Mediro e Mebotse e Tlišetša Modimo Tumišo

BAO ba ratago Modimo ba katanela go bonagatša seetša sa moya se se tšwago Lentšung la gagwe, Beibele. Ka tsela ye, ba latela taelo ya Jesu ya gore: “Le sa lena seetša a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.” (Mateo 5:16) Lentšu le le bolelwago gotee le boitshwaro bjo bo lokilego di ka tlišetša Modimo tumišo.

Dihlatse tša Jehofa di tsoma go thabiša Modimo ka go dira dilo ka go dumelelana le Beibele le ka go katanela go thuša ba bangwe moyeng. Di dira bjalo gaešita le dinageng tšeo go tšona bodiredi bja tšona bja phatlalatša bo sego bja ngwadišwa ka molao. Motseng-mošate wa e nngwe ya dinaga tše, Dihlatse di be di dutše di swara dikopano tša ngwaga le ngwaga tšeo go tšona go bago le batho ba ka bago 6 000 go ya go 9 000. Bakeng sa dipokano tše bjalo, ba ile ba renta diholo tša meago yeo go swarelwago diphadišano gona. Bjalo ka ge di ile tša dira nywageng e fetilego, pele ga kopano ya tšona ka 1999, Dihlatse tše makgolo di ile tša šoma ka thata go hlwekiša meago le go tsenya tshepedišo ya medumo le ditulo tše dikete.

Ditokišetšo tše ka moka di ile tša lemogwa. Sehlopha sa bašomi sa balaodi ba moago se ile sa lemoga mediro ye. Gape ba ile ba bona le gore, gaešita le ge go be go e-na le palo ya ba 15 666 bao ba bilego gona, selo se sengwe le se sengwe se ile sa sepela ka go thelela gomme Dihlatse di be di e-na le thulaganyo kudu. Bašomi gape ba be ba kgahlilwe ke go hlwekišwa ga lefelo ka mo go tseneletšego ka morago ga moo.

Balaodi ba ile ba bontšha tebogo bakeng sa se ka moka ka go bea Dihlatse lelokelelong la dilo tšeo di tlago pele e le gore e tle e be tšona di newago sebaka sa pele sa go renta moago ngwageng o latelago. Eupša balaodi ba ile ba dira seo se fetago fao. Ka July 15, 1999, ba ile ba nea komiti ya kopano sefoka sa tebogo. Godimo ga mentlele go be go ngwadilwe mantšu a rego “phuthego ya Dihlatse tša Jehofa”​—selo seo se bego se sa letelwa nageng yeo modiro wa tšona wa go ruta wa Beibele o lego ka tlase ga dithibelo.

Lefaseng ka bophara ka 2000/2001, dimilione di letetšwe gore di be gona Dikopanong tša Selete tša “Badiri ba Lentšu la Modimo” tša Dihlatse tša Jehofa. Ka go ba gona, o ka iponela ka noši kamoo bao ka phišego ba dirago seo se bolelwago ka Beibeleng ba tšeago karolo ka gona medirong e mebotse yeo e tlišetšago Modimo tumišo.