Na le Kgona go Boledišana Gabotse?

“LENGWALO la Maratano la Motho wa Nywaga e 60.” Seo e be e le sehlogo sa phadišano ya panka ya kua Japane nywageng e sego kae e fetilego. E be e kgothaletša Majapane ao a lego nywageng ya ona ya bo-50 le bo-60 gore a bolele ‘maikwelo a ona a kgonthe’ ka balekane ba ona. Yo mongwe wa batšea-karolo o ile a ngwalela mosadi wa gagwe gore: “O ka fo sega, eupša ke tla itshola ge e ba nka se bolele se, tseba gore maikwelo a-ka ke a, ke a bolela ka go hlaboša ke re: Ke leboga ge o nyalane le nna.”

Ditšong tše dintši, go akaretša le go tše dingwe tša dinageng tša ka Bohlabela, batho ga ba kgothaletšwe gore ba bolele maikwelo a bona ka bolokologi. Lega go le bjalo, batho ba ka godimo ga ba 15 000 ba ile ba tšea karolo phadišanong yeo ya go ngwala lengwalo la maratano. Batho ba ile ba e rata kudu mo e lego gore go ile gwa swarwa e nngwe gape, gomme go ile gwa gatišwa le dipuku tše di bego di theilwe mangwalong ao. Se se bolela gore, ka gare-gare ga dipelo tša batho, bontši bja bona ba rata go bolela kamoo ba ikwago ka gona ka balekane ba bona bao ba ba ratago. Lega go le bjalo, ba bangwe ba phema go dira seo. Ka baka la’ng? E ka ba e le ka gobane go nyakega boiteko bjo bogolo le bokgoni gore ba botše ba bangwe—go etša balekane ba bona—kamoo ba ikwago ka gona.

Hitoshi Kato yoo a ngwadilego puku ya mabapi le go rola modiro o bolela gore gare ga banyalani ba šetšego ba godile ba kua Japane, bontši bja ditlhalo di thoma ke basadi ka baka la sekgopi se se tsemilego medu seo ba se bolokilego ka nywaga e mentši. Lega go le bjalo, o re: “Eupša seo le sona se ba gona ka baka la gore banyalani ba se na poledišano e botse ge ba e-na le mathata.”

Gantši basadi ba nyaka go hlala gatee-tee ge banna ba bona ba rola modiro, gomme seo se makatša banna ba bona. Go ka ba go fetile nywaga e mentši banyalani bao ba se ba bolela kamoo ba ikwago ka gona ka yo mongwe le yo mongwe wa bona. Monna le mosadi ba ka ba ba ile ba leka go bolela maikwelo a bona eupša ba paletšwe ke go dula ba boledišana gabotse. Go e na le gore ba age tswalano ya kgaufsi, ba ikhweditše ba ngangišana ka makga a mantši.

Monna le mosadi ba ka lokiša bjang mathata a bona ka khutšo gomme ba botšana maikwelo a bona ka tsela e thabišago? O ka thabišwa ke go tseba gore ditšhišinyo tše di šomago kudu ga di hwetšwe ka pukung e sa tšwago go ngwalwa ke moeletši wa tša manyalo, eupša di hwetšwa ka pukung ya bogologolo yeo e bego e dutše e tšeelwa godimo ka nywaga-kgolo e mentši—Beibele.