“Ke Selo se Sekaone Kudu se o ka se Dirago”

ALEXIS ke mošemanyana wa nywaga e mehlano yo a dulago motseng wa Morelia kua Mexico, yoo batswadi ba gagwe ba ithutago Beibele le go ba gona dibokeng tša Dihlatse tša Jehofa. Ge a le kopanong ya tikologo le ba lapa la gabo, o ile a bona pontšho ye e lego mabapi le go dira boboledi ka ntlo le ntlo. O ile a retologela go tatagwe ka go akgofa gomme a mmotšiša gore: “Tate, tate, ke ka baka la’ng o sa ye go dira modiro wa boboledi?” Tatagwe o ile a araba ka gore: “Ke sa dutše ke ithuta gore ke tle ke kgone go dira seo.” Alexis o ile a araba ka mafolofolo gore: “Tate, ke selo se sekaone kudu se o ka se dirago.”

Ngwana yo yo monyenyane o ile a bona bohlokwa bja gore a dire dilo ka go dumelelana le tsebo ya gagwe ka Jehofa. Ka ge a be a dula le ba bangwe ba bana ba mmamogolo’agwe ka ntlong e tee, o ile a thoma pele ka go rapela go Jehofa ke moka a bolela le bona ka seo a ithutilego sona ka thušo ya batswadi ba gagwe go tšwa pukung ya Puku Ya-ka ya Ditaba tša Beibele. Gaešita le ge Alexis a be a se a hlwa a tseba go bala, o be a tseba dikagare tša puku ye gabotse kudu ka go bona diswantšho tše di bontšhago dikanegelo. O ile a ba a bolela gore o nyaka go etela batho magaeng a bona le go boledišana le bona ka seo a ithutilego sona ka merero ya Modimo.

Ka kgonthe, bobedi ba bagolo le ba banyenyane ba ka dumelelanya maphelo a bona le seo Jehofa, “Mokxêthwa,” a se letetšego go bona gomme ka go rialo ba be le tokelo e kgolo ya go nea bohlatse ka yena gare ga ditšhaba. (Jesaya 43:3; Mateo 21:16) Ka ntle le pelaelo, seo ke se sengwe sa dilo tše kaone kudu tšeo motho a ka di dirago.