Batswadi ba Ganana le Kgethollo ya Morutiši

Morutiši wa sekolo sa bo-mapimpana kua Cassano Murge, Italy, o ile a romela ba bangwe ba barutwana ba gagwe gae le dipampišana tša go kgomarela. Dipampišana tše tša go kgomarela tšeo di bego di reretšwe gore di kgomaretšwe lebating la ka pele, di be di e-na le molaetša o rego: “Re Makatholika. Dihlatse tša Jehofa di kgopelwa gore di se ke tša kokota lebating le.”

Ba bangwe ba batswadi ba barutwana, gaešita le ge bona e be e se Dihlatse tša Jehofa, ba ile ba ganana ka go tia le ditiro tša morutiši. Go ya ka kuranta e nngwe ya Muoviti Muoviti, batswadi ba ile ba latofatša ka gore ‘go nea bana molaetša o swanago le wo go tlaleletša tabeng ya go gana ga bona motho le ge e le ofe yo a sa naganego ka go swana le bona goba go kgetholleng motho yo mongwe ka baka la gore a le bodumeding bjo bo “fapanego.”’ Motswadi yo mongwe yo a ilego a ngwalela kuranta o ile a bitša pampiri yeo ya go kgomarela gore ke “peu ya ngwang, mafelelo a go hloka tsebo le botlaela.”

Bjalo ka ge pego ye e bontšha, batho ba bantši bao ba sa bebego sefahlego ba lemoga dikotsi tša go bjala dipeu tša kgethollo. Gape ba na le tlhompho bakeng sa bodiredi bja Bokriste bjo bo dirwago ke Dihlatse tša Jehofa Italy ka moka le lefaseng ka moka. Ke ka baka la’ng o sa botšiše Dihlatse ‘lebaka la kholofelo ye e lego mo go tšona’? Di tla fišegela go ahla-ahla taba ye le wena, di dira bjalo “ka tlhompho e tseneletšego.”​—1 Petro 3:16, bapiša le NW.