Na o a Gopola?
Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:
• Complutensian Polyglot e be e le eng, gomme ke ka baka la’ng e be e le ya bohlokwa?
E be e le Beibele e gatišitšwego, ya maleme a mantši yeo e ngwadilwego ka dikarolo tšeo di bapelanego kgaufsi tša mongwalo o kaone-kaone woo o bego o le gona ka nako yeo ka Sehebere, Segerika le Selatine gotee le dikarolo tše dingwe tša se-Arama. Beibele ye ya Polyglot e ipontšhitše e le mogato o mogolo tšwelopeleng ya go tšweletšwa ga mangwalo ao a kaonefaditšwego a maleme a mathomo.—4/15, matlakala 28-31.
• Batho ba ka thabiša bjang Modimo?
E le motho wa kgonthe yo a phelago, Jehofa o kgona go nagana, go dira dilo le go ba le maikwelo. Ke “Modimo yo a thabilego” e bile o thabišwa ke go phetha morero wa gagwe. (1 Timotheo 1:11, NW; Psalme 104:31) Ge re dutše re ithuta ka mo go oketšegilego ka maikwelo a Modimo, re tla thoma go tseba seo re ka se dirago gore re thabiše pelo ya gagwe.—5/15, matlakala 4-7.
• Ke ka baka la’ng Dafida a ile a dumelela mosadi wa gagwe Mikala go ba le modimo wa seswantšho?
Ge Kgoši Saulo a be a rera go bolaya Dafida, Mikala o ile a mo thuša go tšhaba, gomme malaong a bea modimo wa seswantšho woo mohlomongwe e bego e le wa sebopego sa motho. A ka ba a be a e-na le modimo wa seswantšho ka gobane pelo ya gagwe e be e sa felela go Modimo. Dafida a ka ba a be a sa tsebe ka modimo wo wa seswantšho goba a ile a o dumelela ka ge e be e le morwedi wa Kgoši Saulo. (1 Koronika 16:25, 26)—6/1, letlakala 29.
• Taelo ya motheo ya Modimo ya go ila madi e be e le efe?
Ka seo Modimo a se boletšego ka morago ga Meetse-fula, Molaong wa Moše, taelong yeo e hwetšwago go Ditiro 15:28, 29, o ile a lebiša tlhokomelo ya rena sehlabelong seo se akaretšago madi a tšholotšwego a Jesu. Ke feela ka madi ao re ka hwetšago tebalelo le go ba le khutšo le Modimo. (Ba-Kolose 1:20)—6/15, matlakala 14-19.
• Ke mehlolo e mekae ya Jesu yeo go bolelwago ka yona ka Beibeleng?
Dipego tša Ebangedi di bolela ka mehlolo ya Jesu e 35. Eupša palo e nepagetšego ya mehlolo ya Jesu, go akaretša le yeo e sego ya begwa, ga se ya utollwa. (Mateo 14:14)—7/15, letlakala 5.