Mmušo wa Modimo ke Eng? Kamoo re ka Bontšhago ka Gona Gore re a o Nyaka

NA O tseba thapelo yeo Jesu a ilego a e ruta balatedi ba gagwe?— Ge e ba o sa e tsebe, re ka e bala gotee ka Beibeleng go Mateo 6:9-13. Thapelo ye yeo ba bantši ba e bitšago Thapelo ya Morena, e akaretša le mantšu a rego: ‘Mmušo wa gago a o tle.’ Na o tseba gore Mmušo wa Modimo ke eng?—

E re ke go hlalosetše, kgoši ke mmuši wa naga goba tikologo. Gomme pušo ya gagwe e bitšwa mmušo. Dinageng tše dingwe motho yo a etelelago pele mmušong o bitšwa mopresidente. Mmuši wa Mmušo wa Modimo o bitšwa’ng?— O bitšwa Kgoši. Ke ka baka leo pušo ya Modimo e bitšwago Mmušo.

Na o tseba gore Jehofa Modimo o kgethile mang gore e be Kgoši ya mmušo wa Gagwe?— O kgethile Morwa wa gagwe, Jesu Kriste. Ke ka baka la’ng a phala mmuši le ge e le ofe yoo batho ba ka mo kgethago?— Ke ka baka la gore Jesu o rata Tatagwe, Jehofa, e le ka kgonthe. Ka baka leo, ka mehla o dira seo se lokilego.

Nako e telele pele ga ge Jesu a ka belegwa nageng ya Betlehema, Beibele e be e boletše ka matswalo a gagwe gomme e itše o tla ba Mmuši yo a kgethilwego ke Modimo. Anke re bale ka se go Jesaya 9:5, 6. E re: ‘Gobane re tswaletšwe ngwana, re neilwe morwa yo pušo e lego legetleng la gagwe. Leina la gagwe ke Kgošana ya Khutšo. Mmušo wa gagwe ke wa kenelo wa khutšo ye e sa felego.’—

Na o tseba gore ke ka baka la’ng Mmuši wa Mmušo wa Modimo a bitšwa ‘Kgošana’ lengwalong le?— Ge e le gabotse, kgošana ye ke morwa wa kgoši. Le gona, Jesu ke Morwa wa Kgoši e Kgolo, Jehofa. Eupša Jehofa o ile a ba a dira gore Jesu e be Kgoši ya mmušo wa Gagwe, wo o tlago go buša lefase ka nywaga e sekete. (Kutollo 20:6) Ka morago ga ge Jesu a kolobeditšwe, o ile a thoma go ‘goelela a re: Sokologang, gobane mmušo wa magodimo o batametše.’—Mateo 4:17.

O nagana gore ke ka baka la’ng Jesu a ile a bolela gore Mmušo o be o batametše?— Ka gobane Kgoši, yeo ka morago e bego e tla buša legodimong, e be e e-na le bona! Ke ka baka leo Jesu a ilego a botša batho gore: ‘Mmušo wa Modimo o gare ga lena.’ (Luka 17:21) Na o be o ka se thabele gore Kgoši ya Jehofa e be kgaufsi kudu le wena mo e lego gore o be o ka ba wa e kgwatha?—

Ka gona mpotše mo, ke modiro ofe wa bohlokwa wo Jesu a bego a tletše go o dira lefaseng?— Jesu o ile a araba potšišo yeo ka gore: ‘Le metse e mengwe ke swanetše go e botša ditaba tše botse tša mmušo wa Modimo, ke sona se ke rometšwego sona.’ (Luka 4:43) Jesu o be a tseba gore a ka se kgone go dira modiro ka moka wa boboledi a nnoši. Ka gona, o nagana gore o ile a dira’ng?—

Jesu o ile a tšea batho a sepela le bona go ba bontšha kamoo modiro wa boboledi o dirwago ka gona. Ba pele bao a ilego a ba ruta e bile ba 12 bao a bego a ba kgethile gore e be baapostola ba gagwe. (Mateo 10:5, 7) Eupša na Jesu o ile a ruta baapostola ba gagwe feela go dira modiro wo? Aowa, Beibele e bolela gore Jesu gape o ile a ruta le ba bangwe ba bantši go bolela. Lebakeng le lengwe o ile a roma barutiwa ba bangwe ba 70 ba le ka babedi ka babedi ba mo etile pele. Gomme ke eng seo ba ilego ba se ruta batho?— Jesu o itše: ‘Yang, gomme le ba botše gore: Mmušo wa Modimo o batametše.’ (Luka 10:9) Ka tsela ye, batho ba ile ba ithuta ka ga mmušo wa Modimo.

Kgale-kgale mehleng ya Isiraele, dikgoši tše di sa tšwago go kgethwa di be di tšea leeto go ya motseng di nametše pokolo bakeng sa go yo iponagatša bathong. Ka gona, se ke seo Jesu a se dirilego ge a be a etela Jerusalema la mafelelo. O a bona ge, Jesu e be e tlo ba Mmuši wa Mmušo wa Modimo. Na batho ba be ba rata gore e be Kgoši ya bona?—

Ge e le gabotse, ge a dutše a nametše pokolo, ba bantši lešabeng ba ile ba thoma go mo alela diaparo tša bona tseleng. Ba bangwe ba ile ba rema makala dihlareng gomme ba a ala tseleng. Ka go dira se, ba ile ba bontšha gore ba be ba nyaka gore Jesu e be Kgoši ya bona. Ba ile ba goelela ka gore: ‘A go retwe Kgoši e tlago ka leina la Jehofa!’ Eupša e be e se bohle bao ba bego ba thabile. Ge e le gabotse, baetapele ba bangwe ba bodumedi ba ile ba ba ba botša Jesu gore, ‘Botša barutiwa ba gago gore ba homole.’—Luka 19:28-40.

Matšatši a mahlano ka morago, Jesu o ile a swarwa gomme a išwa mošate pele ga mmušiši Pontio Pilato. Manaba a Jesu a be a bolela gore Jesu o itira kgoši le gore o lwantšhana le mmušo wa Roma. Ka gona, Pilato o ile a botšiša Jesu mabapi le se. Jesu o ile a bontšha gore o be a sa leke go tšea mmušo. O boditše Pilato gore: ‘Mmušo wa-ka ga se o tšwago lefaseng leno.’—Johane 18:36.

Ka morago ga moo Pilato o ile a tšwela ka ntle gomme a botša batho gore ga a hwetše molato go Jesu. Eupša batho ba be ba sa nyake gore Jesu e be Kgoši ya bona. Ba be ba sa nyake gore a lokollwe. (Johane 18:37-40) Ka morago ga ge a boletše le Jesu gape, Pilato o be a kgodišegile gore go be go se na selo se sebe seo Jesu a bego a se dirile. Ka baka leo, mafelelong ka morago ga ge a ntšheditše Jesu ka ntle la mafelelo, Pilato o ile a re: ‘Ke yeo Kgoši ya lena!’ Eupša batho ba ile ba goelela ka gore: ‘Mo tloše! Mo tloše! Mo kokotele koteng!’

Pilato o ile a botšiša gore: ‘A ke kokotele kgoši ya lena koteng?’ Baperesita ba bagolo ba ile ba araba ka gore: ‘Ga re na kgoši ge e se Kesara.’ Nagana feela! Baperesita bao ba babe ba ile ba kgona go dira gore batho ba gane Jesu!—Johane 19:1-16.

Lehono, boemo ke bjo bo swanago kudu le mehleng ya Jesu. Batho ba bantši ga ba nyake e le ka kgonthe gore Jesu e be Kgoši ya bona. Ba ka ba ba bolela gore ba dumela go Modimo eupša ga ba nyake gore Modimo goba Kriste a ba botše seo ba swanetšego go se dira. Ba nyaka mebušo yeo e lego ya bona gona mo lefaseng.

Go thwe’ng ka rena? Ge re ithuta ka Mmušo wa Modimo gotee le dilo tše dibotse tše o tlago go di dira, seo se dira gore re ikwe bjang ka Modimo?— Re a mo rata, na ga go bjalo?— Ka gona, re ka bontšha bjang gore re a mo rata le gore re rata go bušwa ke Mmušo wa gagwe?—

Re ka bontšha Modimo tsela yeo re ikwago ka yona ka go latela mohlala wa Jesu. Ke eng seo Jesu a ilego a se dira go bontšha gore o rata Jehofa?— Jesu o hlalositše gore: ‘Ka mehla ke dira se se mo kgahlago.’ (Johane 8:29) Ee, Jesu o ile a tla lefaseng bakeng sa go tlo ‘dira thato ya Modimo’ le go ‘phetha modiro wa gagwe.’ (Ba-Hebere 10:7; Johane 4:34) Ela hloko seo Jesu a ilego a se dira pele ga ge a ka thoma modiro wa gagwe wa boboledi.

Jesu o ile a theogela go Johane Mokolobetši Nokeng ya Jorodane. Ka morago ga gore ba tsene ka meetseng, Johane o ile a ina Jesu ka mo go feletšego ka tlase ga meetse gomme a mo ntšha gape. Na o tseba gore ke ka baka la’ng Johane a ile a kolobetša Jesu?—

Jesu o ile a kgopela Johane gore a mo kolobetše. Eupša re tseba bjang gore Modimo o be a nyaka gore Jesu a kolobetšwe?— Re tseba seo ka baka la gore ge Jesu a be a e-tšwa ka meetseng, o ile a kwa lentšu la Modimo le e-tšwa legodimong le re: ‘O Morwa-moratwa wa-ka yo ke kgahlwago ke Yena.’ Modimo o ile a ba a romela moya wa gagwe o mokgethwa ka sebopego sa leeba gore o theogele godimo ga Jesu. Ka gona, ka go kolobetšwa, Jesu o ile a bontšha gore o be a nyaka go hlankela Jehofa bophelo bja gagwe ka moka, ee, ka mo go sa felego.—Mareka 1:9-11.

Gona bjale wena o sa gola. Eupša o tla dira’ng ge o šetše o godile?— Na o tla swana le Jesu gomme wa kolobetšwa?— O swanetše go mo ekiša, ka gobane Beibele e re o go ‘tlogeletše mohlala gore o latele dikgato tša gagwe kgaufsi.’ (1 Petro 2:21) Ge o kolobetšwa, o tla be o bontšha gore ka kgonthe o rata go bušwa ke Mmušo wa Modimo. Eupša go fo kolobetšwa ga se mo go lekanego.

Re swanetše go kwa dilo tšohle tšeo Jesu a di rutilego. Jesu o itše ‘ga se ra swanela go ba karolo ya lefase.’ Na re tla ba re bontšha go mo kwa ge e ba re akaretšwa dilong tša lefase? Jesu le baapostola ba gagwe ba ile ba phema dilo tše bjalo. (Johane 17:14) Go e na le moo ke eng seo ba ilego ba se dira?— Ba ile ba bolela le batho ba bangwe ka Mmušo wa Modimo. Seo e be e le modiro o mogolo maphelong a bona. Na le rena re ka dira modiro o swanago?— Ee re ka o dira e bile re tla o dira ge e ba re bontšha go botega ka seo re se bolelago ge re rapelela gore Mmušo wa Modimo o tle.