‘Yo ke Yena Morwa Wa-ka’

GE BANA ba dira dilo tše dibotse, bao ba ba hlokomelago ba a kgahlega. Ge ngwanenyana a dira selo se itšego gabotse, tatagwe o ikgantšha ka go botša batho ba bangwe gore: “Yo ke morwedi wa-ka.” Goba ge e ba mošemane a dira dilo tše dibotse, tate o thabela go bolela gore: “Yo ke morwa wa-ka.”

Jesu ka mehla o dira seo se kgahlišago Tatagwe. Ka gona, Tatagwe o ikgantšha ka yena. Na o sa gopola seo Tatago Jesu a ilego a se dira ka letšatši le lengwe ge Jesu a be a e-na le balatedi ba gagwe ba bararo?— Ee, Modimo o ile a bolela a le legodimong go ba botša gore: ‘Yo ke Yena Morwa-moratwa wa-ka yo ke kgahlwago ke Yena.’—Mateo 17:5.

Jesu ka mehla o thabela go dira dilo tšeo di kgahlago Tatagwe. Na o tseba lebaka? Ka gobane o rata Tatagwe e le ka kgonthe. Ge e ba motho a dira dilo feela ka gobane a gapeletšega, se se bonagala se tla ba thata. Eupša ge a dira ka go rata, go ba bonolo. Na o tseba seo se bolelwago ke go rata?— Go bolela go nyaka e le ka kgonthe go dira selo se itšego.

Gaešita le pele ga ge a e-tla lefaseng, Jesu o be a ikemišeditše go dira selo le ge e le sefe seo Tatagwe a bego a mo kgopela gore a se dire. O be a ka dira bjalo ka gobane a rata Tatagwe, Jehofa Modimo. Jesu o be a e-na le bodulo bjo bo kgahlišago legodimong le Tatagwe. Eupša Modimo o be a e-na le modiro o kgethegilego woo a bego a nyaka gore Jesu a o dire. Gore a dire modiro woo, Jesu o ile a swanelwa ke gore a tloge legodimong. O ile a swanelwa ke gore a belegwe e le ngwana lefaseng. Jesu o be a ikemišeditše go dira se ka gobane Jehofa o be a nyaka gore a se dire.

Gore a belegwe e le ngwana lefaseng, Jesu o be a swanetše ke go ba le mma. Na o tseba gore e be e le mang?— Leina la gagwe e be e le Maria. Jehofa o ile a roma morongwa wa gagwe Gabariele go tšwa legodimong gore a tle a bolele le Maria. Gabariele o ile a mmotša gore o be a tla ba le ngwana wa mošemane. Ngwana o be a tla rewa leina la Jesu. Tatago ngwana e be e tla ba mang?— Morongwa o ile a bolela gore Tatago ngwana e be e tla ba Jehofa Modimo. Ke ka baka leo Jesu a bego a tla bitšwa Morwa wa Modimo.

O nagana gore Maria o ile a ikwa bjang ka se?— Na o ile a re, “Ga ke nyake go ba mmago Jesu”? Aowa, Maria o be a ikemišeditše go dira seo Modimo a bego a se nyaka. Eupša Morwa wa Modimo wa legodimong o be a ka belegwa bjang e le ngwana lefaseng? Go belegwa ga Jesu go be go fapane bjang le go belegwa ga bana ba bangwe ka moka? Na o a tseba?—

Modimo o be a dirile batswadi ba rena ba pele e lego Adama le Efa gore ba kopane gotee ka tsela e makatšago. Ka morago ga moo, ngwana o be a ka thoma go gola ka mpeng ya mmagwe. Batho ba bolela gore se ke mohlolo! Ke kgodišega gore o dumelelana le seo.

Bjale Modimo o ile a dira selo seo e bego e tloga e le mohlolo o makatšago. O ile a tšea bophelo bja Morwa wa gagwe go tloga legodimong gomme a bo tsenya ka mpeng ya Maria. Modimo o be a se a ka a dira seo pele e bile ga se a ka a se dira ga e sa le go tloga nakong yeo. Ka baka la mohlolo wo, Jesu o ile a thoma go gola ka mpeng ya Maria go fo etša ge bana ba bangwe ba gola ka dimpeng tša bo-mmago bona. Ka morago ga moo, Maria o ile a nyalwa ke Josefa.

Ge nako ya gore Jesu a belegwe e fihla, Maria le Josefa ba be ba etetše motseng wa Betlehema. Eupša go be go tletše batho. Go be go tloga go se na phapoši bakeng sa Maria le Josefa, ka gona ba ile ba swanelwa ke go dula lefelong la diphoofolo. Maria o ile a belegela gona moo gomme Jesu o ile a bewa ka legopong go etša ge o ka bona mo seswantšhong. Legopo ke lefelo leo go jelago dikgomo le diphoofolo tše dingwe.

Go ile gwa direga dilo tše makatšago bošegong bjoo Jesu a belegwego ka bjona. Morongwa o ile a iponatša go badiši ba bangwe kgaufsi le Betlehema. O ile a ba botša gore Jesu e be e le motho wa bohlokwa. Morongwa o ile a re: ‘Bonang, ke le botša ditaba tše dibotse tšeo di tlago go thabiša batho. Gobane lehono go belegwe motho yo a tlago go phološa batho.’—Luka 2:10, 11.

Morongwa o ile a botša badiši gore ba be ba tla hwetša Jesu kua Betlehema a robaditšwe ka legopong. Gatee-tee barongwa ba bangwe legodimong ba ile ba tlatša morongwa wa pele go tumišeng Modimo. Barongwa ba ile ba opela ka gore: ‘Tumišo a e ye go Modimo, lefaseng go be le khutšo, kgahlišo bathong.’—Luka 2:12-14.

Ge barongwa ba tlogile, badiši ba ile ba ya Betlehema gomme ba hwetša Jesu. Ge ba le moo ba ile ba botša Josefa le Maria dilo ka moka tše dibotse tšeo ba di kwelego. Na o ka kgona go akanya kamoo Maria a bego a thabile ka gona ka baka la ge a ile a ikemišetša go ba mmago Jesu?

Ka morago Josefa le Maria ba ile ba iša Jesu motseng wa Natsaretha. Ke moo Jesu a goletšego gona. Ge a godile, o ile a thoma modiro wa gagwe o mogolo wa go ruta. Ye e be e le karolo ya modiro wo Jehofa Modimo a bego a nyaka gore Morwa wa gagwe a o dire lefaseng. Jesu o be a ikemišeditše go dira modiro woo ka gobane o be a rata Tatagwe wa legodimong kudu.

Pele Jesu a thoma modiro wa gagwe e le Morutiši yo Mogolo, o ile a kolobetšwa ke Johane Mokolobetši ka Nokeng ya Jorodane. Ke moka go ile gwa direga selo se sengwe se se tlabago! Ge Jesu a e-tšwa ka meetseng, Jehofa o ile a bolela a le legodimong a re: ‘Yena yo ke Yena Morwa-moratwa wa-ka, yo ke kgahlwago ke Yena.’ (Mateo 3:17) Na ga o ikwe o thaba ge batswadi ba gago ba go botša gore ba a go rata?— Re ka kgodišega gore Jesu le yena o be a thaba.

Jesu ka mehla o be a dira se se lokilego. O be a sa ikgakantšhe ka go itira motho yoo a sego yena. Ga se a ka a botša batho gore ke yena Modimo. Morongwa Gabariele o be a boditše Maria gore Jesu o be a tla bitšwa Morwa wa Modimo. Jesu ka boyena o boletše gore e be e le Morwa wa Modimo. Le gona ga se a ka a botša batho gore o tseba kudu go feta Tatagwe. O itše: ‘Tate o mpheta ka bogolo.’—Johane 14:28.

Gaešita le kua legodimong, ge Tatago Jesu a be a mo nea modiro gore a o dire, Jesu o be a o dira. O be a sa bolele gore o tla o dira ke moka a dira selo se sengwe se se fapanego. O be a rata Tatagwe. Ka gona o be a theetša seo Tatagwe a bego a se bolela. Ka gona, ge Jesu a fihla lefaseng, o ile a dira seo Tatagwe wa legodimong a bego a mo rometše go se dira. Ga se a fetša nako ya gagwe a dira selo se sengwe se se fapanego. Ga go makatše ge Jehofa a kgahlwa ke Morwa wa gagwe!

Le rena re nyaka go kgahliša Jehofa, na ga go bjalo?— Ka gona, re swanetše go bontšha gore ka kgonthe re kwa Modimo go etša ge Jesu a be a mo kwa. Modimo o bolela le rena ka Beibele. E be e ka se be mo go swanetšego go itira eka re kwa Modimo eupša re dumela le go dira dilo tšeo di thulanago le Beibele, na ga go bjalo?— Le gona gopola gore re tla thabela go kgahliša Jehofa ge e ba re mo rata e le ka kgonthe.