Ditiragalo tše Bohlokwa Historing ya Mehleng Yeno ya Dihlatse tša Jehofa

1870 Charles Taze Russell le sehlopha seo se tšwago Pittsburgh le Allegheny, Pennsylvania, U.S.A., ba thoma thuto e rulagantšwego ya Beibele

1870-75 Russell le badirišani ba gagwe bao a ithutago le bona ba lemoga gore ge Kriste a e-tla gape e tla ba yo a sa bonagalego mahlong a batho le gore morero wa maboo a gagwe o akaretša tšhegofatšo ya malapa ka moka a lefase

1872 Russell le sehlopha seo a ithutago le sona ba lemoga tefo ya topollo yeo Kriste a e neilego bakeng sa batho

1876 C. T. Russell o amogela kopi ya Herald of the Morning ka January; o gahlana le N. H. Barbour, e lego morulaganyi selemong seo kua Philadelphia, Pennsylvania

Sehlogo seo se ngwadilwego ke C. T. Russell, seo se gatišitšwego tokollong ya October ya Bible Examiner kua Brooklyn, New York, se šupa go 1914 e le bofelo bja Mabaka a Ba-ntle

1877 Puku ya Three Worlds e a gatišwa, e le ka baka la maiteko a kopantšwego a N. H. Barbour le C. T. Russell

C. T. Russell o gatiša pukwana ya The Object and Manner of Our Lord’s Return ofising ya Herald of the Morning kua Rochester, New York

1879 Russell o kgaotša go thekga Herald of the Morning ka mo go feletšego ka May ka baka la kgopolo ya Barbour ka topollo

Tokollo ya pele ya Zion’s Watch Tower and Herald of Christ’s Presence, ya July 1879

1881 Dipampišana tša mathomo tšeo di gatišitšwego ke Barutwana ba Beibele; pele ga 1914, kabo ya ngwaga ka ngwaga ya dipampišana e fihla go palo-moka ya dikopi tše masome a dimilione ka maleme a 30

Zion’s Watch Tower Tract Society e a rulaganywa; go dirwa kgoeletšo ya gore “Go Nyakega Baboledi ba 1 000,” ba bangwe e le gore e be babapatši ba ka mehla ba dipuku tša bodumedi, ba bangwe ba diriše nako lege e le efe yeo ba ka e kgonago go gašeng therešo ya Beibele

Go abja ga dikopi tše 300 000 tša Food for Thinking Christians go batho bao ba tsenago kereke metseng e megolo kua Brithania

1883 Watch Tower e fihla China; yo e bego e le moromiwa wa Presbyterian go se go ye kae o thoma go nea bohlatse go ba bangwe moo

1884 Food for Thinking Christians e fihla Liberia, Afrika; mmadi yo a nago le tebogo o ngwala bakeng sa go kgopela dikopi tšeo a ka di abago

Zion’s Watch Tower Tract Society e hlongwa ka molao kua Pennsylvania; e ngwadišwa ka molao ka December 15

1885 Dipuku tša Watch Tower di šetše di balwa ke batho bao ba swerwego ke tlala ya therešo kua Amerika Leboa le Borwa, Yuropa, Afrika le Asia

1886 The Divine Plan of the Ages e a gatišwa, e lego volume ya pele ya lelokelelo leo le bitšwago Millennial Dawn (yeo ka morago e ilego ya tsebja e le Studies in the Scriptures)

1889 Bible House e agwa kua Arch Street, Allegheny, Pennsylvania, e le ntlo-kgolo ya Mokgatlo

1891 Seboka sa pele sa Barutwana ba Beibele seo ba se bitšago kopano kua Allegheny, Pennsylvania (April 19-25)

1894 Balebeledi ba basepedi bao ge nako e dutše e e-ya ba ilego ba tsebja e le basepedi ba bodumedi (lehono ke balebeledi ba tikologo le ba selete) ba rongwa mabapi le lenaneo la Mokgatlo bakeng sa go etela diphuthego

1900 Ofisi ya lekala ya pele ya Mokgatlo wa Watch Tower e a bulwa kua London, Engelane

Go nea bohlatse ga Barutwana ba Beibele go be go dutše go dirwa dinageng tše 28, gomme molaetša wo ba o bolelago o fihlile dinageng tše dingwe tše 13

1903 Go abja ka ntlo le ntlo mo go nabilego ga dipampišana tše di sa lefelelwego ka Disontaga; pejana go abja mo gogolo ga dipampišana go be go dirwa ditarateng kgaufsi le dikereke

1904 Dithero tšeo di neelwago ke C. T. Russell di thoma go tšwelela ka mehla dikuranteng; lebakeng la nywaga e lesome di gatišwa ke dikuranta tše ka bago 2 000

1909 Ntlo-kgolo ya Mokgatlo e hudušetšwa Brooklyn, New York ka April

1914 Pontšho ya pele ya “Photo-Drama of Creation” kua New York ka January; pele ga ge ngwaga o fela, e bonwe ke palo-moka ya batheetši ba ka godimo ga 9 000 000 kua Amerika Leboa, Yuropa le Australia

Ka October 2 ka phapošing ya go jela ya Bethele kua Brooklyn, C. T. Russell o dumela ka gore, “Mabaka a Ba-ntle a fedile”

Barutwana ba Beibele ba bolela ka mafolofolo dinageng tše 43; ba 5 155 ba tšea karolo go neeng bohlatse go ba bangwe; bao ba bilego gona Segopotšong ba ba begilwego ke ba 18 243

1916 Lehu la C. T. Russell a e-na le nywaga e 64 ka October 31, ge a be a le ka setimeleng a phatša Texas

1917 J. F. Rutherford o ba mopresidente wa Mokgatlo ka January 6, ka morago ga ge komiti ya bolaodi ya ba bararo e sepedišitše ditaba tša Mokgatlo mo e ka bago ka dikgwedi tše pedi

Puku ya The Finished Mystery e lokollelwa lapa la Bethele kua Brooklyn ka July 17; ba bane bao ba bego ba hlankela lekgotleng la balaodi la Mokgatlo ba thoma go ganetša ka kudu; ka morago ga moo diphuthego tše dintši di a arogana

1918 Polelo e rego “Lefase le Fedile—Ba Dimilione Bao ba Phelago mo Nakong ye mo Gongwe ba ka se ke ba hwa le ka Mohla” e neelwa la mathomo ka February 24, kua Los Angeles, California. Ka March 31, kua Boston, Massachusetts, polelo e newa ka sehlogo se se rego “Lefase le Fedile—Ba Dimilione Bao ba Phelago mo Nakong ye ba ka se ke ba hwa le ka Mohla”

J. F. Rutherford le badirišani ba gagwe ba kgaufsi ba bitšwa ka maina ditaelong tša mmušo tša gore ba swarwe tšeo di ntšhitšwego ka May 7; tsheko e thoma ka June 5; ba ahlolelwa ka June 21 (o mongwe ka July 10) go dula nako e telele kgolegong ya mmušo

Ntlo-kgolo ya Brooklyn e tswalelwa ka August, gomme mešomo ya yona e bušetšwa morago Pittsburgh ka lebaka la ka godimo ga ngwaga

1919 Bahlankedi ba Mokgatlo le badirišani ba bona ba lokollwa ka peile ka March 26; ka May 14 kgoro ya tša boipiletšo e fetoša kahlolo ya kgoro e nyenyane ya tsheko, gomme go laelwa gore go dirwe tsheko e nngwe; ngwageng o latelago, ka May 5, mmušo o ntšha ka hlogo molatong, o gana go dira tsheko

E le teko bakeng sa go bona ge e ba modiro wa Barutwana ba Beibele o ka tsošološwa, J. F. Rutherford o rulaganyetša go nea polelo ya phatlalatša e rego “Kholofelo Bakeng sa Batho Bao ba Nyamilego” Holong ya Clune kua Los Angeles, California, ka May 4; lešaba ga le kgone go tsena ka moka, gomme polelo e swanetše go neelwa la bobedi

Barutwana ba Beibele ba swara kopano kua Cedar Point, Ohio ka September 1-8; go gatišwa mo go sa tlago ga makasine wa The Golden Age (woo bjale o tsebjago e le Phafoga!) go a tsebišwa

Bulletin (yeo bjale e tsebjago e le Tirelo ya Rena ya Mmušo) e gatišwa e le tutuetšo tirelong ya tšhemo

Pego ya ngwaga e bontšha gore Barutwana ba Beibele ba 5 793 ba bolela ka mafolofolo dinageng tše 43; palo e begilwego ya bao ba bilego gona Segopotšong, 21 411

1920 Mokgatlo wa Watch Tower o thoma mediro ya wona ka noši ya go gatiša kua Brooklyn

1922 Radio e dirišwa la mathomo ke J. F. Rutherford ka February 26 kua California, go gaša polelo ya Beibele

Kopano ya Barutwana ba Beibele kua Cedar Point, Ohio ka September 5-13; go dirwa boipiletšo bja gore “Tsebatšang, tsebatšang, tsebatšang Kgoši le mmušo wa yona”

Baruti kua Jeremane ba tutuetša maphodisa gore a sware Barutwana ba Beibele ge ba aba dipuku tša Beibele phatlalatša

1924 WBBR (seteišeng sa pele sa radio seo e lego sa Mokgatlo wa Watch Tower) se thoma go gaša ka February 24

1925 Morokami (wa Seisemane) wa March 1 ge o bolela ka go tswalwa ga Mmušo wa Modimo ka 1914, o bontšha gore go na le mekgatlo e mebedi e fapanego le yeo e ganetšanago—wa Jehofa le wa Sathane

1926 Go kgothaletšwa boboledi bja ntlo le ntlo go dirišwa dipuku ka Sontaga

1928 Barutwana ba Beibele ba a swarwa kua New Jersey (U.S.A.) ka baka la go aba dipuku e le karolo ya boboledi bja bona bja ntlo le ntlo; nywageng e lesome feela, go na le go swarwa mo go bjalo ga ba 500 ka ngwaga kua United States

1931 Go amogelwa leina Dihlatse tša Jehofa ka setlamo kopanong kua Columbus, Ohio ka July 26, gomme ka morago ga moo se amogelwa dikopanong lefaseng ka moka

1932 Vindication, Puku 2, e hlalosa lebaka leo ka lona diporofeto tša Beibele tša tsošološo di sa šomego go ba-Juda ba tlhago eupja di šoma go Isiraele ya moya

Go kgaotšwa thulaganyo ya “bagolo ba ba kgethwago ka go boutelwa” ka go dumelelana le tlhaloso e lego ditokollong tša Morokami tša August 15 le September 1 (ka Seisemane)

1933 Dihlatse tša Jehofa di thibetšwe kua Jeremane. Nakong ya tlaišo e sehlogo go theoša go fihla bofelong bja Ntwa ya II ya Lefase, tše 6 262 di a swarwa gomme nako ya tšona e kopantšwego ya go dula kgolegong e fihla go palo-moka ya nywaga e 14 332; tše 2 074 di romelwa dikampeng tša tshwenyo moo go tswalelelwa ga tšona go fihlago palo-moka ya nywaga e 8 332

Metšhene ya go bapala direkoto (e mengwe e nameditšwe dikoloing) e dirišwa ke Dihlatse go gaša dipolelo tša Beibele mafelong a batho bohle

1934 Dikeremafomo tša go šikarwa di dirišwa ke Dihlatse go bapalela batho bao ba thabelago dipolelo tše kopana tšeo di gatišitšwego tša Beibele

1935 Polelong ya kopanong kua Washington, D.C., ka May 31, “lešaba le lexolo” le hlaolwa e le sehlopha sa lefaseng; batho ba 840 ba a kolobetšwa kopanong ye; go gatelelwa kudu ka go se kgaotše kholofelo ya bophelo bjo bo sa felego lefaseng la paradeise bakeng sa bahlanka bao ba botegago ba Modimo bao ba phelago mo nakong ye

Lefelo la diboka le bitšwa ka lekga la mathomo gore ke Holo ya Mmušo kua Honolulu, Hawaii

1936 Dipampiri tša go athwa tša go phatlalatša di aparwa la mathomo ke bagoeledi ba Mmušo bakeng sa go tsebiša batho ka kakaretšo ka dipolelo tša Beibele

Go kgothaletšwa go thoma dithuto le batho bao ba thabelago go dirišwa puku ya Mokgatlo ya Riches gotee le Beibele; tše gantši ke dithuto tša sehlopha

1937 Dikeremafomo tša go šikarwa di dirišwa ke Dihlatse go bapala dipolelo tše di gatišitšwego tša Beibele mejakong ya magae

1938 Dithulaganyo tša pušo ya Modimo bakeng sa go kgetha balebeledi ka diphuthegong di tšea sebaka sa ditshepedišo tša pušo-ka-batho, ka go dumelelana le ditokollo tša Morokami tša June 1 le 15 (ka Seisemane)

Dikopano tša di-zone (tšeo bjale di tsebjago e le dikopano tša tikologo) di rulaganyetšwa dihlopha tša diphuthego

1939-45 Mmušong ka moka wa Brithania le Commonwealth ya Brithania, ditšhaba tše 23 di thibela Dihlatse tša Jehofa goba go iletša dipuku tša tšona tša Beibele

1940 Go abja setarateng ga Morokami le Consolation go ba karolo ya ka mehla ya modiro wa Dihlatse tša Jehofa

Kahlolo ya Kgoro-kgolo ya Tsheko ya U.S. ka June 3, yeo e thekgago go dumediša folaga ga kgapeletšo go sa šetšwe tumelo ya bodumedi, e hlohleletša bošoro bja sehlopha sa bahlola-mpherefere setšhabeng ka moka malebana le Dihlatse tša Jehofa

1941 Dihlatse tše mafolofolo di feta palo ya 100 000, di fihlelela tlhora ya 109 371 dinageng tše 107 go sa šetšwe therešo ya gore Ntwa ya II ya Lefase e apareditše Yuropa gomme e nabela Afrika le Asia

1942 J. F. Rutherford o hwa ka January 8 kua San Diego, California

N. H. Knorr o ba mopresidente wa boraro wa Mokgatlo ka January 13

Palo-moka e gatišwago ka ngwaga ya Morokami ka maleme ka moka ke 11 325 143

Thuto e Tšwetšego Pele Bodireding bja Pušo ya Modimo e a hlongwa bakeng sa sehlopha sa bašomi ba ntlong-kgolo ya Mokgatlo ka February 16

Mokgatlo wa Watch Tower o gatiša Beibele e feletšego ya King James Version motšheneng wa wona ka noši wa go gatiša (web rotary)

1943 Sehlopha sa pele sa Sekolo sa Beibele sa Watchtower sa Gilead se thoma dithuto tša sona ka February 1

Thuto Bodireding bja Pušo ya Modimo (yeo bjale e bitšwago Sekolo sa Bodiredi sa Pušo ya Modimo) bakeng sa diphuthego tša Dihlatse tša Jehofa e tšweletšwa dikopanong ka April

Kgoro-kgolo ya Tsheko ya U.S. e ahlola ka go thekga Dihlatse tša Jehofa melatong e 20 go e 24; Kgoro e Phagamego ya Tsheko ya Australia e tloša thibelo go Dihlatse moo ka June 14

1945 Go tloga ka October 1, lekgotla la Mokgatlo la balaodi ga le sa hlwa le kgethwa ke babouti bao ba swanelegago ka baka la meneelo ya tša ditšhelete

Palo-gare ya dithuto tšeo di sa lefelelwego tša magae tša Beibele tšeo di swarwago kgweding e nngwe e le e nngwe bjale ke 104 814

1946 Nywageng e šupago ya pele ga mo, Dihlatse tše di fetago 4 000 tša Jehofa kua United States le tše 1 593 kua Brithania di be di dutše di swarwa le go ahlolelwa dinako tša go dula kgolegong tšeo di tlogago go kgwedi go ya go nywaga e mehlano ka baka la boema-gare bja tšona bja Bokriste

Ngwageng wo wa pele ka morago ga Ntwa ya II ya Lefase, ba 6 504 ba tšea karolo tirelong ya nako e tletšego e le babulamadibogo

Makasine wa Phafoga! (mohlatlami wa The Golden Age le Consolation) o thoma go phatlalatšwa; palo-moka ya dikopi tšeo di gatišwago ke 13 934 429 ka ngwaga

Dihlatse tšeo di fetago 470 di išwa pele ga dikgoro tša tsheko kua Gerika ka baka la go abelana dithuto tša Beibele le ba bangwe

1947 Kua Quebec, Canada, melato e 1 700 yeo e akaretšago modiro wa boebangedi wa Dihlatse tša Jehofa e fegilwe dikgorong tša tsheko

Palo ya diphuthego bjale e feta 10 000, e fihla go palo-moka ya 10 782 lefaseng ka bophara

1950 New World Translation of the Christian Greek Scriptures e lokollwa ka Seisemane ka August 2, kopanong kua New York

1953 Lenaneo le le tseneletšego la tlwaetšo ya Dihlatse tša Jehofa boboleding bja ntlo le ntlo le thoma ka September 1

1957 Dinageng tše 169, Dihlatse tša Jehofa di diriša diiri tše 100 135 016 bakeng sa go goeletša Mmušo wa Modimo le go swara dithuto tša Beibele le batho bao ba thomago go thabela

1958 Kopanong ya Ditšhaba-tšhaba ya Thato ya Modimo kua New York, go ba le batho ba 253 922 bao ba tšwago dinageng tše 123; go kolobetšwa ba 7 136

1959 Mananeo a mathomo a Sekolo sa Bodiredi sa Mmušo go tloga ka March 9, kua Lansing Borwa, New York, ao a rulaganyeditšwego balebeledi ba diphuthego le balebeledi ba basepedi

1961 Sehlopha sa pele sa balebeledi ba makala a Mokgatlo se ba gona thutong e kgethegilego ya tlwaetšo ya dikgwedi tše lesome kua Brooklyn, New York, ka boikemišetšo bja go tšwetša pele modiro o swanago wa Dihlatse tša Jehofa lefaseng ka bophara

New World Translation of the Holy Scriptures, e lego Beibele e feletšego ka go volume e tee, e lokollwa ka Seisemane

1963 New World Translation of the Christian Greek Scriptures e lokollwa ka maleme a mangwe a tshelelago (se-Dutch, Sefora, Sejeremane, Sepaniši, Sepotokisi, Setaliana), a oketšegilego a sa dutše a tla latela nywageng e tlago

Dihlatse tšeo di fetago milione tša Jehofa bjale di šoma dinageng tše 198; tlhora ya bagoeledi ka ngwaga ke 1 040 836; ba bangwe ba 62 798 ba a kolobetšwa

1965 Holo ya pele ya Kopano, e lego holo yeo e mpshafaditšwego ya dipontšho e dirišwa ke Dihlatse tša Jehofa kua New York

1967 Maphoto a go tlaišwa ka nako e telele le ka sehlogo kudu ga Dihlatse tša Jehofa a aparela Malawi gomme a tšwela pele ka nywaga e mentši ka morago ga moo

1969 Dithuto tša magae tša Beibele di feta milione; pego e bontšha palo-gare ya 1 097 237

1971 Sehlopha se Bušago se a oketšwa; ka October 1, maemo a go ba modula-setulo a thoma go šiedišanwa gare ga ditho tša sona ka ngwaga le ngwaga

1972 Diphuthego tša Dihlatse tša Jehofa di thoma go hlokomelwa ke sehlopha sa bagolo sa lefelong leo go e na le motho o tee go tloga ka October 1

1974 Tlhora ya bagoeledi lefaseng ka bophara e fihla go 2 021 432; babulamadibogo ba oketšega go tloga go 94 604 ka 1973 go ya go 127 135

1975 Sehlopha se Bušago se rulaganywa lefsa; ka December 4, boikarabelo bja karolo e kgolo ya modiro bo abelwa dikomiti tše tshelelago tšeo di thomago go šoma ka January 1, 1976

1976 E nngwe le e nngwe ya diofisi tša makala tša Mokgatlo wa Watch Tower e thoma go hlokomelwa ke komiti ya banna ba bararo goba go fetago moo bao ba gotšego moyeng, go e na le go hlokomelwa ke molebeledi o tee, go tloga ka February 1

1977 Sekolo sa Tirelo ya Bobulamadibogo se thoma go nea tlwaetšo e kgethegilego kudu bakeng sa babulamadibogo ba masome a dikete lefaseng ka bophara

1984 Dithuto tša magae tša Beibele tšeo di swarwago ke Dihlatse tša Jehofa bjale di fihla palo-gare ya 2 047 113

1985 Go thongwa thulaganyo ya baithapi ba ditšhaba-tšhaba, ba lomaganya modiro wa go aga wa lefase ka bophara go tšwa ntlong-kgolo ya Mokgatlo

Pego e bontšha ba 3 024 131 ba tšea karolo modirong wa go bolela ka Mmušo dinageng tše 222; babulamadibogo bjale ba fihla palo-gare ya 322 821; go kolobeditšwe ba 189 800 ngwageng wo

1986 Go kgethwa Dikomiti tša Meago tša Tikologo bakeng sa go thuša go rulaganya go agwa ga Diholo tša Mmušo

1987 Modiro wa go dira barutiwa o tšwela pele o gola, ka ge bjale dithuto tša Beibele di swarwa le batho ba 3 005 048 le dihlopha tša malapa, tše dintši di swarwa beke le beke; palo-moka ya bao ba kolobetšwago ka ngwaga ke 230 843

Sekolo sa Tlwaetšo ya Bodiredi se thoma go šoma ka October 1, sehlopha sa pele se le kua Coraopolis, Pennsylvania

1989 Maemo ao a fetogago ka Bohlabela bja Yuropa a thuša go dira gore dikopano tše tharo tše kgolo tša ditšhaba-tšhaba di kgonege kua Poland, gomme ka morago dinageng tše dingwe nywageng e latetšego

1990 Go tlošwa ga dithibelo go Dihlatse tša Jehofa dinageng tša Afrika le ka Bohlabela bja Yuropa go dira gore go bolela ebangedi go kgonege gare ga batho ba oketšegilego ba 100 000 000

Bagoeledi ba Mmušo ba fihlelela tlhora e mpsha ya 4 017 213; dipalo tša babulamadibogo di hlatlogela go 536 508; go dirišwa palo-moka ya diiri tše 895 229 424 modirong o akgofilego wa go goeletša Mmušo

1991 Ge dithibelo di tlošitšwe ka Bohlabela bja Yuropa le Afrika, se se dira gore go be bonolo go fihlelela batho ba oketšegilego ba 390 000 000 ka ditaba tše di lokilego tša Mmušo wa Modimo

1992 Palo-gare ya go gatišwa ga Morokami ke 15 570 000 ka maleme a 111; Phafoga! yeo e hwetšagalago ka maleme a 67 e tšweletšwa ka palo-gare ya 13 110 000

Go neilwe bohlatse bjo bogolo ka go fetišiša, ka ge ba 4 472 787 ba tšea karolo go goeletšeng Mmušo dinageng tše 229; palo-gare ya kgwedi le kgwedi ya babulamadibogo ba 605 610; diiri tše 1 024 910 434 di dirišetšwa go neeng bohlatse phatlalatša; go swarwa dithuto tše 4 278 127 tša Beibele; go kolobetšwa barutiwa ba bafsa ba 301 002