Go tla Direga’ng ge e ba re E-hwa?

KA GE mo gongwe o ka ba o tseba, batho lehono ba a tšofala, ba a babja le go hwa. Gaešita le bana ba bangwe ba a hwa. Na o swanetše go boifa lehu goba motho le ge e le ofe yo a hwilego?—Na o tseba gore go direga’ng ge re e-hwa?—

Ee, ga go na motho yo a phelago lehono yo a kilego a hwa gomme a boela bophelong go tlo re botša ka seo se diregago ge motho a e-hwa. Eupša nakong ya ge Jesu, Morutiši yo Mogolo, a be a le lefaseng, go ile gwa ba le monna yo bjalo. Re ka ithuta ka seo se diregago ka bao ba hwago ka go bala mabapi le yena. Monna yo e be e le mogwera wa Jesu gomme a dula Bethania, e lego toropo e nyenyane yeo e sego kgole le Jerusalema. Leina la gagwe e be e le Latsaro, gomme o be a e-na le dikgaetšedi tše pedi e lego Mareta le Maria. Anke re bone seo Beibele e bolelago gore se ile sa direga.

Ka letšatši le lengwe Latsaro o ile a babja o šoro. Ka nako yeo, Jesu o be a le kgole kudu. Ka gona Mareta le Maria ba ile ba romela motseta gore a yo botša Jesu gore kgaetšedi ya bona Latsaro o a babja. Ba dirile se ka gobane ba be ba tseba gore Jesu a ka tla gomme a fodiša kgaetšedi ya bona. Jesu e be e se ngaka, eupša o be a e-na le matla a tšwago go Modimo mo e lego gore o be a kgona go fodiša mohuta o mongwe le o mongwe wa bolwetši.—Mateo 15:30, 31.

Lega go le bjalo, pele ga ge Jesu a ka ya go bona Latsaro, Latsaro o ile a babja kudu moo a ilego a ba a hwa. Eupša Jesu o ile a botša barutiwa ba gagwe gore Latsaro o robetše le gore O be a tla yo mo tsoša. Barutiwa ba be ba sa kwešiše seo Jesu a se bolelago. Ka gona Jesu o ile a bolela ka go lebanya gore: ‘Latsaro o hwile.’ Se se bontšha’ng mabapi le lehu?— Ee, gore le swana le go robala boroko bjo bogolo. Ke boroko bjo bogolo kudu moo e lego gore motho ga a lore le go lora.

Mo nakong ye Jesu o tlile go etela Mareta le Maria. Bagwera ba bantši ba lapa ba be ba šetše ba fihlile. Ba be ba tlile go homotša dikgaetšedi ka gobane ngwanabo tšona a hwile. Ge Mareta a be a e-kwa gore Jesu o e-tla, o ile a ya go mo gahlanetša. Kapejana Maria le yena o ile a tšwela ntle bakeng sa go yo bona Jesu. O be a nyamile kudu gomme a lla, a ba a wela dinaong tša gagwe. Bagwera ba bangwe bao ba bego ba latela Maria le bona ba be ba lla.

Morutiši yo Mogolo o ile a botšiša gore ba beile Latsaro kae. Ge ba e-kwa seo, batho ba ile ba iša Jesu lebitleng leo Latsaro a bego a bolokilwe go lona. Ge Jesu a be a bona batho ka moka ba lla, le yena o ile a thoma go lla. O be a tseba kamoo go lego bohloko ka gona go lahlegelwa ke moratiwa ka lehu.

Go be go e-na le lefsika ka pele ga lebitla, ka gona Jesu o ile a re: ‘Pshikološang lefsika leo.’ Na ba be ba swanetše go dira bjalo?— Mareta o be a sa nagane gore e be e le kgopolo e botse go dira bjalo. O ile a re: ‘Morena, o šetše a nkga, ka gobane e šetše e le matšatši a mane a hwile.’

Eupša Jesu o ile a mmotša gore: ‘Na ga se ka go botša gore ge o dumela o tlo bona letago la Modimo?’ Jesu o be a bolela gore Mareta o be a tlo bona selo se sengwe seo se bego se tla tlišetša Modimo letago. Jesu o be a tlo dira’ng? Ge lefsika le pshikološitšwe, Jesu o ile a rapela Jehofa ka go hlaboša. Ke moka Jesu o ile a bolela ka lentšu le le phagamego a re: ‘Latsaro, tšwaa o tle mo!’ Na o be a tla tšwa? Na o be a ka kgona?—

Na o ka kgona go tsoša motho yo a robetšego?— Ee, ge e ba o mmitša ka lentšu la go hlaboša, o tla tsoga. Eupša na o ka kgona go tsoša motho yo a robetšego lehung?— Aowa. Go sa šetšwe gore o mmitša ka go hlaboša gakaakang, motho yo a hwilego a ka se go kwe. Ga go na seo nna goba wena goba motho yo mongwe lefaseng lehono a ka se dirago go tsoša motho yo a hwilego.

Eupša Jesu ga a swane le rena. O na le matla a kgethegilego a tšwago go Modimo. Ka gona ge Jesu a be a bitša Latsaro, go ile gwa direga selo se se makatšago. Monna yo a bego a e-na le matšatši a mane a hwile o ile a tšwa ka lebitleng! O ile a bušetšwa bophelong gape! O be a kgona go hema le go sepela le go bolela gape! Ee, Jesu o ile a tsoša Latsaro bahung.—Johane 11:1-44.

Bjale nagana ka se: Go diregile’ng ka Latsaro ge a be a e-hwa? Na karolo e nngwe ya gagwe—e lego moya—e ile ya tlogela mmele wa gagwe gomme ya yo phela lefelong le lengwe? Na moya wa Latsaro o ile wa ya legodimong? Na o be a phetše lebaka la matšatši a mane kua godimo a e-na le Modimo le barongwa ba bakgethwa?—

Aowa, o be a sa phele legodimong. Gopola, gore Jesu o boletše gore Latsaro o be a robetše. Na go be go swana le ge o robetše? Ge o ile le boroko, ga o tsebe seo se diregago go go dikologa, na ga go bjalo?— Gomme ge o tsoga ga o ke o tseba gore o robetše nako e kaakang go fihlela ge o lebelela sešupa-nako.

Go bjalo le ka batho ba ba hwilego. Ga ba tsebe selo. Ga ba kwe selo. E bile ga ba kgone go dira selo. Go be go le bjalo le ka Latsaro ge a be a hwile. Lehu le swana le boroko bjo bogolo bjoo go bjona motho a sa gopolego selo. Beibele e re: ‘Go bahu ga go se se tsebjago.’—Mmoledi 9:5, 10.

Nagana le ka se gape: Ge nkabe Latsaro a be a bile legodimong lebaka leo la matšatši a mane, na o be a ka se bolele se sengwe mabapi le seo?— Le gona ge nkabe a be a le legodimong, na Jesu o be a tla mo gomišetša lefaseng go tšwa lefelong leo le lebotse?— Ruri ga go bjalo!

Lega go le bjalo, batho ba bantši ba bolela gore re na le moya, gomme ba bolela gore moya woo o tšwela pele o phela ka morago ga ge mmele o hwile. Ba bolela gore moya wa Latsaro o be o phela felo-tsoko. Eupša Beibele ga e bolele seo. E bolela gore Modimo o bopile motho wa pele Adama e le ‘moya o phelago.’ Adama e be e le moya. Beibele gape e bolela gore ge Adama a dirile sebe, o ile a hwa. O ile a ba ‘moya o hwilego,’ gomme o ile a boela leroleng leo a bego a bopilwe ka lona. Le gona Beibele e bolela gore bana ba Adama ka moka le bona ba abetše sebe le lehu.—Genesi 2:7; 3:17-19; Numeri 6:6; Ba-Roma 5:12.

Ka gona, go molaleng gore ga re na moya wo o aroganego le mmele wa rena. Yo mongwe le yo mongwe wa rena ke moya. Le gona ka ge batho ba abetše sebe go motho wa pele e lego Adama, Beibele e re: ‘Moya o senyago o tla hwa.’—Hesekiele 18:4.

Batho ba bangwe ba boifa bahu. Ba ka se ke ba batamela mabitleng ka gobane ba nagana gore bahu ba na le meoya yeo e kgaoganego le mebele ya bona yeo e ka gobatšago bao ba phelago. Eupša na motho yo a hwilego a ka kgona go gobatša motho yo a phelago?— Aowa, a ka se kgone go mo gobatša.

Batho ba bangwe e bile ba dumela gore bahu ba ka kgona go boa e le meoya bakeng sa go etela bao ba phelago. Ka gona ba ba beela dijo. Eupša batho bao ba dirago bjalo ga ba dumele e le ka kgonthe seo Modimo a se bolelago ka bahu. Ge e ba re dumela seo Modimo a se bolelago, re ka se ke ra boifa bahu. Le gona ge e ba re leboga Modimo e le ka kgonthe bakeng sa bophelo, re tla bontšha se ka go dira dilo tšeo Modimo a di amogelago.

Eupša mo gongwe o ka ipotšiša gore: ‘Na Modimo o tla bušetša bana bao ba hwilego bophelong gape? Na o nyaka go dira seo e le ka kgonthe?’ Anke re boledišane ka seo nakong e latelago.