa ya Jesu Kriste morerong wa Jehofa, ka ge e le mogodiši wa bogoši bja Jehofa, yena Moemedi o Mogolo wa bophelo, hlogo ya phuthego ya Bokriste le Kgoši e bušago ya Mesia.—Kut. 19:11-13; 12:10; Dit. 5:31; Ba-Ef. 1:22, 23.

(3) E kgomarela e le ka kgonthe Lentšung la Modimo le le buduletšwego, gomme e thekga dithuto tša yona ka moka le melao ya boitshwaro Beibeleng.—2 Tim. 3:16, 17.

(4) E ikarola lefaseng.—Jak. 1:27; 4:4.

(5) E kgomarela go hlweka mo go rategago ga boitshwaro gare ga ditho tša yona, ka gobane Jehofa ka noši ke o mokgethwa.—1 Pet. 1:15, 16; 1 Ba-Kor. 5:9-13.

(6) E gafela maiteko a yona a magolo tabeng ya go dira modiro woo Beibele e o boletšego e sa le pele bakeng sa mehla ya rena, e lego go bolelwa ga ditaba tše di lokilego tša Mmušo wa Modimo lefaseng ka moka gore e be bohlatse.—Mat. 24:14, NW.

(7) Go sa šetšwe go se phethege ga motho, ruri ditho tša yona di hlagolela le go tšweletša dienywa tša moya wa Modimo, e lego lerato, lethabo, khutšo, go se fele pelo, botho, go loka, tumelo, boleta le boitshwaro, gomme di dira seo ka tekanyo ye e lego gore e di arola lefaseng ka kakaretšo.—Ba-Gal. 5:22; Joh. 13:35.

Re ka bontšha bjang go hlompha phuthego ya Jehofa?

1 Ba-Kor. 10:31: “Tšohle tše Le di diraxo Le di dirê xore Modimo a rêtwê ka tšôna.”

Ba-Heb. 13:17: “Kwang baruti ba lena, Le laiwê ke bôná, xobane ba diša meôya ya lena; xobane ba tlo sekišwa se ba Le dirilexo sôna.”

Jak. 1:22: “Bang badiri ba Lentšu, e sexo bakwi fêla.”

Tito 2:11, 12: “Xo bônaxetše kxauxêlô ya Modimo ya xo phološa batho bohle. Ké yôna e re rutaxo xo lahla xo nyatša Modimo, xo lahla dikxanyoxô tša lefase; xore mehleng yeno re phelê rè eletšexile, rè loka, rè na le borapedi.”

1 Pet. 2:17, PK: “Ratang bana babo lena.”