Bagoeledi ba Mmušo ba Bega
Batsomi ba Therešo ba Arabela Bohlatseng bjo bo sa Rulaganyetšwago
BEIBELE e re tsebiša gore batho ba go swana le dinku ba tla arabela lentšung la Modiši yo Bolo. (Johane 10:27) Se se bile bjalo dinageng tše dintši go akaretša le Brithania.
◻ Ka mohlala, ka 1988, pelenyana ga Keresemose, Pamela yo e lego o mongwe wa Dihlatse tša Jehofa o ile a araba mogala ka ofising yeo a bego a šoma go yona gomme a bolela le monna wa mogwebi yo a šomelago khamphani yona yeo karolong e nngwe ya Engelane. Bofelong bja polelo ya gagwe mogaleng, monna o ile a botšiša: “Na o šetše o itokišeditše Keresemose?” Pamela o itše: “Aowa!” Yo a leditšego mogala o ile a botšiša ka gore, “Na mohlomongwe ga se wa šiiwa ke nako?” Pamela o ile a araba ka gore, “Ga ke bine monyanya wa Keresemose.” Monna o ile a bolela gore seo se be se sa tlwaelega gomme a nyaka go tseba lebaka la seo. Pamela o ile a mmotša gore ke o mongwe wa Dihlatse tša Jehofa gomme a tšwela pele go hlalosa gore ga go na taelo ka Beibeleng ya gore go binwe letšatši la matswalo la Jesu, le gona ka ntle ga moo, Jesu ga se a belegwa ka December 25. Go feta moo, Keresemose setlogong sa yona e be e le monyanya wa boheitene. Yo a leditšego mogala o ile a bolela gore seo se kwala e le se se kgahlišago kudu.
Dikgwedi tše tharo ka morago Pamela o ile a araba mogala, gomme yo a leditšego mogala a re: “Na o sa gopola o bolela le nna pele ga Keresemose, o mpotša gore ga o bine monyanya wa Keresemose? Tseba, ke hweditše therešo!” E be e le monna yena yola, gomme o ile a hlalosa gore dibeke tše pedi ka morago ga Keresemose, Dihlatse tše pedi di ile tša etela legae la gagwe. O ile a ba biletša ka gare, gomme thuto ya Beibele ya thongwa. O ile a laodiša gore o dirile tšwelopele ya ka pela dithutong tša gagwe. O ile a botša kgarebe ya gagwe yeo a bego a dula le yona gore mokgwa wa bona wa go phela o be o sa kgahliše Jehofa, ka gona ba arogana, gomme mo nakong ye bobedi bja bona ba be ba e-ba gona dibokeng Holong ya Mmušo.
Bofelong bja ngwaga, ba ile ba amogelwa e le bagoeledi ba sa kolobetšwago, gomme mathomong a 1990 ba ile ba nyalana. Ke moka ba ile ba kolobetšwa gotee. A ke mafelelo a kgahlišago kudu a bohlatse bjo sa rulaganyetšwago bjo bo kopana bjoo bo neilwego ka mogala!
◻ Jehofa o ile a šegofatša kgaetšedi o mongwe yo a ilego a nea bohlatse bjo sa rulaganyetšwago kua Engelane. Nakong ya ge monna wa tša phemelo a e-tla mojakong wa gagwe, kgaetšedi o ile a mmotšiša ge e ba a be a ka rata go kgonthišetšwa gore o tla ba le bophelo bjo bobotse, lethabo le bophelo bjo bo sa felego. O ile a dumela gomme a mmotšiša gore ke mohuta ofe wa tša phemelo wo a bego a bolela ka wona. Ge a bontšhwa go tšwa Beibeleng kholofetšo ya Modimo ya bophelo bjo bo sa felego Paradeiseng mo lefaseng, o ile a amogela kopi ya puku ya O ka Phela ka mo go sa Felego Paradeiseng mo Lefaseng gomme a e bala ka moka ga yona mantšiboa a tee. Ge a be a etela kgaetšedi gape, o ile a mmotša gore tsebišo e be e le e kgahlišago—ge feela nkabe a e-na le tumelo ya go e dumela. Kgaetšedi o ile a hlalosa gore o be a swanetše go ithuta Beibele le go ba gona dibokeng Holong ya Mmušo. Thuto ya Beibele e ile ya rulaganywa, gomme a thoma go ba gona dibokeng. O ile a kolobetšwa lehlabuleng la ngwaga wona woo. Ngwaga o tee feela ka morago, o ile a nyalana le morwedi wa kgaetšedi yo a mo neilego bohlatse la mathomo. Kgaetšedi o re, “Ka gona, ke ile ka rua bobedi ngwanabo rena le mokgonyana ka bohlatse bjo bo sa rulaganyetšwago!”
Ke therešo gore batsomi ba therešo ba a arabela ge therešo ya Beibele e fetišwa ka bohlatse bjo bo sa rulaganyetšwago. Go bjalo ka ge Jesu a boletše gore dinku tša gagwe di kwa lentšu la gagwe.