Tsela ya go ba yo a Thabilego

KA MOKA ga rena re rata go ba bao ba thabilego, na ga go bjalo?— Eupša ga se batho ba bantši bao ba thabilego e le ka kgonthe. Na o tseba lebaka?— Ke ka gobane ga se ba ithuta sephiri sa lethabo. Ba nagana gore go hwetša dilo tše dintši ke tsela ya go ba yo a thabilego. Eupša ge ba hwetša dilo tše, lethabo la bona ga le tšee nako e telele.

Sephiri sa bohlokwa se se. Morutiši yo Mogolo o itše: ‘Lethabo la go nea le feta la go newa.’ (Ditiro 20:35) Ka gona, tsela ya go ba yo a thabilego ke efe?— Ee, ke ka go nea ba bangwe dilo le ka go ba direla dilo. Na o be o tseba seo?—

Anke re naganišiše ka se ka mo go tšwelago pele. Na Jesu o boletše gore motho yo a amogelago mpho o be a ka se thabe?— Aowa, ga se a ka a bolela seo. O rata go amogela dimpho, na ga go bjalo?— Motho yo mongwe le yo mongwe o a rata. Re a thaba ge re amogela dilo tše dibotse.

Eupša Jesu o boletše gore go na le lethabo le legolo ka go fetišiša ge re nea ba bangwe. Ke mang yo a ka bolelago gore o neile batho dilo tše dintši kudu go feta motho le ge e le ofe yo mongwe?— Ee, ke Jehofa Modimo.

Beibele e bolela gore Modimo ‘o nea bohle bophelo, moya le dilo tšohle.’ O re nea dipula di e-tšwa legodimong gotee le seetša sa letšatši, gore dibjalo di mele gomme re hwetše dijo. (Ditiro 14:17; 17:25) Ga go makatše ge Beibele e bitša Jehofa ‘Modimo yo a thabilego’! (1 Timotheo 1:11) Go nea ba bangwe dilo ke e nngwe ya dilo tšeo di thabišago Modimo. Ge re nea ba bangwe dilo, le rena re ka thaba.

Bjale, ke eng seo re ka se neago ba bangwe? O be o ka re’ng?— Ka dinako tše dingwe mpho e bitša tšhelete. Ge e ba e le mpho yeo o e hwetšago lebenkeleng, o tla swanela ke go e lefelela. Ka gona ge e ba o nyaka go nea motho mpho e bjalo, o ka swanelwa ke go boloka tšhelete go fihlela o e-na le e lekanego go ka reka mpho.

Eupša ga se dimpho ka moka tšeo di swanetšego go rekwa. Ka mohlala, letšatšing leo le fišago, galase ya meetse a tonyago e tloga e le bose kudu! Ka gona ge o nea mpho yeo mothong yo a nyorilwego, o ka hwetša lethabo leo le tlišwago ke go nea.

Mohlomongwe ka letšatši le lengwe wena le mmago le ka paka dikuku. Seo e ka ba se se kgahlišago. Eupša o ka dira’ng ka tše dingwe tša dikuku tšeo e lego seo se tlago go go thabiša kudu go e na le gore o di je ka moka ga tšona o nnoši?— Ee, o ka fa yo mongwe wa bagwera ba gago tše dingwe. Na o ka rata go dira bjalo ka nako e nngwe?—

Morutiši yo Mogolo le baapostola ba gagwe ka moka ba be ba tseba lethabo leo le tlišwago ke go nea. Na o tseba seo ba ilego ba se nea batho ba bangwe?— E be e le selo se se di phalago ka moka lefaseng! Ba be ba tseba therešo mabapi le Modimo gomme ka lethabo ba ile ba abelana ditaba tše tše dibotse le ba bangwe. Ba ile ba dira se ka ntle le go dumelela motho le ge e le ofe gore a ba nee tšhelete bakeng sa seo ba bego ba se nea.

Ka letšatši le lengwe moapostola Paulo le mogwera wa gagwe wa potego e lego morutiwa Luka ba ile ba gahlana le mosadi yo le yena a bego a nyaka go hwetša lethabo la go nea. Ba ile ba gahlana le yena nokeng. Paulo le Luka ba be ba ile moo ka gobane ba be ba kwele gore ke lefelo la thapelo. Ke therešo gore ge ba fihla ba ile ba hwetša basadi ba bangwe ba rapela.

Paulo o ile a thoma go botša basadi ba ditaba tše dibotse mabapi le Jehofa Modimo le Mmušo wa gagwe. Yo mongwe wa bona o be a bitšwa Lidia, gomme o ile a theetša ka kelohloko. Ka morago ga moo, Lidia o ile a nyaka go dira selo se itšego bakeng sa go bontšha gore o be a tloga a ratile ditaba tše dibotse tše a di kwelego. Ka gona o ile a kgopela Paulo le Luka ka gore: ‘Ge le kgodilwe gore ke dumetše Jehofa, gona tlang lapeng la-ka le dule gona.’ Ka gona, o ile a kgona go ba dira gore ba ye lapeng la gagwe.—Ditiro 16:13-15.

Lidia o be a thabišitšwe ke ge bahlanka ba ba Modimo ba tlile legaeng la gagwe. O be a ba rata ka gobane ba be ba mo thušitše go ithuta ka Jehofa le Jesu le mabapi le kamoo batho ba ka phelago ka mo go sa felego. O ile a thabišwa ke ge a kgona go nea Paulo le Luka dijo le lefelo la go khutša. Ka gona, go nea ga Lidia go ile gwa mo thabiša ka gobane o be a tloga a nyaka go nea. Seo ke selo se re swanetšego go se gopola. Motho yo mongwe a ka re botša gore re swanetše go nea motho yo mongwe mpho. Eupša ge e ba re tloga re sa rate go dira bjalo, go nea moo go ka se ke gwa re thabiša.

Ka mohlala, go thwe’ng ge e ba o be o swere malekere ao o bego o nyaka go a ja? Ge ke be nka go botša gore o fe ngwana yo mongwe a mangwe, na o be o tla thabela go mo fa?— Eupša go thwe’ng ge e ba o e-na le malekere a mangwe ge o gahlana le mogwera yo o mo ratago kudu? Ge nkabe e be e le wena o nagannego gore o abelane a mangwe le mogwera wa gago, na seo se be se ka se go thabiše?—

Ka dinako tše dingwe re rata motho kudu mo e lego gore re nyaka go mo nea dilo tšohle gomme re se šale le selo. Ye ke tsela yeo re swanetšego go ikwa ka yona ka Modimo ge lerato la rena la go Mo rata le dutše le gola.

Morutiši yo Mogolo o be a tseba ka mosadi wa modiidi yo a bego a ikwa ka tsela yeo. O be a mmone tempeleng kua Jerusalema. O be a e-na le ditšheletiana tše pedi tša tšhipi; gomme ke sohle seo a bego a e-na le sona. Eupša o ile a di lahlela ka bobedi ka lepokising e le moneelo goba mpho ya tempele. Ga go yo a mo gapeleditšego go dira seo. Batho ba bantši moo ba be ba tloga ba sa tsebe seo a se dirilego. O dirile seo ka gobane o be a nyaka go se dira le ka gobane o be a tloga a rata Jehofa. O ile a thabišwa ke ge a ile a kgona go nea.—Luka 21:1-4.

Go na le ditsela tše dintši tšeo ka tšona re ka neago. Na o ka nagana ka tše dingwe tša tšona?— Ge e ba re nea ka gobane re rata go dira bjalo e le ka kgonthe, re tla thaba. Ke ka baka leo Morutiši yo Mogolo a re botšago gore: ‘Itlwaetšeng go nea.’ (Luka 6:38) Ge e ba re dira bjalo, re tla thabiša batho ba bangwe. Gomme re tla ba ba thabilego go feta bohle!