Bodumedi Bjo bo Lokilego bo Kgothaletša Lerato la Borwarre

BEIBELE e re: “E a se naxo leratô xa a tsebe Modimo, xobane Modimo ké Yêna leratô.” (1 Johane 4:8, Beibele ya Sepedi) Ka go rialo, bodumedi bjo bo lokilego bo swanetše go godiša lerato la borwarre.

Madumedi a mantši a dira modiro o mobotse wa go hlokomela balwetši, batšofadi le badiidi. A kgothaletša ditho tša ona go diriša keletšo ya moapostola Johane, yo a ngwadilego gore: “Xe motho a ruile tša bophelô bya lefase, ’me a bôna ngwan’abo à hlôka, a tla a mo tswalêlêla pelo ya xaxwe, xo yêna leratô la Modimo le ka dula bya’ng? Bana ba-ka! A re se kê ra ratana ka polêlô le ka leleme; a re rataneng ka tirô le ka therešô.”—1 Johane 3:17, 18, Beibele ya Sepedi.

Lega go le bjalo, go thwe’ng ge ditšhaba di tsena ntweng? Na taelo ya Modimo ya gore “wa xeno O mo ratê ka mokxwa wo O ithataxo ka wôna” e swanetše go dirišwa dinakong tša khutšo eupša e se latelwe ge radipolitiki goba kgoši e kgetha go lwa le setšhaba sa moagišani?—Mateo 22:39, Beibele ya Sepedi.

Jesu o itše: “Seo bohle ba tlog’o tseba ka sona ga le le barutiwa ba-ka, ke ga le na le leratano.” (Johane 13:35, PK) Ge o dutše o araba dipotšišo tše latelago, ipotšiše gore, ‘Na ditho tša bodumedi bjo di bontšha batho bohle lerato ka dinako tšohle e sego feela ka mantšu eupša le ka ditiro?’

TABA: Ntwa.

SEO BEIBELE E SE RUTAGO: Jesu o laetše barutiwa ba gagwe gore: “Ke re go lena; Ratang manaba a lena, . . . le dire ga botse go ba ba le hloilego.”—Mateo 5:44, PK.

Ge bahlabani ba be ba e-tla go tlo swara Jesu, moapostola Petro o ile a ntšha sebetša e le gore a mo emelele. Lega go le bjalo, Jesu o ile a re: “Bušetša thšoša ya xaxo bodulong bya yôna; xobane e a swaraxo thšoša, ó tlo bolawa ka yôna.”—Mateo 26:52, Beibele ya Sepedi.

Moapostola Johane o ngwadile gore: “O ka bona bana ba Modimo le bana ba diabolo, gobane bao e lego ba diabolo ba gana go dira botse goba go ratana. Le boditšwe go tloga mathomong gore re swanetše go ratana. Le se ke la swana le Kaine, yo e bego e le wa diabolo gomme a bolaya ngwanabo.”—1 Johane 3:10-12, Contemporary English Version.

POTŠIŠO: Na bodumedi bjo bo kgothaletša ditho tša bjona go tšea karolo dintweng?

TABA: Dipolitiki.

SEO BEIBELE E SE RUTAGO: Ka morago ga go bona bokgoni bja Jesu bja go dira mehlolo, ba bangwe ba ile ba nyaka go dira gore a tsenele tša dipolitiki. O ile a arabela bjang? “Jesu ka ga a tseba gobane ba tlo tla go mo goga, gore ba mmee kgoši, a ba ngwegela, a boela thabeng a nnoši.”—Johane 6:15, PK.

Ge Jesu a be a swarwa le go pharwa ka molato wa maaka wa gore o be a lwantšha mmušo, o ile a araba ka gore: “Mmušo wa-ka ga o tšwe lefaseng leno. Ga mmušo wa-ka e ka be e le o tšwago lefaseng le, bahlanka ba-ka ba ka be ba hlabanela, gore ke se gafelwe Bajuda; gomme bjalo mmušo wa-ka ga se o tšwago mono.”—Johane 18:36, PK.

Ge a be a rapela Modimo mabapi le barutiwa ba gagwe, Jesu o itše: “Ke ba neile lentšu la gago, gomme lefase le ba hloile, ka gobane e se ba lefase, bjalo ka nna ga ke se wa lefase.”—Johane 17:14, PK.

POTŠIŠO: Na bodumedi bjo bo latela mohlala wa Jesu gomme bja phema go akaretšwa dipolitiking, gaešita le ge seo se bolela gore ditho tša bjona di tla hloiwa ke bo-radipolitiki ba bangwe?

TABA: Kgethollo.

SEO BEIBELE E SE RUTAGO: Ge ba batho ba mathomo ba sa bollago bao e bego e se Bajuda ba fetoga Bakriste, moapostola Petro o ile a bolela gore: “Modimo ga a bontšhe kgethollo, eupša setšhabeng se sengwe le se sengwe motho yo a Mmoifago le yo a dirago go loka o a amogelega go Yena.”—Ditiro 10:34, 35, Holman Christian Standard Bible.

Ge a ngwalela Bakriste ba lekgolong la pele la nywaga, Jakobo o itše: “Bana bešo! Tumêlô ya xo dumêla Jesu Kriste Mong wa rena wa letaxô, xa Le nayô’ xe Le sa fêla Le beba batho. Xe phuthexong xò tsêna monna wa dipalamonwana tša xauta à apere tše di phadimaxo, xwa tsêna le modiitšana wa kobô e thšilafetšexo, ’me la bôna eo wa diaparô tše di phadimaxo la re: Wene dula fá xabotše! ’me modiitšana la bolêla naê, la re: Ema moo! xoba la re: Dula fá fase boxatong bya ’naô tša-ka! a e ka se bê xo re Le bebile batho? A xa se xo re Le baahlodi ba ’kxopolô tše mpe?”—Jakobo 2:1-4, Beibele ya Sepedi.

POTŠIŠO: Na bodumedi bjo bo ruta gore batho ka moka ba a lekana mahlong a Modimo le gore ditho tša bodumedi ga se tša swanela go kgetholla motho le ge e le ofe ka gobane e le wa morafo o mongwe goba ka baka la boemo bja gagwe bja tša ditšhelete?