Karolo 1
Na Modimo Ruri o na le Taba Le Rena?
1, 2. Ke potšišo efe yeo batho ba e botšišago ka Modimo gomme ka baka la’ng?
KA NAKO e nngwe bophelong bja gago o ka ba o ile wa ba le potšišo e rego: ‘Ge e ba go e-na le Modimo yo ruri a nago le taba le rena, gona ke ka baka la’ng a dumelela tlaišego e kaakaa?’ Ka moka ga rena re kile ra tlaišwa ke se sengwe goba re tseba motho o mongwe yo a ilego a tlaišega.
2 Ruri batho historing ka moka ba kwele bohloko le go setlega dipelo ka baka la ntwa, bošoro, bokebekwa, go hloka toka, bodiidi, bolwetši le go hwa ga batho bao ba ba ratago. Ngwaga-kgolong wa rena wa bo-20 feela, batho ba fetago dimilione tše 100 ba hwetše dintweng. Batho ba bangwe gape ba dimilione tše makgolo ba gobaditšwe goba ba loba magae a bona le dithoto. Mehleng ya rena go diregile dilo tše dintši tše di šiišago tšeo di ilego tša baka manyami a magolo, dillo tše dintši gotee le go felelwa ke kholofelo go batho ba bantši kudu.
3, 4. Batho ba bantši ba ikwa bjang ka go dumelela ga Modimo ditlaišego?
3 Ba bangwe ba kwa bohloko kudu gomme ba nagana gore ge e ba Modimo a le gona, gona o tloga a se na taba le rena. Mo gongwe ba ka ba ba nagana gore Modimo ga a gona. Ka mohlala, monna yo a ilego a tlaišwa ditlhaselong tše di ilego tša wela morafe wa gabo tšeo go tšona bagwera ba gagwe le ba lapa la gabo ba ilego ba hwa Ntweng ya I ya Lefase o ile a botšiša gore: “Modimo o be a ile kae ge re be re mo nyaka?” Motho o mongwe yo a bego a phonyokgile ge ma-Nazi a be a bolaya batho ba dimilione Ntweng ya II ya Lefase o be a kwešitšwe bohloko ke tlaišego yeo a e bonego mo a ilego a ba a re: “Ka mokgwa wo ke befetšwego ka gona, nka ja motho ka meno.”
4 Ka gona, batho ba bantši ga ba kwešiše gore ke ka baka la’ng ge Modimo yo a lokilego a lesa dilo tše mpe di direga. Ba belaela ge e ba ruri a e-na le taba le rena goba gaešita le go ba gona ga gagwe. Le gona ba bantši ba bona ba nagana gore go tlaišega go tla tšwela pele go le gona ge feela batho ba sa dutše ba le gona.
[Seswantšho go letlakala 2, 3]
Na lefase le lefsa le le se nago tlaišego le kgaufsi?