Kriste o Ahlola Dinku le Dipudi a le Sedulong sa Bogoši

Jesu o Thabeng ya Mehlware, o sa tšwa go anega seswantšho sa mabapi le dikgarebe tše lesome le sa mabapi le ditalente. Jesu o phetha bjang karabo ya gagwe ya potšišo yeo a e botšišitšwego ke baapostola ya mabapi le pontšho ya go ba gona ga gagwe le bofelo bja tshepedišo ya dilo? O dira seo ka go anega seswantšho sa mafelelo seo se lego mabapi le dinku le dipudi.

Jesu o thoma ka go ba alela boemo, o re go bona: “Ge Morwa wa motho a fihla ka letago la gagwe a na le barongwa ka moka, o tla dula sedulong sa gagwe sa bogoši sa letago.” (Mateo 25:31) Ga go na pelaelo ya gore Jesu ke yena motho yo bohlokwa seswantšhong se. O be a fela a ipitša “Morwa wa motho.”—Mateo 8:20; 9:6; 20:18, 28.

Seswantšho se se tla phethagala neng? Se tla phethagala ge Jesu “a fihla ka letago la gagwe” a na le barongwa gomme a dula “sedulong sa gagwe sa bogoši sa letago.” O be a šetše a boletše mabapi le “Morwa wa motho a etla ka maru a legodimo ka matla le letago le legolo” a na le barongwa ba gagwe. Seo se be se tla direga neng? Se tla direga “gateetee ka morago ga masetlapelo.” (Mateo 24:29-31; Mareka 13:26, 27; Luka 21:27) Ka gona seswantšho se se tla phethagala nakong ya ge Jesu a etla a le letagong. Ka gona Jesu o tla dira’ng ka nako yeo?

Jesu o hlalosa gore: “Ge Morwa wa motho a fihla . . . , ditšhaba ka moka di tla kgobokanywa pele ga gagwe gomme o tla kgethologanya batho go etša ge modiši a kgethologanya dinku go dipudi. Dinku o tla di bea ka letsogong la gagwe la le letona, eupša dipudi ka go la le letshadi.”—Mateo 25:31-33.

Ge Jesu a bolela ka dinku tšeo di lego ka lehlakoreng la bao ba amogelwago, o re: “Ke moka Kgoši e tla re go bao ba lego ka go la le letona la gagwe: ‘Tlang, lena bao le šegofaditšwego ke Tate, jang bohwa bja Mmušo wo le o lokišeditšwego go tloga go theweng ga lefase.’” (Mateo 25:34) Ke ka baka la’ng Kgoši e amogela dinku gabotse?

Kgoši e hlalosa ka gore: “Ke be ke swerwe ke tlala la nnea sa go ja; ke nyorilwe la nnea sa go nwa. Ke be ke le mosepedi la nkamogela ka borutho; ke hloboletše la nkapeša. Ke be ke babja la ntlhokomela. Ke be ke le kgolegong la tla go nna.” Ge dinku tše, e lego “baloki,” di botšiša mabapi le tsela yeo di dirilego ka gona dilo tše tše dibotse, Kgoši e araba ka gore: “Go fihla tekanyong yeo ka yona le diretšego yo mongwe wa bana bešo ba ba banyenyane, le diretše nna.” (Mateo 25:35, 36, 40, 46) Ga di dire dilo tše tše dibotse ge di le kua legodimong, ka ge go se na batho bao ba babjago goba bao ba bolawago ke tlala moo. Ditiro tše di swanetše go direlwa bana babo Kriste mo lefaseng.

Go thwe’ng ka dipudi, tšeo di lego ka go la le letshadi? Jesu o re: “Ke moka, go bao ba lego ka go la le letshadi la gagwe [Kgoši e] tla re: ‘Tlogang go nna, lena bao le rogakilwego, le ye mollong o sa felego o lokišeditšwego Diabolo le barongwa ba gagwe. Gobane ke be ke swerwe ke tlala eupša la se nnee sa go ja, ke nyorilwe la se nnee sa go nwa. Ke be ke le mosepedi eupša la se nkamogele ka borutho; ke hloboletše la se nkapeše; ke babja ke bile ke le kgolegong la se ntlhokomele.’” (Mateo 25:41-43) Kahlolo ye e swanetše ka gobane dipudi di paletšwe ke go swara ka botho bana babo Kriste bao ba lego mo lefaseng kamoo ba bego ba swanetše go ba swara ka gona.

Baapostola ba lemoga gore kahlolo ye ya nakong e tlago e tla ba le ditlamorago tša sa ruri. Jesu o re go bona: “Ke moka [Kgoši e tla re]: ‘Ruri ke re go lena: Go fihla tekanyong yeo ka yona le sa direlago yo mongwe wa ba banyenyane ba, ga se la ntirela.’ Bona bao ba tla fedišetšwa sa ruri, eupša baloki ba tla ya bophelong bjo bo sa felego.”—Mateo 25:45, 46.

Tsela yeo ka yona Jesu a arabago potšišo ya baapostola e dira gore balatedi ba gagwe ba nagane kudu ka taba ye, gomme se se ba thuša go hlahloba dikgopolo le ditiro tša bona.