Na O A Gopola?

Na o hweditše ditokollo tša morago bjale tša Morokami di e-na le mohola wa kgonthe go wena? Gona ke ka baka la’ng o sa leke mogopolo wa gago ka dipotšišo tše di latelago:

◻ Ke dipotšišo dife tše pedi tšeo di thušitšego Bakriste ba bantši bao ba lebeletšanego le dikgetho tša mošomo go fihlelela phetho ya motho ka noši?

Potšišo ya pele ya motheo ke e rego: Na modiro wo o ahlolwa ka Beibeleng? Potšišo ya bobedi ke e rego: Na go dira modiro wo go tla dira gore motho e be motšea-karolo mokgweng o nyatšwago?​—4/15, letlakala 28.

◻ Ke ka tsela efe ‘dibopša tšeo e lego batho di imeditšwego lefeela’? (Ba-Roma 8:​20)

Re ‘imeditšwe lefeela’ ka baka la ditiro tša batswadi ba rena ba pele Adama le Efa. E be e se ka ‘go rata ga rena’ goba ka baka la kgetho ya motho ka noši ge se se diregile. Re abetše boemo bjo. Go sa dutše go le bjalo, Jehofa ka kgaugelo o ile a ba dumelela gore ba be le bana gaešita le ge bjale ba be ba tla fetišetša feela go se phethagale, sebe le lehu go bona. Lehu le aparetše batho bohle, ka gona ke ka kgopolo ye mo Modimo a ‘imeditšego dibopiwa ka moka lefeela.’​—5/1, letlakala 5. 

◻ Ke ka baka la’ng e le mo go kwagalago go bolela gore go tla ba le ‘go ema felo gokgethwa’ ga nakong e tlago ga “makxapha”? (Mateo 24:​15)

Mohlaleng wa bogologolo, ‘makgapha a emego felo gokgethwa’ a be a tswalanywa le go hlasela ga Roma ka tlase ga Molaodi wa Madira Gallus ka 66 C.E. Tlhaselo ya mehleng yeno e swanago le yeo​—e lego go phulega ga “masetla pelo a magolo”—​e se tla. (Mateo 24:​21) Ka gona, “makxapha a thšwalalanyô” a sa dutše a tla ema felo gokgethwa.​—5/1, matlakala 16, 17.

◻ Tate le mma bao ba šomago ba ka hwetša nako bjang bakeng sa bana ba bona?

Mma yo a ikwago a lapile kudu ka morago ga mošomo wa letšatši a ka kgopela bana ba gagwe go mo thuša go apea. Tate yo a nago le lenaneo le le tletšego la dilo tšeo a swanetšego go di dira mafelo-bekeng a ka dira e mengwe ya mešongwana ye le bana ba gagwe.​—5/15, letlakala 6. 

◻ Ke eng seo bao ba ‘sepelago tseleng ya Jehofa’ ba swanetšego go se dira? (Jeremia 7:​23)

Go sepela tseleng ya Jehofa go nyaka potego ya go se kwanantšhe​—boikemišetšo bja go hlankela yena a nnoši. Go nyakega kgodišego​—tumelo e tletšego ya go dumela gore dikholofetšo tša Jehofa ke tša therešo le gore di tla phethagala. Go sepela tseleng ya Jehofa go nyaka go kwa​—go latela melao ya gagwe ka ntle le go aroga le go kgomarela ditekanyetšo tša gagwe tše di phagamego. (Psalme 11:7)​—5/15, letlakala 14.

◻ Ke mehuta efe e mene ya boikarabelo yeo “dimpho tšeo e lego banna” ba ka e phethagatšago? (Ba-Efeso 4:8)

Ba ka re lokiša ka lerato, ba re aga ka lerato, ba tlaleletša boteeng bja rena le phuthego, gomme ba re šireletša ka sebete. (Ba-Efeso 4:​12-14)​—6/1, letlakala 14.

◻ Re ka ithuta’ng tirišanong ya Paulo le batho ba lekgolo bao go boletšwego ka bona go Ditiro le mangwalong a gagwe?

Ka mehla re swanetše go šomišana le mokgatlo wa Modimo le phuthego ya lefelong la gabo rena le badumedi-gotee le rena. Re nyaka thušo ya bona, thekgo le khomotšo dinakong tše botse gotee le dinakong tša mathata.​—6/1, letlakala 31.

◻ Ke ditsela dife tša go nea mabaka tšeo di lego ka dikarolo tše tharo tšeo di ka dirišwago go thuša batho gore ba naganišiše ka Mmopi?

Boemo bja go nepagala bjo bo bonwago legohleng le legolo, mathomo a bophelo lefaseng gotee le go ba ga bjoko bja motho bjo bo swanago bo nnoši ka mo go sa ganetšegego, ka bokgoni bja bjona bjo bo fapa-fapanego.​—6/15, letlakala 18.

◻ Ke ka baka la’ng go kwešiša tlhaloso ya leina la Mmopi leo le mo hlaolago go le bohlokwa gakaakaa?

Leina la Modimo le bolela gore “Yo a Bakago go ba Gona” gomme le gatelela gore o rera go dira selo e bile o a phetha. Ka go tseba ga rena le go diriša ga rena leina la gagwe, re ka lemoga gakaone gore o phetha dikholofetšo gomme o gata megato gore a phethagatše merero ya gagwe.​—6/15, letlakala 21.

◻ Bana ba ka akaretšwa bjang thutong ya lapa ya Beibele?

Moo go kgonegago, lokišetša gore ngwana yo mongwe le yo mongwe a be le Beibele ya gagwe le makasine o ithutwago. Ngwana yo monyenyane a ka kgopelwa go hlalosa diswantšho tšeo di tšwelelago tabeng e ithutwago, gomme ngwana a ka abelwa e sa le pele gore a bale lengwalo. Yo mogolwanyane a ka abelwa gore a bolele dibaka tšeo go tšona taba e ithutwago e ka dirišwago ka mo go holago.​—7/1, letlakala 15.

◻ Ke dipakane dife tšeo lapa le ka di akaretšago ge le lokišetša diboka tša phuthego?

(1) Yo mongwe le yo mongwe ka lapeng a ikemišetše go nea tlhaloso dibokeng; (2) yo mongwe le yo mongwe a katanele go nea ditlhaloso ka mantšu a gagwe ka noši; (3) go akaretša mangwalo ditlhalosong; le (4) go hlahloba taba ka morero wa go e diriša ka noši.​—7/1, letlakala 20.

◻ Senotlelo se se išago lenyalong le lebotse ke eng?

Poledišano e botse ke selo se sengwe sa bohlokwa bakeng sa go notlolla le go latswa lethabo le le kgahlišago la lenyalo le lebotse. Se se akaretša go abelana maikwelo le dikgopolo. Le gona poledišano e agago e akaretša dilo tše di agago, tše di lapološago, tše bolo, tše tumišegago le tše homotšago. (Ba-Efeso 4:​29-32; Ba-Filipi 4:8)​—7/15, letlakala 21.

◻ ‘Tsela ya Jehofa’ ke eng? (Psalme 25:​8, 9, 12)

Tsela yeo ke tsela ya lerato. E theilwe go direng seo se lokilego go ya ka ditekanyetšo tša Modimo. Beibele e bitša go dirišwa mo ga lerato leo le theilwego molaong wa motheo “tsela e phalaxo dineô tšeo kxolê-kxolê.” (1 Ba-Korinthe 12:​31)​—8/1, letlakala 12.