Dipotšišo Tšeo Gantši di Botšišwago ke Batho Bao ba Thabelago

Ge e ba Modimo e le lerato, ke ka baka la’ng a dumelela bokgopo?

MODIMO o dumelela bokgopo, gomme ba dimilione lefaseng ba bo dira ka go ikemišetša. Ka mohlala, ba tsoša dintwa, ba lahlela dipomo baneng, ba senya lefase le go baka ditlala. Ba dimilione ba a kgoga gomme ba ba le kankere ya maswafo, ba dira bootswa gomme ba tsenwa ke malwetši a fetelago ka dikopano tša botona le botshadi, ba diriša bjala ka go fetišiša gomme ba fsa sebete, le tše dingwe. Batho ba bjalo ruri ga ba nyake gore bokgopo ka moka bo fedišwe. Ba nyaka feela gore go fedišwe dikotlo tša bjona. Ge ba buna seo ba se bjetšego, ba lla ka gore, “Ke ka baka la’ng se se diragalela nna?” Gomme ba bea Modimo molato bjalo ka ge Diema 19:3 e re: “Motho ó senyetšwa tsela ke bošilo by’axwe, a nape a tsôta Morêna.” Ge nkabe Modimo a ile a thibela go dira ga bona bobe ba be ba tla ngongoregela go lahlegelwa ga bona ke tokologo ya go bo dira!

Lebaka le legolo la Jehofa la go dumelela bobe ke go araba tlhohlo ya Sathane. Sathane Diabolo o boletše gore Modimo o be a ka se ke a bea batho mo lefaseng bao ba bego ba tla Mmotegela ge ba le ka tlase ga teko. (Jobo 1:6-12; 2:1-10) Jehofa o dumeletše Sathane gore a tšwele pele a le gona gore a hwetše sebaka sa go hlatsela tlhohlo ya gagwe. (Ekisodo 9:16) Bjale Sathane o tšwela pele go tliša madimabe, go lohlanya batho le Modimo ge a dutše a leka go hlatsela tlhohlo ya gagwe. (Kutollo 12:12) Lega go le bjalo, Jobo o ile a dula a botega. Jesu o dirile bjalo. Bakriste ba therešo ba dira bjalo gona bjale.—Jobo 27:5; 31:6; Mateo 4:1-11; 1 Petro 1:6, 7.

Ke be nka rata go dumela tabeng ya paradeise ya lefaseng moo batho ba tlago go phela gona ka mo go sa felego, eupša na seo ga se seo se sa dumelegego?

E sego go ya ka Beibele. Go bonala e le mo go sa kgolwegego feela ka gobane batho ba ile ba lebeletšana le bobe ka nywaga-kgolo e mentši. Jehofa o bopile lefase gomme a botša batho gore ba le tlatše ka banna le basadi ba go loka bao ba bego ba tla hlokomela dimela le diphoofolo tša lona le go šireletša botse bja lona go e na le go bo senya. (Bona matlakala 12 le 17.) Go e na le gore Paradeise yeo e holofeditšwego e be yeo e sa dumelegego, boemo bja gona bjale bjo bo nyamišago ke bjo bobe kudu go ka tšwela pele. Paradeise e tla bo tšeela sebaka.

Nka araba bjang batho bao ba kwerago le go bolela gore Beibele ke nonwane le gore ga e dumelelane le thutamahlale?

Go dumela dikholofetšong tše ga se taba ya go ba madumela-tšohle. “Tumêlô e tšwa xo kweng.” Ka go ithuta Lentšu la Modimo, bohlale bja lona bo a bonagala gomme tumelo ya gola.—Ba-Roma 10:17; Ba-Hebere 11:1.

Boepi bja marope bja Beibele bo kgonthišetša go nepagala mo gogolo ga histori ya Beibele. Thutamahlale ya kgonthe e dumelelana le Beibele. Ditherešo tše latelago di be di le ka Beibeleng nako e telele pele ga ge di ka utollwa ke diithuti tša lefase: tatelano ya megato yeo lefase le fetilego go yona ge le hlolwa, gore lefase ke kgokolo, gore le fegilwe sebakeng go se seo se le thekgago le gore dinonyana di a huduga.—Genesi kgaolo 1; Jesaya 40:22; Jobo 26:7; Jeremia 8:7.

Go budulelwa ga Beibele go bontšhwa ka diporofeto tše di phethagetšego. Daniele o boletše e sa le pele ka go tsoga le go wa ga mebušo ya lefase le nako yeo Mesia a bego a tla tšwelela le go bolawa ka yona. (Daniele dikgaolo 2 le 8; 9:24-27) Lehono go phethagatšwa diporofeto tše dingwe gape, tšeo di hlaolago ‘mehla [ye e le] ya bofelo.’ (2 Timotheo 3:1-5; Mateo, kgaolo 24) Go tseba dilo mo go bjalo e sa le pele ga go matleng a motho. (Jesaya 41:23) Bakeng sa kgonthišetšo e oketšegilego, bona puku ya Beibele—Na ke Lentšu la Modimo Goba la Motho? le ya Is There a Creator Who Cares About You?, tšeo di gatišitšwego ke Watchtower Bible and Tract Society.

Nka ithuta bjang go araba dipotšišo tšeo di lego mabapi le Beibele?

O swanetše go ithuta Beibele gomme o naganišiše ka yona, o dutše o kgopela moya wa Modimo gore o go hlahle. (Diema 15:28; Luka 11:9-13) Beibele e re: “Xe mo xo lena xo ka ba le e a hlaêlwaxo ke bohlale, a a bo kxopêlê xo Modimo, Yêna wa xo nea bohle ka xo rata, à sa nyatše motho. A a kxopêlê a fiwê.” (Jakobo 1:5) Gape, go na le dithušo tša go ithuta Beibele tšeo go lego bohlokwa gore o di bale. Gantši go nyakega thušo ya ba bangwe go etša ge Filipi a ile a ithuta le mo-Ethiopia. (Ditiro 8:26-35) Dihlatse tša Jehofa di swara dithuto tša Beibele ka ntle le tefo le batho bao ba thabelago magaeng a bona. Ikwe o lokologile go kgopela thušo ye.

Ke ka baka la’ng batho ba bantši ba ganetša Dihlatse tša Jehofa gomme ba mpotša gore ke se ke ka ithuta le tšona?

Boboledi bja Jesu bo be bo ganetšwa, gomme o boletše gore balatedi ba gagwe le bona ba be ba tla ganetšwa. Ge ba bangwe ba be ba kgahlišwa ke thuto ya Jesu, baganetši ba bodumedi ba ile ba ba kgala ka gore: “E se bê le lena Le arošitšwe? A xo na le e mongwê wa baxolo xoba mofarisei e a mo dumetšexo?” (Johane 7:46-48; 15:20) Ba bantši bao ba go kgothaletšago gore o se ke wa ithuta le Dihlatse ke bao mohlomongwe ba se nago tsebo goba bao ba nago le kgethollo. Ithute le Dihlatse gomme o iponele ka noši ge e ba kwešišo ya gago ya Beibele e oketšega goba go se bjalo.—Mateo 7:17-20.

Ke ka baka la’ng Dihlatse di etela batho bao ba nago le bodumedi bja bona?

Di latela mohlala wa Jesu ka go dira se. O ile a ya go ba-Juda. Ba-Juda ba be ba e-na le bodumedi bja bona, eupša bo be bo furaletše Lentšu la Modimo ka ditsela tše dintši. (Mateo 15:1-9) Ditšhaba ka moka di na le madumedi a mohuta o itšego, e ka ba e le ao go thwego ke a Bokriste goba ao e sego a Bokriste. Ke gabohlokwa kudu gore batho ba kgomarele ditumelo tšeo di dumelelanago le Lentšu la Modimo, gomme maiteko a Dihlatse a go ba thuša go dira se a bontšha lerato la go rata moagišani.

Na Dihlatse di dumela gore bodumedi bja tšona ke bjona bo nnoši bjo bo nepagetšego?

Motho le ge e le ofe yo a tšeelago bodumedi bja gagwe godimo o swanetše go ba a nagana gore bo nepagetše. Go sego bjalo, ke ka baka la’ng a ka ba go bjona? Bakriste ba eletšwa gore: “Lekang tšohle, Le šalê Lè swere tše boló.” (1 Ba-Thesalonika 5:21) Motho o swanetše go kgonthiša gore ditumelo tša gagwe di ka thekgwa ka Mangwalo ka gobane go na le tumelo e tee feela ya therešo. Ba-Efeso 4:5 e kgonthišetša se ge e bolela ka ‘Morena o tee, tumelo e tee le kolobetšo e tee.’ Jesu o be a sa dumelelane le kgopolo ya mehleng yeno ya go se šetše ya gore go na le ditsela tše dintši, e lego madumedi a mantši tšeo ka moka di išago phološong. Go e na le moo o itše: “Kxôrô e išaxo bophelong e pitlaxane; le tsela ye e yaxo xôna ké e thsêsê; ’me ba ba e bônaxo xa ba nene.” Dihlatse tša Jehofa di dumela gore di e hweditše. Go sego bjalo di be di tla tsoma bodumedi bjo bongwe.—Mateo 7:14.

Na di dumela gore ke tšona feela tšeo di tlago go phološwa?

Aowa. Batho ba dimilione bao ba phetšego nywaga-kgolong e fetilego, bao e bego e se Dihlatse tša Jehofa ba tla tsoga gomme ba hwetša sebaka sa go phela. Ba bantši bao ba phelago mo nakong ye mo gongwe ba sa dutše ba ka gata mogato wa go emela therešo le toko pele ga ‘masetla-pelo a magolo,’ gomme ba tla phološwa. Go feta moo, Jesu o itše re se ke ra ahlolana. Rena re bona ponagalo ya ka ntle; Modimo o bona pelo. O bona ka go nepa gomme a ahlola ka kgaugelo. O gafetše kahlolo diatleng tša Jesu e sego tša rena.—Mateo 7:1-5; 24:21; 25:31.

Ke meneelo efe ya tša ditšhelete yeo e letetšwego go bao ba bago gona dibokeng tša Dihlatse tša Jehofa?

Mabapi le meneelo ya tšhelete, moapostola Paulo o boletše gore: “E mongwê le e mongwê a nthšê ka mo a kwanexo le pelo ya xaxwe; a se nthšê ka xo belaêla le ka xo xapeletšwa, xobane Mo-nea-à-thabile, Modimo ó a mo rata.” (2 Ba-Korinthe 9:7) Diholong tša Mmušo le diholong tša kopano tša Dihlatse tša Jehofa ga go tšewe dikoleke le ka mohla. Go bewa mapokisi e le gore yo mongwe le yo mongwe yo a ratago go neela a kgone go dira bjalo. Ga go yo a tsebago seo ba bangwe ba se neelago goba ge e ba ba neela. Ba bangwe ba kgona go neela kudu go feta ba bangwe; ba bangwe ba ka fo se kgone go neela selo. Jesu o bontšhitše pono e nepagetšego ge a be a bolela ka polokelo ya tempeleng ya Jerusalema le bao ba neelago: Seo e lego sa bohlokwa ke go kgona ga motho go neela gotee le moya wa go nea, e sego tekanyo ya tšhelete.—Luka 21:1-4.

Ge nka ba yo mongwe wa Dihlatse tša Jehofa, na go tla letelwa gore ke dire boboledi bjalo ka ge di dira?

Ge motho a tlala ka tsebo ya Paradeise e holofeditšwego ya lefaseng ka tlase ga Mmušo wa Kriste o nyaka go e abelana le ba bangwe. Le wena o tla rata go dira bjalo. Ke ditaba tše dibotse!—Ditiro 5:41, 42.

Go dira se ke tsela e bohlokwa ya go bontšha gore o morutiwa wa Jesu Kriste. Ka Beibeleng Jesu o bitšwa “hlatse ye e bôtêxaxo, Morereši.” Ge a be a le lefaseng o ile a bolela a re: “Mmušô wa maxodimo o batametše,” gomme a roma barutiwa ba gagwe gore ba dire se se swanago. (Kutollo 3:14; Mateo 4:17; 10:7) Ka morago, Jesu o ile a laela balatedi ba gagwe gore: “Ké xôna yang Le dirê dithšaba ka moka barutiwa . . . ka xo ba ruta.” Gape o ile a bolela e sa le pele gore pele bofelo bo fihla, “ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka.”—Mateo 24:14, NW; 28:19, 20.

Go na le ditsela tše dintši tša go tsebatša ditaba tše tše dibotse. Go boledišana le bagwera le batho bao o ba tlwaetšego gantši go bula tsela ya go dira bjalo. Ba bangwe ba dira se ka go ngwala mangwalo goba ka go diriša mogala. Ba bangwe ba romela dipuku tšeo di nago le taba yeo ba naganago gore motho yo ba mo tlwaetšego o tla e thabela kudu. Dihlatse di iša molaetša ka ntlo le ntlo ka baka la gore di kganyoga gore di se foše le o tee.

Beibele e na le taletšo ye e borutho: “Môya le mmeeletšwa ba re; Tlaa! Le e a kwaxo a ke a re: Tlaa! Le e a nyorilwexo a a tlê a tšeê meetse a bophelô à fo fiwa fêla.” (Kutollo 22:17) Go botša ba bangwe ka lefase la Paradeise le ditšhegofatšo tša lona go swanetše go dirwa ka go rata, ka pelo e tletšego kganyogo ya go abelana le ba bangwe ditaba tše tše dibotse.

Re kgodišegile gore o na le dipotšišo tše dingwe mabapi le Dihlatse tša Jehofa le ditumelo tša tšona. Mo gongwe ditaba tše dingwe ke tšeo go ngangišanwago ka tšona. Re tla rata go araba dipotšišo tša gago. Sekgoba ke se senyenyane poroutšheng ye, ka gona re go kgothaletša gore o botšiše Dihlatse tša lefelong la geno. O ka dira bjalo dibokeng Holong ya tšona ya Mmušo goba ge di go etela legaeng la gago. Goba o ka romela dipotšišo tša gago go Watch Tower o diriša aterese e swanetšego e lokeleditšwego ka mo tlase.