Kgaolo 34

O Kgetha Baapostola ba Gagwe

E ŠETŠE e le mo e ka bago ngwaga le seripa ga e sa le Johane Mokolobetši a tsebiša Jesu e le Kwana ya Modimo gomme Jesu a thoma bodiredi bja gagwe bja phatlalatša. Nakong yeo Andrea, Simone Petro, Johane, mo gongwe le Jakobo (ngwanabo Johane), gotee le Filipi le Nathanaele (yoo gape a bitšwago Baratholomeo), e bile barutiwa ba gagwe ba pele. Ge nako e dutše e e-⁠ya, ba bangwe ba bantši ba ile ba kopana le bona go lateleng Kriste.

Bjale Jesu o itokišeditše go kgetha baapostola ba gagwe. Ba e tla ba bagwera ba gagwe ba kgaufsi-ufsi bao ba tlago go newa tlwaetšo e kgethegilego. Eupja pele a ba kgetha, Jesu o rotogela thabeng gomme o fetša bošego ka moka a rapela, mohlomongwe a kgopela bohlale le tšhegofatšo ya Modimo. Ge letšatši le hlaba, o bitša barutiwa ba gagwe gomme o kgetha ba 12 gare ga bona. Lega go le bjalo, ka ge ba tšwela pele go ba barutwana ba Jesu, le bona ba sa dutše ba bitšwa barutiwa.

Ba tshelelago bao Jesu a ba kgethago, ba ba boletšwego ka mo godimo, ke bao e bilego barutiwa ba gagwe ba pele. Mateo yoo Jesu a mmiditšego a le modirong wa gagwe wa lekgetho, le yena o a kgethwa. Ba bangwe ba bahlano bao ba kgethilwego ke Judase (yoo gape a bitšwago Thadeo), Judase Isikariothe, Simone wa Kana, Tomase le Jakobo morwa wa Alifeo. Jakobo yo o bile o bitšwa Jakobo o Monyenyane, mohlomongwe e le ka baka la go ba o monyenyane ka sebopego sa mmele goba e le o monyenyane ka nywaga go moapostola Jakobo o mongwe.

Mo nakong ye ba ba 12 ba bile le Jesu ka nako e telele, gomme o ba tseba gabotse. Ge e le gabotse, ba bantši ba bona ke metswalo ya gagwe. Jakobo le Johane ngwanabo go bonala e le bo-motswal’a Jesu. Go bonala eka Alifeo e be e le ngwanabo Josefa, yo e lego tate wa Jesu wa mogodiši. Ka gona morwa wa Alifeo, e lego moapostola Jakobo le yena e be e tla ba motswala wa Jesu.

Ee, Jesu ga a na bothata bja go gopola maina a baapostola ba gagwe. Eupja na o ka kgona go a gopola? Ee, gopola feela gore go na le ba babedi bao ba bitšwago ka la Simone, ba babedi bao ba bitšwago ka la Jakobo le ba babedi bao ba bitšwago ka la Judase le gore Simone o na le ngwanabo e lego Andrea, gomme Jakobo o na le ngwanabo e lego Johane. Yeo ke tsela ya go gopola baapostola ba seswai. Ba bangwe ba bane ba akaretša molekgetho (Mateo), yoo ka morago a ilego a belaela (Tomase), yo a ilego a bitšwa ka tlase ga sehlare (Nathanaele) le mogwera wa gagwe Filipi.

Ba lesome-tee ba baapostola ba tšwa Galilea, e lego selete sa motse wa gabo Jesu. Nathanaele o tšwa Kana. Filipi, Petro le Andrea setlogo sa bona ba tšwa Betsaida, ka morago Petro le Andrea ba hudugela Kaperenaume, e lego moo go bonalago Mateo a be a dula gona. Jakobo le Johane bao le bona go bonalago ba be ba dula Kaperenaume goba kgaufsi le gona, ba be ba le modirong wa go rea dihlapi. Go bonala eka Judase Isikariothe, yoo ka morago a ilego a eka Jesu, ke moapostola a nnoši yo a tšwago Judea. Mareka 3:​13-19; Luka 6:​12-⁠16.

▪ Ke baapostola bafe bao mo gongwe e bego e le metswalo ya Jesu?

▪ Baapostola ba Jesu ke bomang, gomme o ka gopola maina a bona bjang?

▪ Baapostola ba be ba e-⁠tšwa mafelong afe?