Bagoeledi ba Mmušo ba a Bega

Ditherešo tša Beibele di Tšwela Pele go Bolelwa Ireland

NYWAGENG ya morago bjale naga ya ponagalo e botse ya Ireland e be e dutše e le lefelo la khuduego e kgolo. Ka nako e swanago, batho ba Ireland ba arabetše ka mo go kgahlišago molaetšeng wa Beibele wa kholofelo wo ba o tlišeditšwego ke Dihlatse tša Jehofa. Diphihlelo tše di latelago tše di tšwago Ireland di kgonthišetša se.

■ Kua Dublin yo mongwe wa Dihlatse tša Jehofa le morwedi wa gagwe yo monyenyane ba be ba tšea karolo modirong wa go bolela ka ntlo le ntlo. Ba ile ba kopana le mosadi yo a bitšwago Cathy yo a bego a swaregile kudu ka bana ba gagwe ba bantši. Hlatse e ile ya botšiša ge e ba morwedi wa yona yo a bego a ithuta go dira boboledi a be a ka abelana le yena molaetša o mokopana feela. Cathy o ile a dumela gomme ngwanenyana yo monyenyane a nea thero e kwalago le e naganišišitšwego gabotse. Cathy o ile a tlabja ke potego le tlhompho tše di lego molaleng tša ngwana yo gomme a amogela mpho ya pampišana ya Beibele.

Ka morago Cathy o ile a naganišiša ka go lokišetša gabotse le mekgwa e mebotse ya moeng wa gagwe yo monyenyane. O itše: “Ke be ke tlabilwe ke gore ngwanenyana yo monyenyane o be a ka abelana le nna molaetša o kgahlišago gakaakaa ka ntle le go lebiša tlhokomelo go yena ka noši. Ke ile ka dira phetho ya gore nakong e tlago ge Dihlatse tša Jehofa di etela ke tla di theetša.”

Ka nako yeo Cathy o ile a hudugela torotswaneng ya ka borwa-bodikela bja Ireland kgaufsi le mollwane wa selete sa Cork le sa Kerry. Ka nako e nngwe ka morago Dihlatse tša Jehofa di ile tša kokota mojakong wa gagwe gomme a di amogela. O ile a amogela thuto ya ka mehla ya Beibele gomme mo nakong ye o ba gona dibokeng tša phuthego gotee le ba mmalwa ba bana ba gagwe. Cathy o leboga kganyogo ya potego ya ngwanenyana yo monyenyane ya go abelana le yena ditaba tše di lokilego.

■ Lefelong la Tullamore, Dihlatse di ile tša ba le dipoledišano tša Beibele le mosadi yo a bitšwago Jean ka lebaka le le fetago nywaga e šupago. Ka dinako tše dingwe o be a bontšha kgahlego le go amogela dipuku, eupša ka dinako tše dingwe kgahlego ya gagwe e be e fokola. Ka letšatši le lengwe ge Hlatse e bitšwago Frances le modirišani wa yona ba be ba etetše Jean, ba ile ba mo hwetša a e-na le boemo bjo bo sa kgahlišego kudu bja maikwelo. Hlatse e bega gore: “Go sa šetšwe seo re bego re se bolela, o ile a befelwa le go feta. Mafelelong o ile a re botša gore re tloge gomme a tswalela lebati ka matla.”

Frances o ile a ipotšiša ge e ba diketelo tše dingwe di be di tla fo baka kamogelo e swanago. Frances o ile a nagana gore: ‘Mohlomongwe ga e sa hlwa e le mo go swanetšego go mo etela ge e ba a sa thabele molaetša e le ka kgonthe.’ Lega go le bjalo, o ile a boledišana le monna wa gagwe Thomas ka taba gomme o be a e-na le kholofelo kudu. Nakong e latetšego ge ba le lefelong leo, Jean o ile a etelwa gape. O be a e-na le bogwera gomme a amogela dikopi tša dimakasine tša Morokami le Phafoga! Diketelo tše dingwe e be e le tše di kgahlišago ka mo go swanago, gomme Thomas le Frances ba ile ba thoma thuto ya ka mehla ya legae ya Beibele le yena.

Ke ka baka la’ng go bile le phetogo? Jean o hlalosa gore nakong ya ge a be a tloga a se botho go Dihlatse, o be a sa tšwa go belega gomme a sa tšwa sepetlele. Ka baka la go nyantšha lesea la gagwe letswele le go ješa ngwana wa gagwe yo mogolo, o be a robala iri le seripa feela bošego bjo bongwe le bjo bongwe. Jean o re: “Ke be ke tloga ke se na kgahlego ya go bolela ka bodumedi.”

Lebakeng la dikgwedi tše pedi Jean o be a e-ba gona dibokeng ka moka tša phuthego gomme lebakeng la dikgwedi tše nne o be a tšea karolo bodireding bja tšhemo. Dikgwedi tše lesome go tloga nakong yeo a thomilego thuto ya gagwe ya Beibele ka yona, o ile a kolobetšwa. Gona bjale phihlelo ya Jean ka noši e a mo thuša bodireding. O anega gore: “Ge ke kopana le motho yo bogale kudu, ke leka go ba yo a kwešišago kudu. Ka mehla ke ngwala seo. Mohlomongwe boemo bo tla be bo fetogile ge ke boa; mo gongwe motho o tla be a ikwa kaone gomme a ba yo a amogelago kudu.”